ດ້ວຍຄວາມເປັນຫ່ວງເປັນໄຍຂອງການນຳພັກ-ລັດຂັ້ນເທີງ ຕໍ່ປະຊາຊົນທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ໃນໄລຍະຜ່ານມາ ໃນວັນທີ 1 ພະຈິກ 2018 ນີ້ ອົງການກາແດງແຂວງບໍລິຄໍາໄຊ ແລະ ການນໍາເມືອງປາກກະດິງ ພ້ອມດ້ວຍຄະນະ ນຳໂດຍທ່ານນາງ ໂສພາ ຈັນທະວົງ ຫົວໜ້າອົງການກາແດງ ແຂວງບໍລິຄຳໄຊ ແລະ ທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ ໄດ້ນຳເອົາເຄື່ອງອຸປະໂພກ, ບໍລິໂພກ ປະເພດເຂົ້າສານ ອາຫານສຳເລັດຮູບ ແລະ ເຄື່ອງໃຊ້ຈຳນວນຫນຶ່ງ ລວມມູນຄ່າ 78.900.000 ກີບ ໄປມອບໃຫ້ປະຊາຊົນ 7 ບ້ານ ຢູ່ພາຍໃນເມືອງປາກກະດິງ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມໃນປີ 2018.

     

    ເພື່ອເປັນການບັນເທົາທຸກ ແລະ ໃຫ້ກຳລັງໃຈປະຊາຊົນໂດຍສະເພາະແມ່ນຄອບຄົວທີ່ມີເນື້ອທີ່ທຳການຜະລິດເຂົ້ານາປີຖືກນ້ຳຖ້ວມເສຍຫາຍ ຄື: ບ້ານໂພນທອງ 7 ຄອບຄົວ, ບ້ານຄອນສົງ 15 ຄອບຄົວ, ບ້ານວຽງຄຳ 27 ຄອບຄົວ, ບ້ານນ້ຳສາງ 60 ຄອບຄົວ, ບ້ານໂພນສະຫວາງ 25 ຄອບຄົວ, ບ້ານໜອງບົວ 101 ຄອບຄົວ ແລະ ບ້ານນາບວຍ 59 ຄອບຄົວ ຄະນະນຳອົງການກາແດງແຂວງບໍລິຄຳໄຊ ໂດຍສົມທົບກັບການນຳຂອງເມືອງ ໄດ້ລົງເຄື່ອນໄຫວພົບປະໂອ້ລົພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ເມື່ອລະດູຝົນທີ່ຜ່ານມາ ແລະ ໄດ້ນຳເອົາເຄື່ອງອຸປະໂພກ - ບໍລິໂພກຈຳນວນໜື້່ງ ມາມອບຊ່ວຍເຫລືອບັນເທົາທຸກ ເພື່ອເປັນການແກ້ໄຂບັນຫາໃນເບື້ອງຕົ້ນ.

   

     ໃນການລົງມອບເຄື່ອງຊ່ວຍເຫຼືອຄັ້ງນີ້ທ່ານເຈົ້າເມືອງປາກກະດິງ ຍັງໄດ້ໂອ້ລົມໃຫ້ປະຊາຊົນ ຈົ່ງມີແນວຄິດອຸ່ນອຽງທຸ່ນທ່ຽງ ແລະ ຮຽກຮ້ອງໃຫ້ປະຊາຊົນ ຫັນມາທຳການຜະລິດປູກພືດລະດູແລ້ງ ຂາຍເປັນສິນຄ້າ ເພື່ອເປັນການແກ້ໄຂ ແລະ ພື້ນຟູເສດຖະກິດຄອບຄົວໃຫ້ດີຂື້ນພາຍຫຼັງນ້ຳບົກແຫ້ງ.