ໃນລະຫວ່າງວັນທີ01– 02 ພະຈິກ 2018 ນີ້ ຢູ່ທີ່ຫ້ອງການບ້ານໃຫຍ່ທົ່ງນາມີ ເມືອງ ປາກກະດິງ ແຂວງບໍລິຄໍາໄຊ ໄດ້ເປີດຝຶກອົບຮົມວຽກງານ ໃຫ້ກັບ ປກສ ບໍລິການປະຊາຊົນ ແລະ ປກສ  ບ້ານ ຂື້ນຢ່າງເປັນທາງການ ໂດຍພາຍໃຕ້ການເປັນປະທານຂອງ ທ່ານ ພັນໂທ ວົງພະຈັນ ແກ້ວວິຊຽນ ກຳມະການພັກເມືອງ ຫົວໜ້າກອງບັນຊາການ ປກສ ເມືອງປາກກະດິງ, ເປັນກຽດເຂົ້າຮ່ວມໂດຍ ທ່ານ ສົມພອນ ຈັນທະນາສຸກ ກໍາມະການພັກແຂວງ, ເລຂາພັກເມືອງ, ເຈົ້າເມືອງປາກກະດິງ.

         

    ການເປີດບັ້ນຝຶກອົບຮົມໄລຍະສັ້ນ ວຽກງານ ປກສ ບໍລິການປະຊາຊົນ ແລະ ປກສ ບ້ານ ຄັ້ງນີ້ ຜູ້ເຂົ້າຝຶກ ຈະໄດ້ຮັບການເຊື່ອມຊືມ ບັນດາເອກະສານສຳຄັນ ຄື: ຄຳສັ່ງແນະນຳຂອງທ່ານນາຍົກລັດຖະມົນຕີ ສະບັບເລກທີ 27/ນຍ ລົງວັນທີ 05 ຕຸລາ 2011 ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ, ຄໍາສັ່ງຂອງລັດຖະມົນຕີວ່າການກະຊວງ ປກສ ສະບັບເລກທີ 1526/ປກສ ລົງວັນທີ21 ມີນາ 2013 ວ່າດ້ວຍການເພີ່ມທະວີວຽກງານກໍ່ສ້າງຮາກຖານການເມືອງຂອງກຳລັງ ປກສ, ເອກະສານວ່າດ້ວຍການຈັດຕັ້ງເຄື່ອນໄຫວຂອງກຳລັງ ປກສ ບ້ານ, ປກສ ບໍລິການປະຊາຊົນ, ເອກະສານວ່າດ້ວຍການຈົດທະບຽນຄຸ້ມຄອງສຳມະໂນຄົວ ຄົນລາວ ແລະ ຄົນຕ່າງດ້າວ, ເອກະສານວ່າດ້ວຍ ການຄຸ້ມຄອງອາຊີບ-ພາຫະນະພິເສດ, ເອກະສານ ວ່າດ້ວຍການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເອກະສານວຽກງານຄຸ້ມຄອງເປົ້າໝາຍ, ເອກະສານວຽກງານປ້ອງກັນສະຖານທີ່ເກີດເຫດ, ເອກະສານສືບສວນ-ສອບສວນຂັ້ນພື້ນຖານ ພ້ອມນັ້ນຍັງໄດ້ແນະນຳວິທີຈົດກ່າຍປື້ມ 05 ຊະນິດ..

      ຜ່ານການຝຶກອົບຮົມວຽກງານ ປກສ ບໍລິການປະຊາຊົນ ແລະ ປກສ ບ້ານ ເປັນເວລາ 02 ວັນເຕັມ ເຫັນວ່າ ສໍາມະນາກອນ ແມ່ນມີຄວາມຕັ້ງໃຈ ແລະ ເອົາໃຈໃສ່ໃນການຮັບຟັງການບັນຍາຍເອກະສານເປັນຢ່າງດີ ເຊິ່ງສະແດງອອກໃນການປະຕິບັດໂມງເວລາຂອງການຝຶກອົບຮົມ ແລະ ມີການສົນທະນາແລກປ່ຽນກັນລະຫວ່າງສໍາມະນາກອນກັບຄູຝຶກຢ່າງເປັນກັນເອງ ເຮັດໃຫ້ສໍາມະນາກອນເກັບກໍາບົດຮຽນ ແລະ ຫຼັກການຕ່າງໆກ່ຽວກັບວຽກງານໄດ້ດີພໍສົມຄວນ ສາມາດຕີລາຄາຄວາມຮັບຮູ້ໄດ້ ປະມານ 92%.

          ທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ ໄດ້ໃຫ້ກຽດໂອ້ລົມ ແລະ ມີທິດຊີ້ນຳຕໍ່ບັ້ນຝຶກອົບຮົມໃນຄັ້ງນີ້ ເຊິ່ງກ່ອນອື່ນ ທ່ານກໍ່ໄດ້ກ່າວຍ້ອງຍໍຊົມເຊີຍ ຄະນະຮັບຜິດຊອບບັ້ນຝືກອົບຮົມ ແລະ ບັນດາສໍາມະນາກອນ ທີ່ໄດ້ເອົາໃຈໃສ່ໃນການເຜີຍແຜ່ ແລະ ເຊື່ອມຊຶມ ບັນດາເອກະສານທີ່ສໍາຄັນໃນຄັ້ງນີ້ ເຮັດໃຫ້ມີຄວາມເຂົ້າໃຈ ແລະ ເປັນເອກະພາບກັນໃນການຈັດຕັ້ງປະຕິບັດ, ນອກນັ້ນ ທ່ານຍັງໄດ້ຮຽກຮ້ອງໃຫ້ອໍານາດການປົກຄອງບ້ານ, ປກສ ບໍລິການປະຊາຊົນ ແລະ ປກສ ບ້ານ ຈົ່ງພ້ອມກັນປະສານສົມທົບເຮັດວຽກງານຮັກສາຄວາມສະຫງົບ-ຄວາມເປັນລະບຽບຮຽບຮ້ອຍຮ່ວມກັນຢ່າງໜັກແໜ້ນ ແລະ ກົມກຽວ ພາຍໃນເຂດຄວາມຮັບຜິດຊອບຂອງຕົນ ຕາມພາລະບົດບາດ, ສິດ ແລະ ໜ້າທີ່ ທີ່ໄດ້ກໍານົດໄວ້, ນໍາເອົາເນື້ອໃນຈິດໃຈ ຂອງການຝຶກອົບຮົມໄປຜັນຂະຫຍາຍ, ໝູນໃຊ້ເຂົ້າໃນວຽກງານຕົວຈິງໃຫ້ໄດ້ຮັບຜົນດີເປັນກ້າວໆ.