ໃນລະຫວ່າງວັນທີ 7-8 ມັງກອນ 2019 ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ, ພົບປະກັບພໍ່ແມ່ປະຊາຊົນບັນດາເຜົ່າ ແລະ ທັງເປັນການຕິດຕາມ-ກວດກາ, ຊຸກຍູ້ແຜນພັດທະນາເສດຖະກິດ-ສັງຄົມ ຢູ່ບ້ານແກ້ວແສນຄຳ, ບ້ານສົມພວນ ແລະ ບ້ານໂພນທອງ ເມືອງຄຳເກີດ ແຂວງບໍລິຄຳໄຊ ທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າເທີນພາກຂະຫຍາຍ.

    ຈຸດປະສົງໃນການລົງເຄື່ອນໄຫວໃນຄັ້ງນີ້ ກໍ່ເພື່ອລົງພົບປະປະຊາຊົນ, ຮັບຟັງຄຳຄິດ-ຄຳເຫັນຂອງປະຊາຊົນ ແລະ ອົງການປົກຄອງ 3 ບ້ານ ທີ່ໄດ້ຮັບຜົນກະທົບຈາກໂຄງການເຂື່ອນໄຟຟ້ານໍ້າເທີນພາກຂະຫຍາຍ ແລະ ທັງເປັນການຕິດຕາມກວດກາ ບັນດາໂຄງການລົງທຶນຂອງລັດ.

   ໃນໂອກາດນີ້ປະທານສະພາປະຊາຊົນແຂວງ ຍັງໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳຕໍ່ຄະນະຮັບຜິດຊອບໂຄງການ, ອົງການທີ່ກ່ຽວຂ້ອງ, ພະນັກງານຮາກຖານ, ອໍານາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນບັນດາເຜົ່າ ຈົ່ງພ້ອມກັນເອົາໃຈໃສ່ປະຕິບັດລັດຖະທຳມະນູນ ແລະ ກົດໝາຍ ຫ້າວຫັນທຳການຜະລິດ, ປູກຝັງ-ລ້ຽງສັດໃຫ້ຫຼາຍຂື້ນກ່ວາເກົ່າ ເພື່ອຕອບສະໜອງໃນການບໍລິໂພກ ແລະ ຂາຍເປັນສິນຄ້າ ສ້າງລາຍຮັບໃຫ້ແກ່ຄອບຄົວ ພ້ອມທັງຊ່ວຍກັນອະນຸລັກປົກປັກຮັກສາປ່າໄມ້ ແລະ ສິ່ງແວດລ້ອມ ໂດຍການຢຸດຕິການເຮັດໄຮ່ແບບເລື່ອນລອຍ ຫັນມາປູກຝັງ-ລ້ຽງສັດທົດແທນ, ຮັດແໜ້ນຄວາມສາມັກຄີລະຫວ່າງເຜົ່າ, ຕ້ານບັນຫາການລະບາດຂອງຢາເສບຕິດ, ບັນຫາສາສະໜາງົມງວາຍທີ່ລະເມີດຕໍ່ກົດໝາຍແຕ່ລະຂັ້ນ, ແຕ່ລະພາກສ່ວນຕ້ອງມີການສົມທົບປະສານງານເຊິ່ງກັນ ແລະ ກັນ ເພື່ອສຸມໃສ່ໃນການພັດທະນາເສດຖະກິດ-ສັງຄົມ ແລະ ລົບລ້າງຄວາມທຸກຍາກຂອງປະຊາຊົນເທື່ອລະກ້າວ.