ການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນຕົ້ນປີ 2018 ແຂວງບໍລິຄຳໄຊປະຕິບັດໄດ້ລື່ນແຜນຫຼາຍກວ່າ 10% ທ່ານ ຄຳແຫວນ ປັນຍານຸວົງ ຫົວໜ້າພະແນກການເງິນແຂວງ ໄດ້ລາຍງານຕໍ່ກອງປະຊຸມອົງການປົກຄອງແຂວງ ປະຈຳເດືອນຕຸລາ ໃນວັນທີ 6 ພະຈິກ 2018 ຢູ່ຫ້ອງວ່າການປົກຄອງແຂວງ ໂດຍການເປັນປະທານຂອງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ມີບັນດາພະແນກການອ້ອມຂ້າງ, ເມືອງ 7 ຕົວເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

    ທ່ານຫົວໜ້າພະແນກການເງິນໄດ້ລາຍງານວ່າ ໃນໄລຍະທີ່ຜ່ານມາໄດ້ສົບທົບກັບພະແນກການທີ່ກ່ຽວຂ້ອງ ສຸມໃສ່ສຳຫຼວດເກັບກຳຂໍ້ມູນຖານລາຍຮັບຄືນໃໝ່ ແລະ ຂຸດຄົ້ນແຫຼ່ງລາຍຮັບ ຕາມທ່າແຮງບົ່ມຊ້ອນຂອງແຂວງ, ເຂັ້ມງວດປະຕິບັດວິໄນການເງິນ ແລະ ອັດຊ່ອງວ່າງຂອງການຮົ່ວໄຫຼງົບປະມານ ພ້ອມດຽວກັນຍັງໄດ້ເອົາໃຈໃສ່ໃນການບໍລິການ, ຄຸ້ມຄອງກວດກາສິນຄ້າເຂົ້າ-ອອກ ໂດຍການນຳໃຊ້ເຄືອງມືທີ່ທັນສະໄໝ. ຜ່ານການຈັດຕັ້ງຕົວຈິງ 9 ເດືອນຕົ້ນປີ ສາມາດປະຕິບັດຕົວເລກລາຍຮັບເຂົ້າແຜນງົບປະມານແຫ່ງລັດ ໄດ້ 672,61 ຕື້ກີບ, ເທົ່າກັບ 110,08%, ທຽບໃສ່ແຜນການປີ 81,31% ທຽບໃສ່ໄລຍະດຽວກັນເພີ່ມຂື້ນ 21,24 %, ໃນນັ້ນລາຍຮັບພູດສູນກາງ ປະຕິບັດໄດ້ 552,72 ຕື້ກີບ ເທົ່າກັບ 110,35%, ທຽບໃສ່ແຜນການປີ 82,76% ທຽບໃສ່ໄລຍະດຽວກັນ ເພີ່ມຂື້ນ 25,32%. ລາຍຮັບພູດທ້ອງຖິ່ນ ປະຕິບັດໄດ້ 149,89 ຕື້ກີບ ເທົ່າກັບ 109,13%, ທຽບໃສ່ແຜນການປີ 76,61% ທຽບໃສ່ໄລຍະດຽວກັນເພີ່ມຂື້ນ 8,88%. ສຳລັບປັດໄຈທີ່ພາໃຫ້ລາຍຮັບໄດ້ຕາມຄາດໝາຍ ແລະ ລື່ນແຜນ ແມ່ນໄດຮັບຈາກພາສີການນໍາເຂົ້ານໍ້າມັນເຊື້ອໄຟ, ການນໍາເຂົ້າພາຫະນະ, ການນໍາເຂົ້າສິນຄ້າປະເພດອຸປະໂພກ-ບໍລິໂພກ, ການນໍາເຂົ້າສິນຄ້າ ປະເພດເຄື່ອງກໍ່ສ້າງ ແລະ ສິນຄ້າອື່ນໆ. ສຳລັບທິດທາງແຜນການ 3 ເດືອນທ້າຍປີ ທ່ານຫົວໜ້າພະແນກການເງິນ ຍັງໄດ້ລາຍງານໃຫ້ຮູ້ຕື່ມອີກວ່າ ຄາດວ່າບໍລິຄຳໄຊ ຈະສາມາດປະຕິບັດລາຍຮັບພູດສູນກາງ ແລະ ທ້ອງຖິ່ນໄດ້ 218,03 ຕື້ກີບ ແລະ ຄ່າດຄະເນໝົດປີຈະປະຕິບັດໄດ້ 890,65 ຕື້ກີບ, ທຽບໃສ່ແຜນການປີ(ດັດແກ້) ເທົ່າກັບ 108,02% ແລະ ທ່ຽບໃສ່ໄລຍະດຽວກັນກັບປີຜ່ານມາ ເພີ່ມຂຶ້ນ 17,22%.