ກອງປະຊຸມເຜີຍແຜ່ເຊື່ອມຊືມດໍາລັດຂອງລັດຖະບານ ສະບັບເລກທີ 348/ລບ ລົງວັນທີ 16 ພະຈິກ 2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ໄດ້ຈັດຂຶ້ນໃນວັນທີ 26 ພະຈິກ 2018 ຢູ່ຫ້ອງປະຊຸມຊັ້ນ 3 ຫ້ອງວ່າການປົກຄອງເມືອງຄຳເກີດ ໃຫ້ກຽດເຂົ້າຮ່ວມເປັນປະທານໂດຍ ທ່ານ ແດນປີ ມູນທະດີ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ ທັງເປັນຫົວໜ້າຄະນະຊີ້ນໍາວຽກງານກໍ່ສ້າງຮາກຖານການເມືອງ - ພັດທະນາຊົນນະບົດຮອບດ້ານແຂວງບໍລິຄຳໄຊ, ທ່ານ ວັນວິໄລ ແດນພູຫຼວງ ຄະນະປະຈຳພັກແຂວງ ເລຂາພັກເມືອງ ເຈົ້າເມືອງຄຳເກີດ, ມີຄະນະປະຈຳພັກເມືອງ, ກໍາມະການພັກເມືອງ ແລະ ຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.

     ກອງປະຊຸມ ໄດ້ເຜີຍແຜ່ບົດແນະນໍາການປະເມີນເມືອງເຂັ້ມແຂງ 5 ດ້ານ ແລະ ການປະເມີນເປັນຫົວໜ່ວຍພັດທະນາຕາມ 4 ດ້ານຂອງບ້ານ, ຄຳແນະນໍາ ສະບັບເລກທີ່ 0830/ກປ ລົງວັນທີ 6 ເມສາ 2018 ກ່ຽວກັບການຈັດຕັ້ງປະຕິບັດດຳລັດ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ, ແນະນໍາຄູ່ມືການສຳພາດເກັບກຳຂໍ້ມູນ ແລະ ສ້າງຄວາມເຂົ້າໃຈຕໍ່ແບບຟອມ ຂອງດຳລັດ 348/ລບ.

   ພ້ອມກັນນັ້ນ ບັນດາທ່ານທີ່ເຂົ້າຮ່ວມກອງປະຊຸມໃນຄັ້ງນີ້ ຍັງໄດ້ປະກອບຄໍາຄິດຄຳເຫັນຢ່າງກົງໄປກົງມາ ເພື່ອເຮັດໃຫ້ແບບຟອມ ແລະ ວິທີການຈັດຕັ້ປະຕິບັດ ຖືກຕ້ອງສອດຄ່ອງ ກັບເນື້ອໃນຈິດໃຈຂອງດຳລັດວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ທັງນີ້ ກໍ່ເພື່ອເຮັດໃຫ້ບັນດາກະຊວງ, ອົງການທຽບເທົ່າຂັ້ນສູນກາງ ແລະ ອົງການປົກຄອງທ້ອງຖິ່ນ ມີຄວາມຮັບຮູ້ເຂົ້າໃຈຢ່າງຖືກຕ້ອງ ແລະ ເອກະພາບກັນ ໃນຂອບເຂດທົ່ວປະເທດ ໃນການຈັດຕັ້ງຜັນຂະຫຍາຍມາດຕະຖານພົ້ນທຸກ ແລະ ມະຕະຖານພັດທະນາ ໃຫ້ແທດເໜາະກັບຈຸດພິເສດ ແລະ ລະດັບການພັດທະນາເສດຖະກິດ - ສັງຄົມຂອງແຕ່ລະທ້ອງຖິ່ນ.