ພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາສຳຫຼວດ ແຜນພັດທະນາໂຄງການກໍ່ສ້າງໂຮງງານຜະລິດເຈ້ຍ ໄດ້ຈັດຂຶ້ນໃນວັນທີ 11 ມັງກອນ 2019 ຢູ່ທີ່ຫ້ອງປະຊຸມພະແນກແຜນການ ແລະ ການລົງທຶນ ຕາງໜ້າໃຫ້ແກ່ອຳນາດການປົກຄອງແຂວງບໍລິຄຳໄຊ ເຊັນໂດຍ ທ່ານ ເລື່ອນວິໄລ ຈັນທະລາພັນ ຫົວໜ້າພະແນກແຜນການ ແລະ ການລົງທຶນແຂວງ, ຕາງໜ້າບໍລິສັດຜູ້ລົງທຶນພັດທະນາ ເຊັນໂດຍ ທ່ານ ຊູເຫວີ້ຍມີນ ປະທານບໍລິສັດ ຈົ່ງກົງເຈ້ຍລາວ ຈຳກັດ ຊ້ອງໜ້າໂດຍ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ພ້ອມດ້ວຍຫົວໜ້າພະແນກການອ້ອມຂ້າງ, ເມືອງ ແລະ ພະນັກງານວິຊາການເຂົ້າຮ່ວມເປັນສັກຂີພິຍານ.

    ບໍລິສັດ  ຈົ່ງກົງເຈ້ຍລາວ ຈຳກັດ ແມ່ນມີຄວາມຕ້ອງການສຶກສາສຳຫຼວດດ້ານເນື້ອທີ່ດິນ ເພື່ອພັດທະນາໂຄງການກໍ່ສ້າງໂຮງງານຜະລິດເຈ້ຍ  ຢູ່ເຂດບ້ານທ່າສາລາ ເມືອງຄຳເກີດ ແຂວງບໍລິຄຳໄຊ ໂດຍຈະສຶກສາເປັນໄລຍະເວລາ 6 ເດືອນ ເຊິ່ງປະຈຸບັນບໍລິສັດມີຄວາມພ້ອມທີ່ຈະຈັດຕັ້ງປະຕິບັດໂຄງການໃຫ້ຖືກຕ້ອງ ແລະ ສອດຄ່ອງກັບລະບຽບກົດໝາຍ ໂດຍສະເພາະແມ່ນປະຕິບັດຕາມເນື້ອໃນບົດບັນທຶກສະບັບນີ້ຢ່າງເຂັ້ມງວດ.