ໃນວັນທີ 30 ພະຈິກ 2018 ສະຫາຍ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ ພ້ອມດ້ວຍຄະນະ ໄດ້ເຂົ້າຮ່ວມງານໂຮມຊຸມນຸມໃຫຍ່ ສະເຫຼີມສະຫຼອງວັນສ້າງຕັ້ງເມືອງວຽງໄຊ - ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ ( 30 ພະຈິກ 1968 - 30 ພະຈິກ 2018 )  ທີ່ໄດ້ຈັດຂຶ້ນຢ່າງຍິ່ງໃຫຍ່ ຢູ່ສະໜາມຫຼວງເມືອງວຽງໄຊ ແຂວງຫົວພັນ.

     

    ໃນງານສະເຫຼີມສະຫຼອງຄັ້ງນີ້ ໃຫ້ກຽດເຂົ້າຮ່ວມໂດຍ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ, ສະຫາຍ ພັນຄຳ ວິພາວັນ ຮອງປະທານປະເທດ ຫົວໜ້າຄະນະຮັບຜິດຊອບການກະກຽມງານສະເຫຼີມສະຫຼອງ ວັນສ້າງຕັ້ງເມືອງວຽງໄຊ - ຖານທີ່ໝັ້ນຂອງການປະຕິວັດລາວ, ມີບັນດາສະຫາຍກົມການເມືອງສູນກາງພັກ, ເລຂາທິການສູນກາງພັກ, ລັດຖະມົນຕີ - ຮອງລັດຖະມົນຕີ, ບັນດາເຈົ້າແຂວງ, ຮອງເຈົ້າແຂວງ, ອົງການຈັດຕັ້ງມະຫາຊົນ, ນັກປະຕິວັດອາວຸໂສບຳນານ, ແຂກຖືກເຊີນ ທັງພາຍໃນ ແລະ ຕ່າງປະເທດ ພ້ອມດ້ວຍມວນຊົນ ເຂົ້າຮ່ວມ.

  ພິທີເລີ່ມດ້ວຍການເດີນສວນສະໜາມ ຂອງບັນດາກ້ອນກຳລັງຈໍານວນ 22 ກ້ອນ ເຊິ່ງເລີ່ມດ້ວຍກ້ອນກຳລັງທຸງຊາດ-ທຸງພັກ, ກາໝາຍເມືອງວຽງໄຊ, ນາງສາວ 9 ເຜົ່າ, ນັກຮົບເກົ່າ, ກອງກຳລັງ ປກຊ, ປກສ, ແນວລາວສ້າງຊາດ, ກຳມະບານ, ແມ່ຍິງບັນດາເຜົ່າ, ຊາວໝຸ່ມປະຊາຊົນປະຕິວັດລາວ, ເຍົາວະຊົນທັນວາ, ເມືອງກວັນ, ເມືອງສົບເບົາ, ເມືອງຊ່ອນ, ເມືອງຊຽງຄໍ້, ເມືອງຊຳໃຕ້, ເມືອງຊຳເໜືອ, ເມືອງຫົວເມືອງ, ເມືອງແອດ, ເມືອງຮ້ຽມ ແລະ ເມືອງວຽງໄຊ. ຈາກນັ້ນ ກໍ່ໄດ້ຮັບຟັງລາຍງານ ກ່ຽວກັບການກະກຽມຄວາມພ້ອມ ງານສະເຫຼີມສະຫຼອງວັນສ້າງຕັ້ງເມືອງວຽງໄຊ-ຖານທີ່ໝັ້ນຂອງການປະຕິວັດລາວ.

   ໃນໂອກາດດັ່ງກ່າວ ສະຫາຍ ບຸນຍັງ ວໍລະຈິດ ໄດ້ໃຫ້ກຽດຂຶ້ນກ່າວສູນທອນພົດ ແລະ ປະດັບຫຼຽນຄຳແຫ່ງຊາດ ໃຫ້ແກ່ເມືອງວຽງໄຊ ເຊິ່ງເປັນຫຼຽນສູງສຸດຂອງລັດຖະບານແຫ່ງ ສປປ ລາວ. ຫຼັງຈາກນັ້ນ ບັນດາທ່ານທີ່ເຂົ້າຮ່ວມ ຍັງໄດ້ຮັບຊົມການສະແດງສິລະປະວັນນະຄະດີ ຈາກນັກຮຽນທີ່ມາຈາກໂຮງຮຽນມັດທະຍົມສົມບູນວຽງໄຊ, ສິລະປະສູນກາງ, ກອງລະຄອນເວົ້າ, ກອງກາຍະສິນສູນກາງ ແລະ ພາກສ່ວນອື່ນໆ ເຊີ່ງທຸກໆລາຍການທີ່ນຳມາສະແດງ ໄດ້ສະທ້ອນໃຫ້ເຫັນເຖິງປະຫວັດສາດຄວາມເປັນມາ ແລະ ມູນ ເຊື້ອການນຳພາຕໍ່ສູ້ກູ້ຊາດຂອງຜູ້ນຳ ແລະ ນັກຮົບປະຕິວັດ ເພື່ອກອບກູ້ເອົາຄວາມເປັນເອກະລາດ ອະທິປະໄຕ ແລະ ຜືນແຜ່ນດີນອັນຄົບຖ້ວນ ມາໃຫ້ປວງຊົນລາວທັງຊາດ ແລະ ນຳເອົາຄວາມສີວິໄລ ຄວາມອຸດົມສົມບຸນ ມາໃຫ້ພໍ່ແມ່ປະຊາຊົນຂອງຕົນ ເໝືອນທຸກວັນນີ້.