ໃນວັນທີ່ 5 ທັນວາ 2018 ນີ້ ທ່ານ ຕົ່ງເຢີ່ທໍ່ ອະດີດຮອງປະທານສູນກາງແນວລາວສ້າງຊາດ ໄດ້ລົງຊຸກຍູ້ຕິດຕາມການຊື້ - ຂາຍຢາງພາລາຢູ່ບ້ານນາໂອ ເມືອງບໍລິຄັນ ແຂວງບໍລິຄຳໄຊ ໂດຍໃຫ້ກຽດເຂົ້າຮ່ວມ ແລະ ພາທາງຂອງທ່ານ ຄໍາດີ ທິບລໍາພັນ ຮອງປະທານແນວລາວສ້າງຊາດແຂວງ, ມີພະນັກງານແນວລາວສ້າງຊາດເມືອງ, ຫົວໜ້າກຸ່ມຊື້ - ຂາຍຢາງພາລາຕະຫຼອດຮອດພໍ່ແມ່ປະຊາຊົນພາຍໃນບ້ານ ເຂົ້າຮ່ວມ.

   

     ຈຸດປະສົງ ທີ່ທ່ານລົງມາໃນຄັງນີ້ ແມ່ນເພື່ອຕິດຕາມການຊື້ການຂາຍຢາງພາລາ ຂອງພໍ່ແມ່ປະຊາຊົນຢູ່ເຂດດັ່ງກ່າວ ໃຫ້ມີຄວາມຖືກຕ້ອງສອດຄ່ອງກັບແນວທາງນະໂຍບາຍຂອງພັກ - ລັດ ບໍ່ເອົາລັດເອົາປຽບເຊີ່ງກັນແລະ ກັນ ລະຫວ່າງ ຜູ້ຊື້ ກັບ ຜູ້ຂາຍ ເຮັດໃຫ້ພໍ່ແມ່ປະຊາຊົນຢູ່ເຂດດັ່ງກ່າວມີລາຍຮັບເຂົ້າສູ່ຄອບຄົວສູງຂື້ນ.

    ໂອກາດດັ່ງກ່າວ ທ່ານອະດີດຮອງປະທານສູນກາງແນວລາວສ້າງຊາດ ຍັງໄດ້ແນະນໍາໃຫ້ຫົວໜ້າກຸຸ່ມ ແລະ ພໍ່ແມ່ປະຊາຊົນ ຈົ່ງຮັກສາຄວາມສາມັກຄີພາຍໃນກຸ່ມໃຫ້ເປັນປຶກແຜ່ນແໜ້ນໜາ ພ້ອມກັນບົວລະບັດ ປົກປັກຮັກສາສວນຢາງໃຫ້ໄດ້ຮັບໜາກຜົນຫຼາຍຂື້ນ ພ້ອມກັນສ້າງສາພັດທະນາຄອບຄົວຂອງຕົນ ໃຫ້ຮັ່ງມີຂື້ນເປັນກ້າວໆ ຈົນກາຍເປັນຄອບຄົວຕົວແບບດ້ານການພັດທະນາ.