ກອງປະຊຸມແລກປ່ຽນບົດຮຽນວຽກງານໂຄສະນາ ລະຫວ່າງ ຄະນະໂຄສະນາອົບຮົມແຂວງບໍລິຄຳໄຊ ແລະ ຄະນະໂຄສະນາສຶກສາແຂວງຮ່າຕິ້ງ ໄດ້ຈັດຂຶ້ນ ໃນຕອນເຊົ້າຂອງວັນທີ 05 ທັນວາ 2018 ຢູ່ທີ່ຫ້ອງປະຊຸມເບີ 02 ຂອງແຂວງບໍລິຄຳໄຊ, ແຂວງບໍລິຄຳໄຊນຳໂດຍທ່ານນາງ ພອນໄຊ ເລືອງມີໄລ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະ, ແຂວງຮ່າຕິ່ງນຳໂດຍທ່ານ ຮວ່າງຈຸງຢຸ້ງ ຄະນະປະຈຳພັກແຂວງ ຫົວໜ້າຄະນະໂຄສະນາສຶກສາແຂວງ ພ້ອມດ້ວຍຄະນະ.

         

     ເພື່ອສືບຕໍ່ເສີມຂະຫຍາຍ ແລະ ເພີ່ມທະວີສາຍພົວພັນຮ່ວມມືແບບພິເສດ ລະຫວ່າງສອງຝ່າຍໃຫ້ກ້າວຂຶ້ນສູ່ບາດກ້າວໃໝ່ ບົນເນື້ອໃນຈິດໃຈແຫ່ງຄວາມເຊື່ອໝັ້ນ, ຈິງໃຈ ແລະ ເຂົ້າອົກເຂົ້າໃຈເຊິ່ງກັນ ແລະ ກັນ, ກອງປະຊຸມຄັ້ງນີ້ ຄະນະຜູ້ແທນທັງສອງຝ່າຍໄດ້ລາຍງານໃຫ້ກັນຊາບ ກ່ຽວກັບສະພາບການພັດທະນາເສດຖະກິດ - ສັງຄົມ, ວຽກງານກໍ່ສ້າງພັກ ແລະ ຂົງເຂດການເມືອງໂດຍຫຍໍ້ ໃນໄລຍະຜ່ານມາ ເຊິ່ງມີທັງດ້ານດີ ແລະ ຂໍ້ຄົງຄ້າງຈຳນວນໜຶ່ງ. ຫຼັງຈາກນັ້ນ ໃນກອງປະຊຸມ ໄດ້ເຫັນດີເປັນເອກະພາບຮ່ວມກັນ ໃນການເຊັນບົດບັນທຶກໃນການຮ່ວມມືລະຫວ່າງສອງແຂວງ ໂດຍມີເນື້ອໃນ ຄື: ສອງຝ່າຍເຫັນດີເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືໃນຂົງເຂດວຽກງານການເມືອງ - ແນວຄິດ ກໍ່ຄືວຽກງານໂຄສະນາອົບຮົມຂອງທັງສອງແຂວງ, ຄະນະໂຄສະນາສຶກສາແຂວງຮ່າຕິ້ງ ເຫັນດີເປັນເສນາທິການນຳສະເໜີຕໍ່ການນຳແຂວງຮ່າຕິ້ງ ໃນການສ້າງເງື່ອນໄຂຊ່ວຍເຫຼືອທຶນ ຍົກລະດັບທາງດ້ານພາສາຫວຽດນາມ, ທິດສະດີ - ການເມືອງ ແລະ ວຽກງານຂໍ້ມູນຂ່າວສານໃຫ້ພະນັກງານໂຄສະນາອົບຮົມແຂວງບໍລິຄຳໄຊ ໂດຍອີງຕາມເງື່ອນໄຂຄວາມສາມາດຕົວຈິງ, ສອງຝ່າຍເຫັນດີເປັນເອກະພາບ ສ້າງທຸກເງື່ອນໄຂອຳນວຍຄວາມສະດວກ ເພື່ອໃຫ້ຄະນະໂຄສະນາອົບຮົມທັງສອງແຂວງ ໄດ້ມີເວລາພົບປະແລກປ່ຽນບົດຮຽນຮ່ວມກັນ ໂດຍການຜັດປ່ຽນການເປັນເຈົ້າພາບ, ພ້ອມນັ້ນ ສອງຝ່າຍຈະສູ້ຊົນຈັດຕັ້ງຜັນຂະຫຍາຍເນື້ອໃນຈິດໃຈບົດບັນທຶກກອງປະຊຸມສະບັບນີ້ ໃຫ້ປະກົດຜົນເປັນຈິງ.