ກອງປະຊຸມໃຫຍ່ຄັ້ງທີ່ III  ຂອງຮາກຖານພັກ ຫ້ອງສັນຕິບານ ກອງບັນຊາການ ປກສ ແຂວງ ບໍລິຄໍາໄຊ ໄດ້ໄຂຂື້ນຢ່າງເປັນທາງການ ໃນວັນທີ່ 10 ມັງກອນ 2019 ນີ້  ທີ່ສະໂມສອນໃຫຍ່ ກອງບັນຊາການ ປກສ ແຂວງ ໂດຍການເປັນປະທານຂອງສະຫາຍ ພັນໂທ ເຄນວອນ ລໍວັນໄຊ ເລຂາຄະນະພັກຮາກຖານ ຫ້ອງສັນຕິບານ, ໃຫ້ກຽດເຂົ້າຮ່ວມຂອງ ສະຫາຍ ພັນໂທ ຜາຂົງ ດອກມະນີຈັນ ຄະນະປະຈໍາພັກ ຮອງຫົວໜ້າ ກອງບັນຊາການ ປກສ ແຂວງ.

      ທີ່ປະຊຸມ ໄດ້ຮັບຟັງບົດລາຍງານການເມືອງ ການຈັງຕັ້ງປະຕິບັດມີຕິກອງປະຊຸມຄັ້ງທີ່ຜ່ານມາ ເຊິ່ງໄດ້ຍົກໃຫ້ເຫັນຜົນງານໃນການຊີ້ນຳ-ນຳພາຈັດຕັ້ງປະຕິບັດໜ້າທີ່ວຽກງານຫຼາຍດ້ານ,  ດ້ານການເມືອງ-ແນວຄິດ ໄດ້ຖືເອົາການສຶກສາອົບຮົມ ການເມືອງ - ແນວຄິດ ດ້ວຍການເຊື່ອມຊືມເອກະສານທີ່ສຳຄັນຂອງພັກ - ລັດໃນຖັນແຖວສະມາຊິກ, ພະນັກງານ - ນັກຮົບ ຕິດພັນກັບວຽກງານນະໂຍບາຍເປັນບັນຫາສຳຄັນຕົ້ນຕໍ ເຮັດໃຫ້ສະມາຊິກພັກ, ພະນັກງານ - ນັກຮົບ ມີຄຸນສົມບັດສິນທຳປະຕິວັດ ເຊື່ອໝັ້ນຕໍ່ການນໍາພາຂອງພັກຢ່າງໜັກແໜ້ນ. ໃນຕະຫຼອດໄລຍະ 05 ປີຜ່ານມາ ໄດ້ເອົາໃຈໃສ່ໃນວຽກງານປັບປຸງກໍ່ສ້າງ ຂະຫຍາຍສະມາຊິກພັກ ສ້າງມະຫາຊົນກ້າວໜ້າເຂົ້າເປັນສະມາຊິກພັກໄດ້ 47  ສະຫາຍ, ຍິງ 13 ສະຫາຍ ສາມາດຈັດແບ່ງປະເພດສະມາຊິກພັກ ປອດໃສ, ເຂັ້ມແຂງ, ໜັກແໜ້ນ ມີ 98 ສະຫາຍ, ຍິງ 12 ສະຫາຍ ເທົ່າກັບ 84,4%. ດ້ານວຽກງານວິຊາສະເພາະ ກໍ່ໄດ້ເອົາໃຈໃສ່ປະຕິບັດຕາມພາລະບົດບາດ, ສິດ ແລະ ໜ້າທີ່ ດ້ວຍຄວາມຮັບຜິດຊອບສູງ ສາມາດເຮັດສໍາເລັດວຽກງານຫຼາຍດ້ານຄື: ວຽກງານຕໍາຫຼວດກວດຄົນເຂົ້າ - ອອກເມືອງ, ມີມວນຊົນມາໃຊ້ບໍລິການເຂົ້າ - ອອກຜ່ານປະຕູດ່ານໃນທົ່ວແຂວງມີ 3.101.369 ຄົນ, ຍິງ 1.070.439 ຄົນ, ເດັກ 39.189 ຄົນ, ປະເພດພາຫະນະມີ 487.909 ຖ້ຽວຄັນ, ອອກໃບຜ່ານແດນ ແລະ ປື້ມຜ່ານແດນໄດ້ 41.588 ຫົວ, ປ້ອງກັນການນຳ ແຂກພາຍໃນ ແລະ ຕ່າງປະເທດ ສໍານັກງານ ຫ້ອງການ ມີຄວາມປອດໄພ 100%, ຕິດຕາມເກັບກໍາຂື້ນບັນຊີເປົ້າໝາຍ, ກວດກາເກັບກໍາສະຖິຕິຄົນຕ່າງປະເທດທີ່ເຂົ້າມາພັກເຊົາຊົ່ວຄາວ, ດໍາເນີນທຸລະກິດ, ຄ້າຂາຍ ແລະອື່ນໆ ເປັນປະຈໍາ ລວມມີ 25 ສັນຊາດ. ແກ້ໄຂດໍາເນີນຄະດີຕ່າງໆ ໄດ້ມີຈໍານວນ 126 ເລື່ອງ ມີຜູ້ຖືກຫາ 142 ຄົນ, ຍິງ 21 ຄົນ, ທຸກໜ້າທີ່ວຽກງານວິຊາສະເພາະແມ່ນສໍາເລັດຕາມລະດັບຄາດໝາຍທີ່ໄດ້ກຳນົດໄວ້. 

    ພາຍຫລັງຄະນະພັກຊຸດເກົ່າອຳລາໜ້າທີ່, ກອງປະຊຸມກໍ່ໄດ້ມີການປ່ອນບັດເລືອກຕັ້ງເອົາຄະນະພັກຊຸດໃໝ່ ຜ່ານການປ່ອນບັດ ແລະ ກອງປະຊຸມຄັ້ງປະຖົມມະລຶກ ເລືອກໄດ້ ສະຫາຍ ພັນໂທ ເຄນວອນ ລໍວັນໄຊ ເປັນເລຂາ, ສະຫາຍ ພັນໂທ ວົງວິໄລ ອີນທິສານ ເປັນຮອງເລຂາ, ສະຫາຍ ພັນຕີ ສຸກສະຫວັນ ບຸຜາພັນ ເປັນປະທານກວດກາ, ສະຫາຍ ພັນໂທ ບຸນລ້ອມ ດາລາສຸກ, ສະຫາຍ ພັນຕີ ສີຂັນໄຊ ໄຊມົນຕີ, ສະຫາຍ ພັນໂທ ກົງຕີ ພຸດທະວົງ ແລະ ສະຫາຍ ພັນຕີ ສີພັນດອນ ຄໍາມະຈັກ ເປັນຄະນະກໍາມະການກວດກາພັກຮາກຖານ. ໂອກາດດັ່ງກ່າວ ທີ່ປະຊຸມຍັງໄດ້ຜ່ານຂໍ້ຕົກລົງຂອງຄະນະປະຈໍາພັກ ກອງບັນຊາການ ປກສ ແຂວງ ວ່າດ້ວຍການແຕ່ງຕັ້ງ 03 ສະຫາຍ ເປັນຄະນະກໍາມະການກວດກາຮາກຖານພັກຕື່ມອີກ.