ໃນວັນທີ່ 29 ພະຈິກ 2018 ນີ້, ກອງພັນໃຫຍ່ 642 ໄດ້ຈັດພິທີປາຖະກະຖາ ມູນເຊື້ອວັນສ້າງຕັ້ງເມືອງວຽງໄຊ ຄົບຮອບ 50 ປີ ( 30/11/1968-30/11/2018 ) ໃຫ້ກຽດເຂົ້າຮ່ວມເປັນປະທານ ແລະປາຖະກະຖາໂດຍ ທ່ານ ພັນເອກ ອຸ່ນເຮືອນ ສີຈັນເດືອນ ຮອງເລຂາຄະນະພັກ ຫົວໜ້າການທະຫານກອງພັນໃຫ່ຍ, ມີຄະນະພັກ - ຄະນະບັນຊາກອງພັນໃຫຍ່, ກອງພັນນ້ອຍ ກອງຮ້ອຍຂື້ນກັບ ຕະຫຼອດຮອດພະນັກງານ - ນັກຮົບໃນກົມກອງ ເຂົ້າຮ່ວມ.

   ທ່ານ ພັນເອກ ອຸ່ນເຮືອນສີ ຈັນເດືອນ ໄດ້ຍົກໃຫ້ເຫັນເຖີງປະຫວັດມູນເຊື້ອ ການກໍາເນີດເຕີບໃຫຍ່ຢ່າງເຂັ້ມແຂງ ທີ່ມີຄວາມໝາຍສໍາຄັນອັນຍາວນານຂອງການປະຕິວັດ ວັນສ້າງຕັ້ງເມືອງວຽງໄຊ ຖານທີ່ໝັ້ນຂອງການປະຕິວັດ ນັບແຕ່ປີ 1946-1954, ບົນເສັ້ນທາງອັນລະອິດລະອ້ຽວ ພາຍໃຕ້ການນໍາພາຂອງພັກປະຊາຊົນປະຕິວັດລາວ ໂດຍໄດ້ວາງແນວທາງທີ່ຖືກຕ້ອງສະຫຼາດສ່ອງໃສ ບົນແນວທາງຕໍ່ຕ້ານຂອງການປະຕິວັດລາວ, ປຸກລະດົມຂົນຂວາຍ, ນໍາພາກໍ່ສ້າງຖານທີ່ໝັ້ນ, ໃນເດືອນ ເມສາ ປີ1948 ສູນກາງພັກຄອມມູນິດອີນດູຈີນ ຕົກລົງສ້າງຕັ້ງກອງຕະລຸມບອນລາວເໜືອ ໂດຍແມ່ນທ່ານປະທານ ໄກສອນ ພົມວິຫານ ເປັນຜູ້ນໍາພາ ເຊີ່ງມີໜ້າທີ່ກໍ່ສ້າງຮາກຖານການເມືອງ, ຈັດຕັ້ງກຳລັງປະກອບອາວຸດ, ກໍ່ສ້າງຖານທີ່ໝັ້ນຢູ່ເຂດຕາເວັນອອກສ່ຽງເໜືອ ຢູ່ບ້ານລາວຮຸ່ງ ເມືອງຊຽງຄໍ້ ແຂວງຫົວພັນ ແລະ ໄດ້ປະກາດສ້າງຕັ້ງກອງທັບລາວອິດສະຫຼະຂື້ນຢ່າງເປັນທາງການ ໃນວັນທີ 20 ມັງກອນ ປີ 1949. ກໍາລັງປະກອບວາອຸດປະຕິວັດໃນຕອນນັ້ນ ໄດ້ຮັບການກໍ່ສ້າງ ແລະ ຂະຫຍາຍຕົວຢ່າງແຂງແຮງ, ຕົ້ນປີ 1953 ກອງທັບລາວອິດສະຫຼະໄດ້ສົມທົບກັບກອງທະຫານອາສາສະມັກຫວຽດນາມ ເປີດສາກບັ້ນບຸກໂຈມຕີພາກເໜືອຂອງລາວ ປົດປ່ອຍແຂວງຫົວພັນ, ແຂວງຜົ້ສາລີ, ແຂວງຊຽງຂວາງ ແລະ ເຄີ່ງໜື່ງຂອງແຂວງຫຼວງພະບາງ ຕໍ່ກັບໄຊຊະນະດັ່ງກ່າວນັ້ນ ເປັນຂີດໝາຍແຫ່ງບາດກ້າວຂະຫຍາຍຕົວກະໂດດຂັ້ນ ຂອງບັນດາກໍາລັງປະກອບອາວຸດລາວ ເພື່ອນໍາພາປະຊາຊົນ ດໍາເນີນສົງຄາມປົດປ່ອຍຊາດ ຫຼາຍບັ້ນຮົບໄດ້ຮັບໄຊຊະນະ ແຕ່ເໜືອລົງຫາໃຕ້ ເຊີ່ງເດັ່ນກ່ວາໝູ່ ແມ່ນໄຊຊະນະບັ້ນຮົບດຽນບຽນຟູ ທີ່ເປັນຖານທີ່ໝັ້ນຂອງພວກຈັກກະພັດຝຣັ່ງ ຢູ່ ສສ ຫວຽດນາມ ເຮັດໃຫ້ພວກລ່າເມືອງຂື້ນຝຣັ່ງຈໍາຕ້ອງເຊັນສັນຍາເຊີແນວສະຫງົບເສິກກັບອິນດູຈີນ ໃນວັນທີ 21 ກໍລະກົດ 1954, ກອງປະຊຸມເຊີແນວ ໄດ້ຮັບຮູ້ເອກະລາດ ອະທິປະໄຕ ແລະ ຜືນແຜ່ນດີນອັນຄົບຖ້ວນຂອງລາວ, ຝ່າຍປະເທດລາວ ມີກໍາລັງການເມືອງເອກະລາດ, ຖືກກົດໝາຍ, ມີທະຫານ ແລະ ເຕົ້າໂຮມຢູ່ສອງແຂວງຫົວພັນ, ຜົ້ງສາລີ. ສັນຍາເຊີແນວ ເປັນໄຊຊະນະຂອງຂະບວນການຕໍ່ສູ້ຕ້ານພວກລ່າເມືອງຂື້ນຝຣັ່ງໃນອີນດູຈີນ ເຮັດໃຫ້ສະພາບການຢູ່ລາວມີການປ່ຽນແປງ ເຊີ່ງເປັນກາລະໂອກາດດີ ໃຫ້ແກ່ການປະຕິວັດລາວຢ່າງຈະແຈ້ງ ເຮັດໃຫ້ກໍາລັງປະຕິວັດ ນັບມື້ນັບເຕີບໃຫຍ່ຂະຫຍາຍຕົວກ້າວກະໂດດຂັ້ນ ເຂດສອງແຂວງເຕົ້າໂຮມໄດ້ກາຍເປັນສໍານັກງານອົງການຈັດຕັ້ງພັກ ເປັນແນວໂຮມເພື່ອສືບຕໍ່ນໍາພາຊີ້ນໍາການກໍ່ສ້າງກໍາລັງປະຕິວັດ ໃນທຸກດ້ານ, ມາຮອດວັນທີ 30 ພະຈິກ 1968 ສູນກາງພັກ ຈື່ງໄດ້ຕົກລົງສ້າງຕັ້ງເມືອງວຽງໄຊເປັນຖານທີ່ໝັ້ນຂອງການປະຕິວັດລາວ ຈົນມາຮອດປັດຈຸບັນ. ເມືອງວຽງໄຊ ຖານທີ່ໝັ້ນຂອງການປະຕິວັດ ເປັນສູນກາງແຫ່ງການຊີ້ນໍາ - ນໍາພາຮອບດ້ານຂອງພັກ ໃນພາລະກິດປົດປ່ອຍຊາດຢ່າງມີໄຊ, ເປັນບ່ອນກໍ່ສ້າງຂະຫຍາຍກໍາລັງປະກອບອາວຸດ, ກໍ່ສ້າງ ແລະ ປົກປັກຮັກສາຖານທີ່ໝັ້ນຂອງການປະຕິວັດ ເປັນບ່ອນກໍາເນີດຂອງ ສາທາລະນະລັດ ປະຊາທິປະໄຕ ປະຊົນລາວ, ເປັນສູນກາງຊີ້ນໍາຂອງພັກ ຕໍ່ພາລະກິດຕໍ່ສູ້ກູ້ຊາດ ຕ້ານລັດທິລ່າເມືອງຂື້ນແບບເກົ່າ ແລະ ໃໝ່ ຈົນສາມາດປົດປ່ອຍປະເທດຊາດຢ່າງສົມບູນ, ພັກໄດ້ນໍາພາເມືອງວຽງໄຊເປັນລັດໜື່ງ ເປັນແນວຫຼັງທີ່ແກ່ນໝັ້ນ ເພື່ອສໍາເລັດພາລະກິດ ການປະຕິວັດຊາດລາວຕະຫຼອດໄປ.

   ໃນໂອກາດນີ້, ກອງພັນໃຫຍ່ 642 ໄດ້ມອບຫຼຽນກາລະນຶກວັນສ້າງກອງທັບປະຊາຊົນລາວຄົບຮອບ 70 ປີ ໃຫ້ບຸກຄົນຈໍານວນ 283 ຫຼຽນ ແລະ ໄດ້ປະກາດເລື່ອນຊັ້ນ - ເລື່ອນທຽບຊັ້ນ ໃຫ້ພະນັກງານໃນກົມກອງຈໍານວນ 41 ສະຫາຍ, ໃນນັ້ນ ໄດ້ຮັບການເລື່ອນຊັ້ນຮ້ອຍເອກຂື້ນພັນຕີ 3 ສະຫາຍ, ເລື່ອນທຽບຊັ້ນຮ້ອຍເອກຂື້ນພັນຕີ 2 ສະຫາຍ, ເລື່ອນຊັ້ນຮ້ອຍໂທຂື້ນຮ້ອຍເອກ 6 ສະຫາຍ, ເລື່ອນທຽບຊັ້ນຮ້ອຍໂທຂື້ນຮ້ອຍເອກ 2 ສະຫາຍ, ເລື່ອນຮ້ອຍຕີຂື້ນຮ້ອຍໂທ 7 ສະຫາຍ, ເລື່ອນທຽບຊັ້ນຮ້ອຍຕີຂື້ນຮ້ອຍໂທ 9 ສະຫາຍ, ເລື່ອນວາທີຂື້ນຮ້ອຍຕີ 8 ສະຫາຍ ແລະ ເລື່ອນທຽບຊັ້ນວາທີຂື້ນຮ້ອຍຕີ 4 ສະຫາຍ.