ເນື່ອງໃນໂອກາດວັນແຫ່ງຊາດຕ້ານຢາເສບຕິດ ຄົບຮອບ 17 ປີ ( 12 ຕຸລາ 2001 – 12 ຕຸລາ 2018 ) ທ້າຍອາທິດທີ່ຜ່ານ ນີ້ ກອງບັນຊາການ ປກສ ເມືອງຄຳເກີດ ແຂວງບໍລິຄຳໄຊ ໄດ້ຈັດພິທີຈູດເຜົາທໍາລາຍຢາເສບຕິດຂຶ້ນ ຢູ່ທີ່ເດີ່ນບິນ ເມືອງຄຳເກີດ, ແຂວງ ບໍລິຄໍາໄຊ ໂດຍການເປັນປະທານຂອງ ທ່ານ ພົນຈັດຕະວາ ຈວງຈັນ ລາດສະວົງ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ ເປັນກຽດເຂົ້າຮ່ວມຂອງທ່ານ ວັນວິໄລ ແດນພູຫຼວງ ຄະນະປະຈຳພັກແຂວງ ເລຂາພັກເມືອງ, ເຈົ້າເມືອງ-ເມືອງຄຳເກີດ,  ມີ ທ່ານ ພັອ ທອງໃບ ລໍວັນໄຊ ກໍາມະການພັກແຂວງ, ເລຂາຄະນະພັກ, ຫົວໜ້າກອງບັນຊາການ ປກສ ແຂວງ, ຮອງປະທານຄະນະກໍາມາການຄວບຄຸມ ແລະ ຕ້ານຢາເສບຕິດແຂວງ, ມີຄະນະປະຈໍາພັກແຂວງ, ອໍານາດການປົກຄອງບ້ານ ແລະ ຂະແໜງການ ທີ່ກ່ຽວຂ້ອງພາຍໃນເມືອງ ເຂົ້າຮ່ວມ.

         

      ທ່ານ ພັນໂທ ດວງໄຊ ຈັນທະວັງໂສ ຮອງຫົວໜ້າກອງບັນຊາການ ປກສ ເມືອງຄຳເກີດ ໄດ້ຂື້ນຜ່ານບົດສະຫລຸບບາງຕອນວ່າ: ເມືອງຄຳເກີດ ແຂວງ ບໍລິຄໍາໄຊ  ເປັນເມືອງໜຶ່ງທີ່ໄດ້ຮັບຜົນກະທົບຈາກການແຜ່ລາມຂອງຢາເສບຕິດ ທີ່ເປັນຕົ້ນເຫດຂອງການກໍ່ເຫດອາດຊະຍາກໍາ, ປຸ້ນຈີ້, ຊິງຊັບ, ອາລະວາດຕີກັນ ເຮັດໃຫ້ສັງຄົມ, ຄອບຄົວ ບໍ່ມີຄວາມສະຫງົບສຸກ, ສະເພາະຢູ່ ເມືອງຄຳເກີດ ໃນໄລຍະ 02 ປີຜ່ານມາ ເຈົ້າໜ້າທີ່ ປກຊ-ປກສ ເມືອງ ສາມາດມ້າງ ແລະ ທຳລາຍຢາເສບຕິດໄດ້ ຄື: ທຳລາຍສວນຄັນຊາໄດ້ຈຳນວນ 168 ສວນ, ເນື້ອທີ 589 ເຮັກຕາ, ທຳລາຍສວນຢາຝີ່ນໄດ້ 33 ສວນ, ມ້າງຄະດີຢາເສບຕິດໄດ້ທັງໝົດ 47 ລາຍ, ຜູ້ຖືກຫາ 57 ຄົນ, ຍິງ 14 ຄົນ, ຢືດຄັນຊາແຫ້ງໄດ້ 2.011 kg, ຢືດຢາຝີ່ນໄດ້ 7,3 kg,  ຍຶດຂອງກາງປະເພດຢາບ້າ 4.245 ເມັດ, ເຮໂຣອິນ 10 ຫຼອດນ້ອຍ, ປືນສັ້ນ 03 ກະບອກ, ປືນແກັບ 8 ກະບອກ, ປືນດັດແປງ 02 ກະບອກ, ລູກປືນ 125 ລູກ, ລົດໃຫຍ່ 07ຄັນ, ລົດຈັກ 09 ຄັນ.

         

   ເພື່ອເປັນການຕ້ານ ແລະ ສະກັດກັ້ນບັນດາປະກົດການຫຍໍ້ທໍ້ທາງສັງຄົມ ທີ່ເກີດມາຈາດໄພຄຸກຄາມຂອງຢາເສບຕິດນັ້ນ ພະແນກສະກັດກັ້ນ ແລະ ຕ້ານຢາເສບຕິດ ປກສ  ເມືອງຄຳເກີດ ແຂວງ ບໍລິຄໍາໄຊ ຈະໄດ້ສຸມໃສ່ວຽກງານໂຄສະນາ-ອົບຮົມເຜີຍແຜ່ຜົນຮ້າຍ ແລະ ໄພອັນຕະລາຍຂອງຢາເສບຕິດໃຫ້ກັບພໍ່ແມ່, ປະຊາຊົນບັນດາເຜົ່າ, ຊາວໜຸ່ມ-ໄວໜຸ່ມ, ນັກຮຽນ-ນັກສຶກສາ, ຫັນເອົາວຽກງານດັ່ງກ່າວຕິດພັນກັບວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ເພື່ອໃຫ້ທຸກພາກສ່ວນມີຄວາມຮັບຜິດຊອບຮ່ວມກັນໃນການແກ້ໄຂ, ປະຕິບັດມາດຕະການລົງໂທດເດັດຂາດຕໍ່ຜູ້ລະເມີດປູກຝິ່ນ, ປູກຄັນຊາ, ຜູ້ລົງທຶນ, ຜູ້ຜະລິດ, ຂົນສົ່ງ-ຮັບຊື້ ແລະ ມີໄວ້ໃນຄອບຄອງ, ຈໍານວນຢາເສບຕິດທີ່ນໍາມາຈູດທໍາລາຍໃນຄັ້ງນີ້ມີຢູ່ 04 ປະເພດທີ່ໄດ້ຜ່ານການແກ້ໄຂດໍາເນີນຄະດີສໍາເລັດແລ້ວມີ ຢາບ້າ 4.245 ເມັດ, ຄັນຊາແຫ້ງ 2.011 ກິໂລກຼາມ, ເຮໂຣອິນ ຈໍານວນ 10 ຫຼອດນ້ອຍ, ຢາຝີ່ນ 7,3 ກິໂລກຼາມ.