ໃນຕອນເຊົ້າວັນທີ 05 ທັນວາ 2018 ນີ້ ຢູ່ທີ່ສະໂມສອນບ້ານ ສີສະຫວາດ ເມືອງ ບໍລິຄັນ ໄດ້ຈັດພິທີປະຖະກະຖາມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ໂດຍໃຫ້ເປັນປະທານ ແລະ ປະຖະກະຖາຂອງທ່ານ ພັນເອກ ອຸ່ນເຮືອນ ສີຈັນເດືອນ ຮອງເລຂາຄະນະພັກ ຫົວໜ້າການທະຫານກອງພັນໃຫຍ່ 642, ມີອໍານາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນພາຍໃນບ້ານ ເຂົ້າຮ່ວມຮັບຟັງ.

     ຈຸດປະສົງການລົງເລົ່າມູນເຊື້ອໃນຄັ້ງນີ້ ກໍ່ເພື່ອເຮັດໃຫ້ອຳນາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນບັນດາເຜົ່າ ໄດ້ມີຄວາມຮັບຮູ້ ເຂົ້າໃຈຕໍ່ປະຫວັດສາດມູນເຊື້ອຂອງຊາດ, ຂອງພັກ, ຂອງກອງທັບຢ່າງເລິກເຊີ່ງ, ມີຄວາມອຸ່ນອຽນທຸ່ນທ່ຽງ, ເຊື້ອໝັ້ນຕໍ່ການນໍາພາຂອງພັກ - ລັດ ແລະ ຮູ້ບຸນຄຸນຕໍ່ບັນພະບູລຸດ ແລະ ບັນດານັກຮົບປະຕິວັດ ທີ່ໄດ້ນຳພາການຕໍ່ສູ້ກູ້ຊາດ ຍອມເສຍສະຫລະຊີວິດ ເພື່ອກອບກູ້ເອົາຄວາມເປັນເອກະລາດ ຜືນແຜ່ນດີນອັນຄົບຖ້ວນ ມາໃຫ້ປວງຊົນລາວ ທີ່ເປັນເຈົ້າຂອງຢ່າງແທ້ຈີງ ເໝືອນທຸກວັັນນີ້.

 

    ທ່ານ ປະທານ ຍັງໄດ້ຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າພາຍໃນບ້ານ ແລະ ທຸກຖ້ວນໜ້າ ໃຫ້ມີຄວາມອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ, ເຄົາລົບລະບຽບກົດໝາຍຂອງລັດ, ພ້ອມກັນປະກອບສ່ວນຢ່າງຕັ້ງໜ້າເຂົ້າໃນວຽກງານປ້ອງກັນຊາດ - ປ້ອງກັນຄວາມສະຫງົບ ເພື່ອປົກປັກຮັກສາໝາກຜົນຂອງການປະຕິວັດນີ້ ແລະ ສ້າງສາພັດທະນາປະເທດຊາດ ພັດທະນາຄອບຄົວ ໄປພ້ອມໆກັນ ຮັກສາໄດ້ຄໍາຂັວນທີ່ວ່າ: ກອງທັບຄືປາ ປະຊາຊົນຄືນໍ້າ ທີ່ບໍ່ສາມາດຕັດແຍກອອກຈາກກັນໄດ້.