ໃນວັນທີ 8  ພະຈິກ 2018 ຢູ່ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໄດ້ຈັດພິທີປາຖະກະຖາ ເມືອງວຽງໄຊ-ຖານທີ່ໝັ້ນການປະຕິວັດລາວ ຄົບຮອບ 50 ປີ (30 ພະຈິກ 1968-30 ພະຈິກ 2018) ໃຫ້ກຽດເຂົ້າຮ່ວມ ແລະ ປາຖະກະຖາໂດຍ ທ່ານ ເຄນ ລໍມະນີ ຫົວໜ້າພະແນກ ຖວທ ແຂວງ  ມີບັນດາຂະແໜງການ, ກອງວິຊາການ ແລະ ພະນັກງານລັດຖະກອນພາຍໃນເຂົ້າຮ່ວມ.

     ໃນພິທີທ່ານປະທານໄດ້ຍົກໃຫ້ເຫັນເຖິງ ຄວາມໝາຍຄວາມສຳຄັນ ແລະ ປະຫວັດຄວາມເປັນມາ ຂອງການສ້າງຕັ້ງເມືອງວຽງໄຊ ທີ່ຕິດພັນກັບທຸກໄລຍະການຕໍ່ສູ້ຕ້ານສັດຕູຕ່າງດ້າວທີ່ເຂົ້າມາຮຸກຮານວ່າ ໃນເດືອນເມສາ 1948 ສູນກາງພັກກອມມູນິດອິນດູຈີນ ຕົກລົງສ້າງຕັ້ງກອງຕະລຸມບອນລາວເໜືອ ໂດຍແມ່ນທ່ານປະທານ ໄກສອນ ພົມວິຫານ ເປັນຜູ້ບັນຊາການ, ມາຮອດວັນທີ 20 ມັງກອນ 1949 ກອງທັບລາວອິດສະຫຼະ ກໍ່ໄດ້ຮັບການສ້າງຕັ້ງຂື້ນ ເອີ້ນວ່າກອງຮ້ອຍລາດຊະວົງ ແລະ ໃນປີ 1950 ພາຍໃຕ້ການນຳພາຂອງພັກ ກໍ່ສາມາດປົດປ່ອຍເອົາ “ແຂວງຫົວພັນ”. ພາຍຫຼັງຫັນທິດຕໍ່ສູ້ ແຕ່ຊຸມປີ 1960 ສູນກາງພັກໄດ້ເລືອກເອົາ “ຕາແສງຊຽງຊື້” ທີ່ຂຶ້ນກັບເມືອງຊຳເໜືອໃນຕອນນັ້ນ ເປັນທີ່ຕັ້ງຍຸດທະສາດສຳຄັນ ແລະ ເປັນທີ່ຕັ້ງຂອງສຳນັກງານໃຫ່ຍສູນກາງ, ໃນກາງປີ 1964 ສູນກາງພັກໄດ້ຍົກຍ້າຍຈາກ “ບ້ານຊຽງຊື້” ມາຢູ່ “ຖ້ຳຜາຫິນ ລ້ອງກູ້-ນາໄກ່”, ໃນວັນທີ 30 ພະຈິກ 1968 ສູນກາງພັກໄດ້ຫັນເອົາ 10 ຕາແສງຂອງເມືອງຊຳເໜືອ ແລະ 1 ຕາແສງຂອງເມືອງໂສຍ ສ້າງເປັນເຂດພິເສດໃຕ້ການຊີ້ນຳໂດຍກົງຂອງສູນກາງພັກ ແລະ ໃນປີດຽວກັນສູນກາງພັກໄດ້ກຳນົດເອົາເຂດນາໄກ່ ເປັນ “ເຂດພິເສດວຽງໄຊ”. ກອງປະຊຸມໃຫ່ຍຄັ້ງທີ II ຂອງພັກ ປີ 1972 ໄດ້ວາງນະໂຍບາຍສ້າງເຂດປົດປ່ອຍ ໃຫ້ການເປັນລັດໜຶ່ງທີ່ເຂັ້ມແຂງ ອັນເຮັດໃຫ້ “ວຽງໄຊ” ກາຍເປັນນະຄອນຫຼວງແຫ່ງການປະຕິວັດ ແລະ ເປັນສູນກາງແຫ່ງການບັນຊາຂະບວນການຕໍ່ສູ້ປົດປ່ອຍຊາດໃນທົ່ວປະເທດ. ພາຍຫຼັງໄດ້ຮັບການປົດປ່ອຍ ເພື່ອໃຫ້ແທດເໝາະກັບເງື່ນໄຂໃໝ່ ໃນຕົ້ນປີ 1976 ສູນກາງພັກຈຶ່ງໄດ້ ໂຮມເອົາເມືອງໂສຍເຂົ້າກັບເຂດພິເສດວຽງໄຊ ມາສ້າງຕັ້ງເປັນ “ເມືອງສຳພັນ” ທີ່ຂຶ້ນກັບແຂວງຫົວພັນ ແລະ ມາເຖິງປີ 1980 ສູງກາງພັກໄດ້ຕົກລົງປ່ຽນຊື່ “ເມືອງສຳພັນ” ມາເປັນ “ເມືອງວຽງໄຊ” ຈົນເຖິງປັດຈຸບັນ.

     ຫຼັງຈາກນັ້ນໃນພິທີຍັງໄດ້ຮັບຟັງການເຜີຍແຜ່ບົດບັນທຶກ ກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍ ຕາມຊາຍແດນລາວ-ໄທ ລະຫວ່າງແຂວງບໍລິຄຳໄຊ-ຈັງຫວັດໜອງຄາຍ ຄັ້ງທີ 12 ວັນທີ 7 ກັນຍາ 2018 ທີ່ຈັງຫວັດໜອງຄາຍ, ຣາຊະອານາຈັກໄທ ເຊິ່ງທັງສອງຝ່າຍເຫັນດີຕົກລົງເປັນເອກະພາບກັນບາງເນື້ອໃນທີ່ສຳຄັນ ເປັນຕົ້ນແມ່ນການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ການອຳນວຍຄວາມສະດວກ ແລະ ຄວາມປອດໄພ ໃນການເຂົ້າ-ອອກເມືອງ, ການຮ່ວມມືໃນການປ້ອງກັນ ແລະ ສະກັດກັ້ນບັນຫາຢາເສບຕິດ,  ການຄຸ້ມຄອງການດຳເນີນກິດຈະກຳຕ່າງໆຕາມລຳນ້ຳຂອງ, ການສົ່ງເສີມການຮ່ວມມືດ້ານແຮງງານ ແລະ ອື່ນໆ.