ພິທີປະກາດເປີດປ້າຍກາໝາຍສິນຄ້າ ໜຶ່ງເມືອງໜຶ່ງຜະລິດຕະພັນ (ODOP) ແຫ່ງຊາດ ກຸ່ມນ້ຳ​ອ້ອຍ​ກ້ອນ ບ້ານ​ຊົມ​ຊື່ນ ເມືອງບໍ​ລິ​ຄັນ ໄດ້ຈັດຂຶ້ນໃນວັນທີ 7 ມັງ​ກອນ ຢູ່ສະໂມສອນບ້ານດັ່ງກ່າວ, ໃຫ້ກຽດເຂົ້າຮ່ວມໂດຍທ່ານ ສະ​ຫວນ ສະ​ຫວ່າງ ຮອງເຈົ້າເມືອງບໍ​ລິ​ຄັນ, ມີບັນ​ດາຄະ​ນະ​ກຳ​ມະ​ການ​ຄັດ​ເລືອກ​ໂອ​ດັອບ​ຂັ້ນ​ແຂວງ - ເມືອງ ພ້ອມດ້ວຍແຂກຖືກເຊີນ ແລະ ອຳນາດການປົກຄອງບ້ານຕະຫຼອດຮອດພໍ່ແມ່ປະຊາຊົນ ເຂົ້າຮ່ວມ.

     ໂດຍປະຕິບັດຕາມທິດຊີ້ນໍາຂອງກະຊວງອຸດສາຫະກຳ ແລະ ການຄ້າ ເວົ້າລວມ, ເວົ້າສະເພາະ ກໍຄືປະຕິບັດຕາມທິດຊີ້ນໍາຂອງທ່ານເຈົ້າແຂວງບໍລິຄໍາໄຊ ໃນການຈັດຕັ້ງວຽກງານສົ່ງເສີມການຜະລິດເປັນສິນຄ້າ ເປັນວຽກງານໜຶ່ງ ທີ່ມີຄວາມສໍາຄັນ ໃນການພັດທະນາເສດຖະກິດ-ສັງຄົມ ທີ່ເປັນພື້ນຖານໂຄງລ່າງຂອງແຂວງ ຊຶ່ງນໍາເອົາວຽກງານສົ່ງເສີມການຜະລິດເປັນສິນຄ້າ ລົງຊຸກຍູ້ຕິດພັນກັບວຽກງານສາມສ້າງ ໂດຍການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ເພື່ອເຮັດໃຫ້ໄດ້ແນວນັ້ນ ຈຶ່ງແນໃສ່ກຸ່ມການຜະລິດຫົວໜ່ວຍທຸລະກິດ, ກຸ່ມຜູ້ປະກອບການທີ່ມີທ່າແຮງຢູ່ທ້ອງຖິ່ນ ຂັ້ນບ້ານ, ເມືອງ ໃຫ້ໄດ້ໃຊ້ຫົວຄິດປະດິດສ້າງ ມູນເຊື້ອສືບທອດແຕ່ປູຍ່າຕາຍາຍເປັນທ່າແຮງ ທັງເປັນການສ້າງວຽກເຮັດງານທໍາໃຫ້ແກ່ພໍ່ແມ່ປະຊາຊົນ, ສ້າງເສດຖະກິດຢູ່ທ້ອງຖິ່ນໃຫ້ເຂັ້ມແຂງ ເຊິ່ງປະຈຸບັນ ທົ່ວແຂວງມີ 13 ຫົວໜ່ວຍຜະລິດຕະພັນ ເປັນສິນຄ້າໂອດັອບທີ່ໄດ້ຮັບການນໍາໃຊ້ກາໝາຍໂອດັອບແຫ່ງຊາດແລ້ວ 7 ຫົວໜ່ວຍ ແລະ ກຸ່ມ​ນ້ຳ​ອ້ອຍ​ກ້ອນ ​ກາ​ໜຶ່ງດວງ​ໃຈ ບ້ານ​ຊົມ​ຊື່ນ ​ເມືອງບໍ​ລິ​ຄັນ ແມ່ນ​ເປັນ​ຫົວ​ໜ່ວຍ​ທີ່ 8.

ທ່ານ ຄຳ​ສະ​ຫວາດ ລາດ​ບັນ​ດິດ ຫົວ​ໜ້າ​ກຸ່ມຜະ​ລິດ​ນ້ຳ​ອ້ອຍ​ກ້ອນ ບ້ານ​ຊົມ​ຊື່ນ​ໃຫ້​ຮູ້​​ວ່າ​: ບ້ານ ​ຊົມ​ຊື່ນ ແມ່ນມີ​ເງື່ອນ​ໄຂຫຼາຍ​ຢ່າງ​ໃນ​ການ​ດຳ​ລົງ​ຊີ​ວິດ​ໃນ​ຮູບ​ແບບຊາວ​ກະ​ສິ​ກອນ ເພາະ​ວ່າ​ພູມ​ສັນ​ຖານ​ສອງ​ຝັ່ງ​ແມ່​ນ້ຳ​ງຽບ ​ລ້ວນ​ແຕ່​ເປັນ​ດິນ​ຮາມບພຽງ ແລະ ອຸ​ດົມ​ສົມ​ບູນ ເໝາະ​ແກ່​ການ​ປູກ​ຝັງ ແລະ ລ້ຽງ​ສັດ, ສະ​ນັ້ນ​ ປະ​ຊາ​ຊົນ​ສ່ວນຫຼາຍ​ຈຶ່ງຢຶດຖືອາຊີບເປັນຊາວກະສິກອນ ເຊັ່ນ: ​ປູກກ້ວຍ, ອ້ອຍ, ສາ​ລີ ແລະ ອື່ນ​ໆ, ໃນ​ນັ້ນ​ການ​ປູກ​ອ້ອຍ​​ຂອງພໍ່​ແມ່​ປະ​ຊາ​ຊົນ​ນອກຈາກ​ຜະ​ລິດ​ເປັນ​ນ້ຳ​ອ້ອຍແລ້ວ ຍັງໄດ້ມີການປັບປຸງ​ເປັນ​ນ້ຳ​ອ້ອຍ​ກ້ອນ​ສົ່ງ​ຂາຍ​ຕາມ​ທ້ອງ​ຕະຫຼາດ, ຈາກນັ້ນ ຫຼາຍ​ປີ​ຕໍ່​ມາ​ເຫັນ​ວ່າ​ໄດ້​ຂາຍຫຼາຍ​ຂຶ້ນ​ທຸກ​ປີ​ເຮັດ​ໃຫ້​ພໍ່​ແມ່​ປະ​ຊາ​ຊົນ​ສ່ວນຫຼາຍ​ຫັນ​ມາ​ປູກ​ອ້ອຍເປັນອາຊີບຫຼັກ ແລະ ເຮັດເປັນ​ນ້ຳ​ອ້ອຍ​ກ້ອນ​ຂາຍ​ມີ​ລາຍ​ໄດ້​ດີ​ເຮັດ​ໃຫ້​ເສດ​ຖະ​ກິດ​ຄອບ​ຄົວ​ມີຢູ່ມີກິນ ສາມາດຫຼຸດພົ້ນອອກຈາກຄວາມ​ທຸກ​ຍາກໄດ້ຢ່າງ​ຖາ​ວອນ, ມາຮອດ​ປະ​ຈຸ​ບັນ​ໃນ​ກຸ່ມ​ຜະ​ລິດ​ນ້ຳ​ອ້ອຍ​ກ້ອນ​ມີ 18 ຄອບຄົວ ສະ​ເລ່ຍ​ລາຍ​ຮັບ​ຈາກ​ການ​ຂາຍ​ນ້ຳ​ອ້ອຍ​ກ້ອນປະມານ 259 ລ້ານກ່ວາ​ກີບ​ຕໍ່​ປີ.