ຕອນເຊົ້າ ວັນທີ 08 ມັງກອນ 2019 ນີ້ ທີ່ສະໂມສອນໃຫຍ່ ກອງບັນຊາການ ປກສ ແຂວງ ບໍລິຄໍາໄຊ ໄດ້ຈັດພິທີປະກາດ ໂຍກຍ້າຍ - ແຕ່ງຕັ້ງ ແລະ ເລື່ອນຊັ້ນໃຫ້ນາຍ ແລະ ພົນຕໍາຫຼວດທົ່ວ ປກສ ແຂວງ ບໍລິຄໍາໄຊ, ໂດຍໃຫ້ກຽດຂົ້າຮ່ວມຂອງທ່ານ ພັນໂທ ຜາຂົງ ດອກມະນີຈັນ ຄະນະພັກ, ຮອງຫົວໜ້າກອງບັນຊາການ ປກສ ແຂວງ, ມີຄະນະກອງບັນຊາການ ປກສ ແຂວງ, ບັນດາຫ້ອງ, ກອງ, ເມືອງ, ໂຮງຮຽນ ປກສ ຊັ້ນຕົ້ນເລກ 4, ຄ້າຍຄຸມຂັງດັດສ້າງ, ພະນັກງານ - ນັກຮົບ ເຂົ້າຮ່ວມ.

         

       ໂດຍປະຕິບັດຕາມຂໍ້ຕົກລົງຂອງກອງບັນຊາການ ປກສ ແຂວງ ບໍລິຄໍາໄຊ ສະບັບ ເລກທີ 1132/ປກສ.ຂ, ລົງວັນທີ 11 ທັນວາ 2018 ແລະ ຂໍ້ຕົກລົງ ສະບັບເລກທີ 0083/ປກສ.ຂ ລົງວັນທີ 07 ມັງກອນ 2019 ວ່າດ້ວຍການໂຍກຍ້າຍນາຍຕໍາຫຼວດທີ່ຂຶ້ນກັບກອງບັນຊາການ ປກສ ແຂວງ ບໍລິຄໍາໄຊ ໂດຍໄດ້ໂຍກຍ້າຍ ສະຫາຍ ພັນໂທ ວຽງແກ້ວ ພຽນວົງ ຈາກຫົວໜ້າພະແນກບໍລິຫານສັງລວມ-ຈັດຕັ້ງ ຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ໄປຊ່ວຍວຽກຢູ່ຄ້າຍຄຸມຂັງ-ດັດສ້າງ ປກສ ແຂວງ, ໂຍກຍ້າຍສະຫາຍ ພັນຕີ ສົມພອນ ບົວລີບານ ຫົວໜ້າພະແນກ ປກສ ກຸ່ມບ້ານ ແລະ ປກສ ບ້ານ ຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ໄປຊ່ວຍວຽກຢູ່ຫ້ອງພະລາທິການ, ພ້ອມນັ້ນ ຍັງໄດ້ຜ່ານຂໍ້ຕົກລົງຊົ່ວຄາວຂອງກອງບັນຊາການ ປກສ ແຂວງ ວ່າດ້ວຍການແຕ່ງຕັ້ງນາຍຕໍາຫຼວດຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ແລະ ຮັກສາການຫົວໜ້າຫ້ອງຕໍາຫຼວດ ໂດຍໄດ້ແຕ່ງຕັ້ງ ສະຫາຍ ພັນໂທ ສົມເພັດ ໄຊຄໍາແພງ ເປັນຮັກສາການຫົວໜ້າພະແນກ ປກສ ກຸ່ມບ້ານ ແລະ ປກສ ບ້ານ, ແຕ່ງຕັ້ງສະຫາຍ ພັນຕີ ໃບຄໍາ ແພງມາລາ ເປັນຮັກສາການຫົວໜ້າພະແນກຄຸ້ມຄອງສໍາມະໂນຄົວ ແລະ ຍົກຍ້າຍຖິ່ນຖານ, ແຕ່ງຕັ້ງສະຫາຍ ຮ້ອຍເອກ ຄໍາພອນ ນາດວິໄລ ເປັນຮັກສາການຫົວໜ້າພະແນກບໍລິຫານສັງລວມ-ຈັດຕັ້ງ, ແຕ່ງຕັ້ງສະຫາຍ ພັນໂທ ທະນູໄຊ ແສນອານົງ ເປັນຮັກສາການຫົວໜ້າຫ້ອງຕໍາຫຼວດ.

       ໃນພິທີຍັງໄດ້ມີການປະກາດເລື່ອນຊັ້ນໃຫ້ ນາຍ ແລະ ພົນຕໍາຫຼວດ ຜູ້ທີ່ມີມາດຖານເງື່ອນໄຂຄົບຖ້ວນ ແລະ ມີຜົນງານດີເດັ່ນ, ໃນນັ້ນ ເລື່ອນຊັ້ນຮ້ອຍຕີ ຂື້ນຮ້ອຍໂທ ຈໍານວນ 56 ສະຫາຍ, ຍິງ 10 ສະຫາຍ, ເລື່ອນຊັ້ນວາທີຮ້ອຍຕີ ຂື້ນຊັ້ນຮ້ອຍຕີ 25 ສະຫາຍ, ຍິງ 01 ສະຫາຍ, ເລື່ອນຊັ້ນ ສິບເອກ ຂື້ນຊັ້ນວາທີຮ້ອຍຕີ ຈໍານວນ 05 ສະຫາຍ, ຍິງ 02 ສະຫາຍ, ເລື່ອນຊັ້ນ ສິບໂທ ຂື້ນເປັນຊັ້ນສິບເອກ ຈໍານວນ 02 ສະຫາຍ, ຍິງ 01 ສະຫາຍ, ປະດັບຊັ້ນຮ້ອຍຕີ ມີ 02 ສະຫາຍ.

         

       ຕອນທ້າຍ ຄະນະພັກ ຄະນະບັນຊາກຳລັງ ປກສ ແຂວງ ກໍ່ໄດ້ໃຫ້ກຽດມີຄຳເຫັນໂອ້ລົມ ຊີ້ທິດເຍືອງທາງ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍ ນາຍ ແລະ ພົນຕໍາຫຼວດ ທຸກສະຫາຍ ທີ່ເອົາໃຈໃສ່ເຮັດໜ້າທີ່ການເມືອງ ແລະ ວຽກງານວິຊາສະເພາະດ້ວຍຄວາມຫ້າວຫັນໃນໄລຍະຜ່ານມາ ເຊິ່ງເປັນການປະກອບສ່ວນອັນໃຫຍ່ຫຼວງເຮັດໃຫ້ກໍາລັງປ້ອງກັນຄວາມສະຫງົບມີຄວາມເຕີບໃຫຍ່ເຂັ້ມແຂງຕະຫຼອດມາ, ທ່ານໄດ້ເນັ້ນໜັກມາຍັງຜູ້ທີ່ໄດ້ຮັບການແຕ່ງຕັ້ງ ແລະ ເລື່ອນຊັ້ນໃນຄັ້ງນີ້ ຈົ່ງຊອກຮູ້ພາລະບົດບາດ, ສິດ ແລະ ໜ້າທີ່, ຍົກສູງຄວາມຮັບຜິດຊອບຂອງຕົນຕໍ່ກັບໜ້າທີ່ວຽກງານທີ່ການຈັດຕັ້ງມອບໝາຍໃຫ້.