ຕາມການລາຍຫຍໍ້ຂອງທ່ານ ກອງ ມະໄລທອງ ນາຍບ້ານປາກຊຸນ ເມືອງປາກກະດິງ ໃນໂອກາດເຂົ້າຮ່ວມພິທີເປີດປ້າຍກາໝາຍສິນຄ້າໜຶ່ງເມືອງ ໜຶ່ງຜະລິດຕະພັນ (ODOP) ແຫ່ງຊາດ ທີ່ໄດ້ຈັດຂຶ້ນໃນທ້າຍປີ 2018 ຜ່ານມານີ້ທີ່ບ້ານດັ່ງກ່າວ ໃຫ້ຮູ້ວ່າ: 

ບ້ານປາກຊຸນ ສ້າງຕັ້ງຂຶ້ນໃນປີ 1920 ມາຮອດປັດຈຸບັນມີພົນລະເມືອງທັງໜົດ 618 ຄົນ, ຍິງ 306 ຄົນ, ປະກອບມີ 1 ຊົນເຜົ່າ ຄື: ເຜົ່າເມີ້ຍ, ມີ 114 ຫຼັງຄາເຮືອນ, ມີຄອບຄົວພົ້ນທຸກແລ້ວ 109 ຄອບຄົວ ກວມເອົາ 95,61% ຂອງຄອບຄົວທັງໜົດ ເເລະ ກາຍເປັນບ້ານເເບບຢ່າງທາງດ້ານສາທາລະນະສຸກ, ບ້ານປອດຄະດີ, ບ້ານວັດທະນະທຳ ເເລະ ບ້ານ 3 ດີ. ເວົ້າສະເພາະວຽກງານຕໍ່າຫູກນັ້ນ ກໍເປັນອາຊີບເສີມໜຶ່ງ ທີ່ສ້າງລາຍຮັບໃຫ້ພໍ່ເເມ່ປະຊາຊົນພາຍໃນບ້ານ ສາມາດເເກ້ໄຂຄວາມທຸກຍາກໃຫ້ນັບມື້ນັບຫຼຸດລົງ​ເທື່ອ​ລະ​ກ້າວ. ໂດຍປະຕິບັດຕາມມະຕິຂອງກອງປະຊຸມໃຫ່ຍຂອງອົງຄະນະພັກເມືອງປາກກະດິງ ຄັ້ງທີ 6 ສະໄໜທີ VI ວ່າດ້ວຍການສ້າງເເຂວງເປັນຫົວໜ່ວຍຍຸດທະສາດ, ສ້າງເມືອງໃຫ້ເຂັ້ມເເຂງຮອບດ້ານ ເເລະ ສ້າງບ້ານເປັນຫົວໜ່ວຍພັດທະນາ ຕິດພັນກັບການເເກ້ໄຂຄວາມທຸກຍາກ, ມາຮອດປະຈຸບັນປະຊາຊົນບ້ານປາກຊຸນ 80 ຄອບຄົວ ໄດ້ຢຶດຖືການຕ່ຳຫູກ ເປັນອາຊີບເສີມ ສາມາດສ້າງລາຍຮັບປີໜຶ່ງປະມານ 651.080.000 ກີບຕໍ່ຄອບຄົວ ແລະ ສະເລ່ຍປະມານ 7.800.000 ກີບ/ແຮງງານ/ປີ. ມາຮອດປະຈຸບັນສາມາດເກັບກຳສະຖິຕິການຜະລິດໄດ້ 4.276 ຜືນ, ໃນນັ້ນສ່ວນຫຼາຍເເມ່ນຜະລິດເປັນສິ້ນຝ້າຍ ແລະ ສິ້ນໄໝ, ແພບ່ຽງ ເຊິ່ງມີລວດລາຍ​ເອກ​ະຫຼັກແບບທ້ອງຖິ່ນ , ສ່ວນລາຄາຂາຍສິ້ນໄໝ 2-3 ແສນກີບຕໍ່ຜືນ, ສ່ວນຫຼາຍເເມ່ນຈຳໜ່າຍຢູ່ຕະຫຼາດເມືອງປາກກະດິງ.

      ທ່ານ ຄອນສະຫວັນ ສຸກຂະເສີມ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງ ໄດ້ລາຍງານໃນໂອກາດປະກາດຮັບຮອງເອົາກຸ່ມຫັດຖະກຳຕໍ່າຫູກລາຍເມີ້ຍປະຍຸກບ້ານປາກຊຸນ ເປັນປ້າຍກາໝາຍສິນຄ້າໜຶ່ງເມືອງ ໜຶ່ງຜະລິດຕະພັນ (ODOP) ໃຫ້ຮູ້ວ່າ: ນັບແຕ່ປີ 2008-2018 ພະແນກອຸດສາຫະກຳ ແລະ ການຄ້າແຂວງ ໄດ້ສົມທົບກັບຫ້ອງການອຸດສາຫະກຳ ແລະ ການຄ້າເມືອງ ແລະ ຂະແໜງການທີ່ກ່ຽວຂ້ອງ ໄດ້ພ້ອມກັນລົງເຄື່ອນໄຫວຊຸກຍູ້ສົ່ງເສີມໃຫ້ມີການຜະລິດເປັນສີນຄ້າຫຼາຍປະເພດ ແລະ ໄດ້ມີການຈັດຕັ້ງເປັນກຸ່ມຜະລິດເປັນສີນຄ້າຊື້-ຂາຍ ເຫັນວ່າ ມາຮອດປະຈຸບັນລວມມີ 13 ກຸ່ມຫົວໜ່ວຍຜະລິດເປັນສິນຄ້າ ໂອດັອບພາຍໃນແຂວງບໍລິຄຳໄຊ ແລະ ໄດ້ຮັບການນຳໃຊ້ກາໝາຍ (ODOP) ແຫ່ງຊາດ 7 ຫົວໜ່ວຍ, ໃນຕໍ່ໜ້າໄດ້ກຳນົດແຜນຊຸກຍູ້ສົ່ງເສີມຫົວໜ່ວຍທີ່ເຂັ້ມແຂງມີທ່າແຮງຕາມເງື່ອນໄຂໃຫ້ໄດ້ຮັບການນຳໃຊ້ກາໂອດັອບ ແຫ່ງຊາດຕື່ມອີກ 2-3 ຫົວໜ່ວຍຕໍ່ປີ. ເຖີງຢ່າງໃດກໍ່ຕາມ ທາງພັກ - ລັດເຮົາແມ່ນໄດ້ສືບຕໍ່ຊຸກຍູ້ສົ່ງເສີມກຸ່ມຜະລິດເປັນສິນຄ້າ ລວມທັງວິສາຫະກິດຂະໜາດນ້ອຍ ແລະ ຂະໜາດກາງທີ່ເຮັດການຜະລິດເປັນສິນຄ້າຕື່ມອີກ.