ເພື່ອປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາປະຊາຊົນແຂວງ, ທັງເປັນການລົງເຄື່ອນໄຫວເກັບກຳຂໍ້ມູນ ເພື່ອກະກຽມບັນດາເນື້ອໃນໃຫ້ແກ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ I ໃນວັນທີ 28 ພະຈິກ 2018 ທ່ານ ນວນສະຫວັນ ແສງມະນີ ກຳມະການພັກແຂວງ, ຮອງປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ, ເຮັດວຽກ, ຕິດຕາມ-ກວດກາ ແລະ ຊຸກຍູ້ແຜນພັດທະນາເສດຖະກິດ-ສັງຄົມ, ຕິດຕາມການຈັດຕັ້ງປະຕິບັດວຽກງານ ແລະ ເບີ່ງກິດຈະກຳຕ່າງໆ ຂອງໂຄງການກໍ່ສ້າງເຂື່ອນໄຟຟ້າ ນໍ້າງຽບ 1 ຢູ່ບ້ານຈັດສັນ ພູໂຮມໄຊ ເມືອງບໍລິຄັນ.

     ຈຸດປະສົງຂອງການລົງເຄື່ອນໄຫວໃນຄັ້ງນີ້ ກໍ່ເພື່ອລົງຕິດຕາມກວດກາ ບັນດາປະກົດການຫຍໍ້ທໍ້ ແລະ ຢ້ຽມຢາມເບີ່ງຊີວິດການເປັນຢູ່ ຂອງພໍ່ແມ່ປະຊາຊົນບັນດາເຜົ່າຊາວບ້ານຈັດສັນ ພູໂຮມໄຊ ທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າງຽບ 1 ພ້ອມທັງຮັບຟັງການລາຍງານສະພາບລວມໂດຍຫຍໍ້ຈາກນາຍບ້ານດັ່ງກ່າວ. ບ້ານພູໂຮມໄຊ ເປັນບ້ານໜຶ່ງທີ່ຖືກຈັດສັນຈາກໂຄງການກໍ່ສ້າງເຂື່ອນໄຟຟ້າ ນໍ້າງຽບ 1 ເຊິ່ງມີ 83 ຫລັງຄາເຮືອນ, 99 ຄອບຄົວ, ມີ 521 ຄົນ, ຍິງ 255 ຄົນ ປະກອບມີ 2 ຊົນເຜົ່າຕົ້ນຕໍ ຄື: ເຜົ່າມົ້ງ ແລະ ເຜົ່າລາວລຸ່ມ, ປະຊາຊົນສ່ວນໃຫຍ່ຖືອາຊີບເຮັດນາ ແລະ ລ້ຽງສັດ ເປັນຕົ້ນຕໍໍ, ນອກນັ້ນ ໂຄງການຍັງໄດ້ສົ່ງເສີມຝຶກອົບຮົມດ້ານວິຊາຊີບໃຫ້ພໍ່ແມ່ປະຊາຊົນ ເປັນຕົ້ນ: ຮຽນຕັດຫຍິບ, ຊ່າງໄຟຟ້າ, ຊ່າງສ້ອມແປງລົດຈັກ-ລົດໃຫຍ່ ແລະ ອື່ນໆ. ສຳລັບວຽກງານປ້ອງກັນຊາດ-ປ້ອງກັນຄວາມສະຫງົບ ແມ່ນສາມາດປະຕິບັດໄດ້ຢ່າງໜັກແໜ້ນ ປະຊາຊົນມີແນວຄິດອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ, ການຄຸ້ມຄອງຂອງລັດ ຫ້າວຫັນທຳມາຫາກິນ ເຮັດໃຫ້ຊີວິດການເປັນຢູ່ນັບມື້ດີຂຶ້ນເປັນກ້າວໆ.

    ໃນໂອກາດນີ້ ທ່ານຮອງປະທານສະພາປະຊາຊົນແຂວງ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳຕໍ່ພະນັກງານຮາກຖານ, ອໍານາດການປົກຄອງບ້ານ ຕະຫຼອດຮອດປະຊາຊົນບັນດາເຜົ່າ ຈົ່ງຫ້າວຫັນທຳການຜະລິດປູກຝັງລ້ຽງສັດໃຫ້ຫຼາຍຂື້ນກ່ວາເກົ່າ ເພື່ອຕອບສະໜອງໃນການບໍລິໂພກ ແລະ ຂາຍເປັນສິນຄ້າ ສ້າງລາຍຮັບໃຫ້ແກ່ຄອບຄົວ ພ້ອມທັງຊ່ວຍກັນອະນຸລັກປົກປັກຮັກສາປ່າໄມ້ ແລະ ສິ່ງແວດລ້ອມ ໂດຍການຢຸດຕິການເຮັດໄຮ່ເລື່ອນລອຍ ຫັນມາເຮັດນາ ແລະ ລ້ຽງສັດທົດແທນ ເອົາໃຈໃສ່ຮັກສາສຸຂະພາບຂອງແມ່ ແລະ ເດັກ,​ ປະຊາຊົນບັນດາເຜົ່າຕ້ອງຮັດແໜ້ນຄວາມສາມັກຄີ ແລະ ພ້ອມກັນຕ້ານປະກົດການຫຍໍ້ທໍ້ໃນສັງຄົມ, ແຕ່ລະພາກສ່ວນຕ້ອງມີການປະສານສົມທົບເຊິ່ງກັນ ແລະ ກັນ ເພື່ອສຸມໃສ່ໃນການພັດທະນາເສດຖະກິດ-ສັງຄົມ ແລະ ລົບລ້າງຄວາມທຸກຍາກຂອງປະຊາຊົນ. ຫຼັງຈາກນັ້ນ ທ່ານຮອງປະທານສະພາປະຊາຊົນແຂວງ ພ້ອມດ້ວຍຄະນະ ຍັງໄດ້ລົງກວດກາເບີ່ງຕົວຈິງຂອງສູນສາທິດ ໃຫ້ພໍ່ແມ່ປະຊາຊົນໄດ້ຮຽນຮູ້ເຖິງວິທີການລ້ຽງ-ການປູກ ແລະ ພື້ນທີ່ທຳການຜະລິດຂອງປະຊາຊົນເຂດບ້ານພູໂຮມໄຊ.