ໃນວັນທີ 30 ພະຈິກ 2018 ຜ່ານມາການນຳຂອງເມືອງວຽງທອງ, ແຂວງ ບໍລິຄໍາໄຊ ໄດ້ຈັດພິທິສະເຫຼີມສະຫຼອງງານບູນກີນຈຽງ ( ນໍ່ເປ້ຈໍ່ ) ຂອງເຜົ່າມົ້ງ ໂດຍເປັນກຽດເຂົ້າຮ່ວມຂອງ ທ່ານ ວົງສີ ທອງສີອິນທິປັນຍາ ກໍາມະການພັກແຂວງ, ເລຂາພັກເມືອງ, ເຈົ້າເມືອງວຽງທອງ, ທ່ານ ເນັ້ງ ນູລໍວ່າງ ອາດີດການນໍາຂັ້ນເມືອງ, ມີຄະນະພັກຂັ້ນເມືອງ, ຫົວໜ້າຫ້ອງການ, ຮອງຫ້ອງການ, ພະນັກງານບໍານານ, ຫົວໜ້າຊິງຊາວ, ພະນັກງານ-ລັດຖະກອນ, ຊາຍໜຸ່ມ, ຍິງສາວ ແລະ ແຂກຖືກເຊີນ ເຂົ້າຮ່ວມ.

   ທ່ານ ສົມໃຈ ຊົງລ່າວ່າງ ຮອງເລຂາພັກເມືອງ, ປະທານແນວລາວສ້າງຊາດເມືອງວຽງທອງ ໄດ້ໃຫ້ກຽດຂຶ້ນເລົ່າ​ປະຫວັດ​ຄວາມ​ເປັນ​ມາຂອງ​ງານ​ບຸນກີ​ນຈຽງ​ເຜົ່າ​ມົ້ງ ວ່າ:  ຊົນ​ເຜົ່າ​ມົ້ງ ​ເປັນ​ຊົນ​ເຜົ່າໜື່ງ​ໃນ 49 ຊົນ​ເຜົ່າ​ຂອງ​ລາວ ​ຈັດ​ຢູ່​ໃນ​ໝວດພາສາ​ມົ້ງ - ອີ​ມຽນ, ມີ​ປະຫວັດ​ຄວາມ​ເປັນ​ມາ​ອັນ​ຍາວ​ນານ​ ຄ້າຍຄື​ກັບ​ຊົ​ນ​ເຜົ່າ​ອື່ນໆ, ມີ​ພາສາ​ຂຽນ​ເປັນ​​ເອກະລັກຂອງ​ຕົນ​ເອງ, ສ່ວນ​ພາສາ​ປາກ​ເວົ້າ​ ມີ​ຄວາມ​ແຕກ​ຕ່າງ​ກັນ​ບາງ​ເລັກໜ້ອຍ ​ແຕ່​ສາມາດ​ເຂົ້າ​ໃຈ​ເຊິ່ງ​ກັນ ​ແລະ ​ກັນໄດ້, ມີ​ເອກະລັກ​ທາງ​ດ້ານ​ຮີດຄອງ​ປະ​ເພນີ​ ທາງດ້ານຄວາມ​ເຊື່ອ​ຖືວັດທະນາ​ທຳ​ຂອງ​ຕົນ​ເອງ​ໄວ້​ໃຫ້​ແກ່ລຸ້ນລູກ - ລຸ້ນຫຼານຈົນ​ເຖີງ​ທຸກ​ວັນນີ້ ​ເຊັ່ນ: ​ເຊື່ອ​ຖື​ຜີ​ເຮືອນ, ​ເຊື່ອ​ຖື​ຜູ້​ເປັນ​ພໍ່, ​ເປັນ​ແມ່ ​ແລະ​​ ບັນພະ​ບູລຸດ. ການຈັດງານ​ບຸນກີ​ນຈຽງຂອງ​ຊົນ​ເຜົ່າ​ມົ້ງ ​ຈຸດປະສົງ ​ກໍ່​ເພື່ອ​ເປັນ​ການສະ​ເຫຼີມສະຫຼອງຜົນການ​ຜະລິດ​ໃນ​ຮອບ​ປີ, ​ເປັນ​ການ​ຟື້ນຟູເຜີຍ​ແຜ່​ຮີດຄອງ​ປະ​ເພນີ ​ແລະ​ ວັດທະນະທຳ​ອັນ​ດີ​ງາມ​ຂອງ​ຕົນ, ​ເປັນ​ການ​ສົມ​ມາຄະ​ລະ​ວະຕໍ່ຜູ້​ອາວຸ​ໂສ, ຜູ້​ເປັນ​ພໍ່​ເປັນ​ແມ່ ​ແລະ ​ຜູ້ນຳ​ພາ​ໃນ​ຕະກຸນ, ​ເປັນ​ໂອກາດ​ເຕົ້າ​ໂຮມ​ພໍ່​ແມ່, ຍາດຕິ​ພີ​ນ້ອງ​ທັງ​ໃກ້ ​ແລະ​ ໄກ ​ເພື່ອ​ໄປ - ມາ​ຢ້ຽມຢາມ​ພົບ​ປະ​ສ້າງສັນຄວາມ​ສາມັກຄີ ​ແລະ​ ຮູ້​ບຸນຄຸນ​ເຊິ່ງ​ກັນ ​ແລະ ​ກັນ, ອີກ​ຢ່າງໜື່ງ​ ກໍ່ເພື່ອ​ເປັນ​ການ​ສ້າງ​ໂອກາດ​ໃຫ້​ພໍ່​ແມ່​ໄດ້​ເລືອກລູກໄພ້, ​ເລືອກລູກເຂີຍ ຫຼື ຊາຍໝຸ່ມ - ຍິງສາວ​ໄດ້​ເລືອກ​ຄູ່​ຊີວິດ​ຂອງ​ຕົນ ​ ທັງ​ເປັນ​ການ​ເອ້ຢ້ອງ​ ທີ່ສະ​ແດງ​ເຖີງສີ​ລະ​ປະ​ວັນນະຄະດີ​ຂອງ​ຕົນ ​ໃຫ້​ຊົນ​ເຜົ່າ​ອື່ນ​ໄດ້​ຮັບ​ຮູ້, ໃນ​ງານ​ຍັງ​ໄດ້​ມີ​ການໂຍນ​ໝາກ​ຄອນ​​ ແລະ ຮັບ​ຊົມ​ສີ​ລະ​ປະ​ຂອງ​ຊົນ​ເຜົ່າ​ມົ້ງຢ່າງ​ມ່ວນ​ຊື່ນ.

ທ່ານ ເຈົ້າເມືອງ ກໍ່ໄດ້ມີຄໍາຄິດເຫັນຕໍ່ພິທີ ໂດຍ ທ່ານ ໄດ້ຍ້ອງຍໍຊົມເຊີຍ ຕໍ່ບັນດາທ່ານເຈົ້າກົກ ເຈົ້າເຫລົ່າ ຫົວໜ້າຊີງຊາວ ແລະ ພໍ່ແມ່ປະຊາຊົນຊາວເຜົ່າມົ້ງ ທີ່ໄດ້ມີຄວາມສາມັກຄີ ເປັນນ້ຳໜຶ່ງໃຈດຽວ ຮັກສາມຸນເຊື້ອຮີດຄອງປະເພນີ ແລະ ວັດທະນະທຳອັນດີງາມນີ້ໄວ້ມາຍາວນານ ໃຫ້ເຊັ່ນລູກ ເຊັ່ນຫລານ ໄດ້ຮຽນຮູ້ເອົາເປັນແບບຢ່າງ ແລະ ຮັກສາໄດ້ຈົນຮອດປະຈຸບັນ, ທ່ານ ຍັງໄດ້ຮຽກຮ້ອງມາຍັງພີ່ນ້ອງເຜົ່າມົ້ງ ແລະ ປະຊາຊົນບັນດາເຜົ່າ ຈົ່ງໄດ້ປົກປັກຮັກສາ ແລະ ເສີມຂະຫຍາຍມຸນເຊື້ອຮີດຄອງ ແລະ ວັດທະນະທຳອັນດີເລີດຂອງຕົນນີ້ ໄວ້ໃຫ້ຢູ່ຄູ່ຕົນ ຕະຫລອດໄປ.