ພິມ
ໝວດ: ຂ່າວປະຈຳວັນ.
ກົດເບິ່ງ: 122

       

      ໃນລະຫວ່າງວັນທີ 9-10 ມັງກອນ 2019  ຢູ່ທີ່ເມືອງບໍລິຄັນ ແຂວງບໍລິຄຳໄຊ ໄດ້ເປີດກອງປະຊຸມສຳມະນາ ທາບທາມຮ່າງນິຕິກຳຂອງແຂວງ ແລະ ສະພາປະຊາຊົນແຂວງ ໂດຍການເປັນປະທານຂອງທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງ ມີຄະນະປະຈຳສະພາປະຊາຊົນແຂວງ, ຄະນະປະຈຳພັກແຂວງ, ສະມາຊິກສະພາປະຊາຊົນແຂວງ, ຄະນະຫ້ອງວ່າການປົກຄອງແຂວງ, ເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ ແລະ ຄະນະຮັບຜິດຊອບຮ່າງນິຕິກຳ ເຂົ້າຮ່ວມ.

   ນິຕິກຳ ທີ່ນຳມາທາບທາມຄັ້ງນີ້ ມີ 6 ສະບັບຄື: ຮ່າງນິຕິກໍາ ກ່ຽວກັບຮ່າງຂໍ້ຕົກລົງຂອງເຈົ້າແຂວງ ວ່າດ້ວຍການກຳນົດນະໂຍບາຍ ແລະ ລາຄາຫົວໜ່ວຍຊົດເຊີຍເນື້ອທີ່ດິນບໍລິເວນສົ້ນຂົວນໍ້າຂອງ ແຫ່ງທີ່ 5 ປາກຊັນ-ບຶງການ ຈຳນວນ 52,42 ເຮັກຕາ, ຮ່າງຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງ ແລະ ພັດທະນາຕົວເມືອງປາກຊັນ, ຮ່າງຂໍ້ຕົກລົງຮ່ວມ ວ່າດ້ວຍການພົວພັນ ລະຫວ່າງສະພາປະຊາຊົນແຂວງ ກັບອົງການປົກຄອງແຂວງ, ຮ່າງມະຕິຂອງຄະນະປະຈຳສະພາປະຊາຊົນແຂວງ ວ່າດ້ວຍລະບຽບການຄົ້ນຄວ້າແກ້ໄຂຄຳຮ້ອງທຸກຂອງປະຊາຊົນ, ຮ່າງມະຕິຂອງຄະນະປະຈຳສະພາປະຊາຊົນແຂວງ ວ່າດ້ວຍການລົງພົບປະ ປະຊາຊົນ ແລະ ຮ່າງມະຕິຄະນະປະຈຳສະພາປະຊາຊົນແຂວງ ວ່າດ້ວຍລະບຽບການດຳເນີນກອງປະຊຸມສະພາປະຊາຊົນແຂວງ, ທັ້ງນີ້ກໍ່ເພື່ອເປັນການລະດົມແນວຄວາມຄິດ-ຄວາມເຫັນຢ່າງກວ້າງຂວາງ ກ່ຽວກັບຮ່າງນິຕິກຳຂອງແຂວງ ທີ່ຈະສະເໜີຜ່ານໃນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ I.

      ໃນພິທີຜູ້ແທນກອງປະຊຸມ ຍັງໄດ້ມີການປະກອບຄຳຄິດ-ຄຳເຫັນ ພ້ອມທັງມີການສະເໜີຕື່ມຫົວຂໍ້ໃນບາງໝວດ, ບາງມາດຕາ ເພື່ອເຮັດໃຫ້ຮ່າງນິຕິກຳດັ່ງກ່າວມີເນື້ອໃນຄົບຖ້ວນ, ຮັດກຸມ ແລະ ສົມບູນ. ໃນຕອນທ້າຍປະທານກອງປະຊຸມ ຍັງໄດ້ມີທິດຊີ້ນຳ ແລະ ສະເໜີໃຫ້ບັນດາທ່ານຜູ້ແທນກອງປະຊຸມ ແລະ ຄະນະຮັບຜິດຊອບຮ່າງນິຕິກຳ ຈົ່ງພ້ອມກັນສຸມໃສ່ໃນການຈັດຕັ້ງປະຕິບັດ ແລະ ຮີບຮ້ອນໃນການລຽບລຽງບັນດາເນື້ອໃນຂອງແຕ່ລະຮ່າງນິຕິກຳ ເພື່ອໃຫ້ສອດຄ່ອງຕາມການຕົກລົງເຫັນດີເປັນເອກະພາບກັນໃນກອງປະຊຸມ.