ພິທີສະເຫຼີມສະຫຼອງວັນສ້າງຕັ້ງສະຖານີວິທະຍຸ ເມືອງຄໍາເກີດ ຄົບຮອບ 28 ປີ ໄດ້ຈັດຂື້ນຢູ່ສູນວັດທະນະທໍາເດັກຂອງເມືອງ ໃນວັນທີ່ 5 ທັນວາ ປີ 2018 ເປັນກຽດເຂົ້າຮວ່ມຂອງ ທ່ານ ກີ່ ຊົງລະຫວ່າງ ຮອງເຈົ້າເມືອງຄໍາເກີດ, ທ່ານ ອຸດອນ ສອນສຸລິນ ຮອງພະແນກ ຖວທ ແຂວງບໍລິຄຳໄຊ, ທ່ານຫົວໜ້າຫ້ອງການ ຖວທ ເມືອງ, ແຂກຖືກເຊີນຈາກຫ້ອງການອ້ອມຂ້າງ ພ້ອມດ້ວຍພະນັກງານລັດຖະກອນພາຍໃນ ເຂົ້າຮ່ວມ.

 

      ທ່ານ ນາງ ຕີມວັນ ສຸລິຂັນ  ຫົວໜ້າ ຫ້ອງການ ຖວທ ເມືອງຄໍາເກີດ ໄດ້ຍົກໃຫ້ເຫັນປະຫວັດ ແລະ ຄວາມເປັນມາຂອງການສ້າງຕັ້ງວິທະຍຸເມືອງຄໍາເກີດວ່າ: ສະຖານີວິທະຍຸເມືອງຄໍາເກີດໄດ້ຮັບການສ້າງຕັ້ງຂື້ນໃນວັນທີ່  4 ທັນວາ 1990 ຈຸດປະສົງ ເພື່ອໂຄສະນາວຽກງານການເມືອງແນວຄິດ ແຜນພັດທະນາເສດຖະກິດ - ສັງຄົມ ຂອງປະຊາຊົນພາຍໃນເມືອງຄໍາເກີດ ໂດຍພາຍໃຕ້ການຊີ້ນໍາຂອງບໍລິສັດພູດອຍ ( ຫຼັກຊາວ), ຜ່ານການຈັດຕັ້ງປະຕິບັດ ໄດ້ເຮັດໃຫ້ວຽກງານໂຄສະນາແນວທາງນະໂຍບາຍຂອງພັກ - ລັດນັ້ນ ລົງສູ່ປະຊາຊົນຢ່າງທົ່ວເຖີງ ໄດ້ເຮັດໃຫ້ປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈ ຕໍ່ແນວທາງນະໂຍບາຍຂອງພັກ ໃນການຫັນເມືອງຄໍາເກີດ ເປັນເມືອງເສດຖະກິດທາງຜ່ານ, ບໍລິການສິນຄ້າອອກສູ່ຊາຍແດນເບື້ອງຕາເວັນອອກ ສສ ຫວຽດນາມ  ແລະ ກາຍເປັນເມືອງຍຸດທະສາດແນວຫຼັງຮອບດ້ານ. ຕໍ່ຜົນງານດັ່່ງກ່າວນັ້ນ ໄດ້ເຮັດໃຫ້ວິທະຍຸເມືອງຄໍາເກີດ ໄດ້ຮັບການພັດທະນາຂື້ນເປັນກ້າວໆ ແລ້ວກ້າວຂື້ນສູ່ການສ້າງຕັ້ງສະຖານີ ໂທລະພາບ ຂື້ນອີກ, ແຕ່ຍ້ອນການພັດທະນາດ້ານເຕັກໂນໂລຊີ ຂໍ້ມູນຂ່າວສານໃນປະຈຸບັນ ລະບົບອານາລ໋ອກໄດ້ຮັບຜົນກະທົບ ບໍ່ມີຜູ້ຮັບຊົມ ຈື່ງໄດ້ປິດການນໍາໃຊ້ສະຖານີໂທລະພາບໄປໃນຕົວ, ແຕ່ວິທະຍຸ ກໍ່ໄດ້ສືບຕໍ່ພັດທະນາຢ່າງຕໍ່ເນື່ອງ, ມາຮອດປີ 2000 ໄດ້ສິ້ນສຸດການຄຸ້ມຄອງຈາກບໍລິສັດພູດອຍ ສະຖານີວິທະຍຸເມືອງຄໍາເກີດ ກໍ່ໄດ້ໂອນຄວາມຮັບຜິດຊອບໃນການຊີ້ນໍາ - ນໍາພາໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ມອບໃຫ້ພະແນກ ຖວທ ແຂວງບໍລິຄໍາໄຊ ເປັນຜູ້ສືບຕໍ່ໃນການຊີ້ນໍາ - ນໍາພາ, ມາຮອດປະຈຸບັນ ສະຖານີວິທະຍຸເມືອງຄໍາເກີດໄດ້ເຮັດໜ້າທີ່ການເມືອງຂອງພັກ ດ້ວຍການໂຄສະນາແຜນພັດທະນາເສດຖະກິດ - ສັງຄົມຂອງລັດ ໄດ້ຢ່າງກວ້າງຂວາງ, 1 ປີຜ່ານມາ ໄດ້ລົງເກັບກໍາຂ່າວໄດ້ 128 ຂ່າວ, ອອກອາກາດໄດ້ 1447 ຊົ່ວໂມງ ແລະ ສົ່ງຂ່າວໃຫ້ສື່ຂອງແຂວງໄດ້ 140 ຂ່າວ.