ເພື່ອຮັບປະກັນໃຫ້ມີເລືອດປອດໄພ, ພຽງພໍ ແລະ ທັນເວລາ ສຳລັບນຳໃຊ້ເຂົ້າໃນການປິ່ນປົວ ໃນວັນທີ 12 ຕຸລາ 2018  ອົງການກາແດງແຂວງບໍລິຄຳໄຊ ໄດ້ລົງເຄື່ອນໄຫວຮັບບໍລິຈາກເລືອດ ຢູ່ທີ່ພະແນກກະສິກຳ ແລະ ປ່າໄມ້ແຂວງ ນຳພາໂດຍ ທ່ານ ບຸນຍົງ ປັນຍານຸວົງ ຮອງອົງການກາແດງແຂວງ ແລະ ໃຫ້ກຽດເຂົ້າຮ່ວມໂດຍ ທ່ານ ຊາຍຄຳ ກຸນນາວົງ ຄະນະພະແນກກະສິກຳ ແລະ ປ່າໄມແຂວງ ມີພະນັກງານລັດຖະກອນພາຍໃນພະແນກ ເຂົ້າຮ່ວມ.

      ໃນພິທີມີຜູ້ຜ່ານການກວດສຸຂະພາບ ແລະ ສາມາດໃຫ້ບໍລິຈາກເລືອດໄດ້ 4 ຄົນ, ຍິງ 1 ຄົນ. ທ່ານ ຊາຍຄຳ ກຸນນາວົງ  ໃດ້ມີຄຳເຫັນໂອ້ລົມຕໍ່ພິທີ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜູ້ທີ່ປະກອບສ່ວນໃນຄັ້ງນີ້ ແລະ ຍັງໄດ້ຮຽກຮ້ອງໃຫ້ທຸກຄົນໃນສັງຄົມ ຈົ່ງເຫັນໄດ້ເຖີງຄວາມສຳຄັນ ແລະ ພ້ອມກັນໃຫ້ບໍລິຈາກເລືອດ ເພາະວ່າ ເລືອດຂອງທ່ານອາດຈະສາມາດຊ່ວຍເຫຼືອຊີວິດຂອງຫຼາຍຄົນໄດ້.

      ເພື່ອເປັນຍ້ອງຍໍສັນລະເສີນຜູ້ສະໝັກໃຈບໍລິຈາກເລືອດໃນຄັ້ງນີ້ ອົງການກາແດງແຂວງບໍລິຄຳໄຊ ໄດ້ມອບໃບຍ້ອງຍໍ ເພື່ອເປັນການສະແດງຄຳຂອບໃຈ ແລະ ຍັ້ງຢືນເຖິງຄຸນງາມຄວາມດີ ໃນການເສຍສະຫຼະເພື່ອສັງຄົມໂດຍບໍ່ຮຽກຮ້ອງສິ່ງຕອບແທນ.