ກອງປະຊຸມໃຫຍ່ຄັ້ງທີ່ I ຂອງ 02 ໜ່ວຍພັກ ແລະ ປະກາດແຍກແຕ່ງຕັ້ງໜ່ວຍພັກ ຂອງຮາກຖານພັກຫ້ອງສັນຕິບານ ກອງບັນຊາການ ປກສ ແຂວງ ບໍລິຄຳໄຊ ໄດ້ເປີດຂື້ນຢ່າງເປັນທາງການ ໃນຕອນເຊົ້າວັນທີ 02 ພະຈິກ 2018 ນີ້  ທີ່ຫ້ອງປະຊຸມໃຫຍ່ ກອງບັນຊາການ ປກສ ແຂວງ ໂດຍການເປັນປະທານຂອງສະຫາຍ ພັນໂທ ເຄນວອນ ລໍວັນໄຊ ເລຂາພັກຮາກຖານ ຫົວໜ້າຫ້ອງສັນຕິບານ.

   

      ສະຫາຍ ພັນຕີ ບຸດລັບ ລາດສະວົງສຸກ ຮອງຫົວໜ້າຫ້ອງການເມືອງຄະນະຊຸກຍູ້ກອງປະຊຸມ ໄດ້ຂື້ນຜ່ານໃບອານຸມັດ ເປີດກອງປະຊຸມໃຫຍ່ຄັ້ງທີ່ I ຂອງ 02 ໜ່ວຍພັກ ແລະ ມະຕິຕົກລົງຂອງຄະນະປະຈໍາພັກກອງບັນຊາການ ປກສ ແຂວງ ວ່າດ້ວຍການປະກາດແຍກ ແຕ່ງຕັ້ງໜ່ວຍພັກ ຄື: ໜ່ວຍພັກພະແນກຄຸ້ມຄອງຄົນຕ່າງປະເທດ ແລະ ໜ່ວຍພັກພະແນກ ຕຳຫຼວດທ່ອງທ່ຽວ. ຈາກນັ້ນ ສະຫາຍ ພັນຕີ ສອນຄຳ ພົມມະຈັນກຳມະການກວດກາ ໄດ້ຕາງໜ້າໃຫ້ຄະນະໜ່ວຍພັກ ຂື້ນຜ່ານບົດລາຍງານການເມືອງຕໍ່ທີ່ປະຊຸມ ເຊີ່ງໄດ້ຍົກໃຫ້ເຫັນຜົນງານໃນການຊີ້ນຳ-ນຳພາຈັດຕັ້ງປະຕິບັດໜ້າທີ່ວຽກງານຫຼາຍດ້ານ,  ດ້ານການເມືອງ-ແນວຄິດ: ໄດ້ຖຶເອົາການສຶກສາອົບຮົມ ການເມືອງ - ແນວຄິດ ເຊື່ອມຊືມເອກະສານທີ່ສຳຄັນຂອງພັກ-ລັດໃນຖັນແຖວສະມາຊິກ, ພະນັກງານ-ນັກຮົບຕິດພັນກັບວຽກງານນະໂຍບາຍເປັນບັນຫາສຳຄັນຕົ້ນຕໍ, ມີລະບຽບວິໄນຕາມ 03 ທາດແທ້ 07 ມູນເຊື້ອຂອງກໍາລັງປ້ອງກັນຄວາມສະຫງົບວາງອອກຢ່າງເຂັ້ມງວດ, ມີຄຸນສົມບັດສິນທຳປະຕິວັດ ເຊື່ອໝັ້ນຕໍ່ການນໍາພາຂອງພັກ; ວຽກງານປັບປຸງກໍ່ສ້າງ ຂະຫຍາຍສະມາຊິກພັກ: ສ້າງມະຫາຊົນກ້າວໜ້າເຂົ້າເປັນສະມາຊິກພັກໄດ້ 18 ສະຫາຍ ຍິງ 07 ສະຫາຍ; ດ້ານວຽກງານວິຊາສະເພາະ: ໃນຕະຫຼອດ 03 ປີຜ່ານມາ ສາມາດຍາດໄດ້ຜົນສໍາເລັດຫຼາຍດ້ານ ເຊັ່ນ: ໜ່ວຍພັກພະແນກ ຄຕທ: ຂຶ້ນທະບຽນ-ຕໍ່ບັດພັກເຊົາໄອດີຄຼາດໃຫ້ຄົນຕ່າງປະເທດໄດ້ 2.941 ຄົນ, ຍີງ 783 ຄົນ ມີ 11 ສັນຊາດ, ລົງກວດກາຄົນຕ່າງປະເທດ 11 ຄັ້ງ ພົບເຫັນຄົນຕ່າງປະເທດ 19.299 ຄົນ, ຍີງ 3.791 ຄົນ ມີ 35 ສັນຊາດ, ຜ່ານເອກະສານແຕ່ງງານໄດ້ 100 ຊຸດ ມີ 12 ສັນຊາດ, ຜ່ານເອກະສານຂໍຢູ່ລາວຖາວອນໄດ້ 10 ຊຸດ, ກວດກາຂື້ນທະບຽນ ແລະ ອອກບັດອານຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດທີ່ເຂົ້າມາເຄື່ອນໄຫວ ພັກເຊົາ ແລະ ດຳເນີນທຸລະກິດ, ກິດຈະການຕ່າງໆ ຢູ່ໃນໂຄງການ ແລະ ນອກໂຄງການ ທົ່ວແຂວງ ບໍລິຄໍາໄຊ ມີ 4.126 ຄົນ ຍີງ 477 ຄົນ ມີ 25 ສັນຊາດ ແລະ ມີຄະດີເກີດຂື້ນ 91 ເລື່ອງ ແລະ ໄດ້ແກ້ໄຂສໍາເລັດແລ້ວ; ໜ່ວຍພັກພະແນກ ຕທທ: ໄດ້ລົງຕິດຕາມເຮືອສໍາລານ 11 ຄັ້ງ, ເກັບກໍາສະຖິຕິ ແຈ້ງພັກເຊົານັກທ່ອງທ່ຽວ ແລະຢ້ຽມຢາມຢູ່ພາຍໃນແຂວງ 2.793 ຄົນ ຍີງ 244 ຄົນ, ເກັບກໍາສະຖິຕິແຂກເຂົ້າມາພັກເຊົາຢູ່ໂຮງແຮມ, ເຮືອນພັກ 37 ຄັ້ງ, ປ້ອງກັນກອງປະຊຸມ ແລະ ນັກທ່ອງທ່ຽວ 25 ຄັ້ງ.

   

      ພາຍຫລັງຄະນະພັກຊຸດເກົ່າ ກ່າວອໍາລາໜ້າທີ່, ຄະນະຊຸກຍູ້ກອງປະຊຸມ ກໍ່ໄດ້ຂື້ນຜ່ານມາດຖານເງື່ອນໄຂຂອງຜູ້ທີ່ຈະສະມັກເປັນບຸກຄະລາກອນ ເຊີ່ງມີຜູ້ລົງສະມັກໜ່ວຍລະ 05 ສະຫາຍ ເລືອກເອົາ 03 ສະຫາຍ, ກອງປະຊຸມກໍ່ໄດ້ມີການປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ຜ່ານການປ່ອນບັດ ແລະ ກອງປະຊຸມຄັ້ງປະຖົມມະລືກ ໜ່ວຍພັກພະແນກ ຄຕທ ເລືອກໄດ້ ສະຫາຍ ພັນຕີ ບຸນລ້ອມ ດາລາສຸກ ເປັນເລຂາ, ສະຫາຍ ພັນຕີ ອຸ່ນເຮືອນ ລາດສະໝຸດ ເປັນຮອງເລຂາ ແລະ ສະຫາຍ ພັນຕີ ນາງ ສົມສະໝັກ ວໍລະບຸດ ເປັນກຳມະການກວດກາ, ໜ່ວຍພັກພະແນກ ຕທທ ເລືອກໄດ້ ສະຫາຍ ພັນຕີ ສົມບູນ ວົງນະລາດ ເປັນເລຂາ, ສະຫາຍ ພັນຕີ ໄຂໝັ້ນ ພຸດທະວົງ ເປັນຮອງເລຂາ ແລະ ສະຫາຍ ພັນຕີ ສົມພັນ ທອງມາວັນ ເປັນກຳມະການກວດກາ.

      ຕອນທ້າຍ ຍັງໄດ້ຮັບຟັງຄຳເຫັນໂອ້ລົມຈາກສະຫາຍ ພັນໂທ ເຄນວອນ ລໍວັນໄຊ ເລຂາພັກຮາກຖານ ຫົວໜ້າຫ້ອງສັນຕິບານ ເຊີ່ງກ່ອນອື່ນ ສະຫາຍ ກໍ່ໄດ້ກ່າວສະແດງຄຳຍ້ອງຍໍຊົມເຊີຍຄະນະໜ່ວຍພັກຊຸດເກົ່າທີ່ຍາດໄດ້ຜົນງານ ດ້ວຍຜົນສຳເລັດຮອບດ້ານ. ແລະ ໄດ້ເນັ້ນໜັກໃຫ້ຄະນະໜ່ວຍພັກຊຸດໃໝ່ ຈົ່ງພ້ອມກັນເອົາໃຈໃສ່ຊີ້ນຳ-ນຳພາ ຖອດຖອນບົດຮຽນແກ້ໄຂຂໍ້ຄົງຄ້າງ ແລະ ຮັກສາມູນເຊື້ອ ເສີມຂະຫຍາຍຈຸດດີ ຍາດໃຫ້ໄດ້ຜົນງານອັນໃໝ່ ຍີ່ງໃຫຍ່ກ່ວາເກົ່າ.