ໃນຕອນບ່າຍ ວັນທີ 09 ຕຸລາ 2018 ນີ້ ຢູູ່ທີ່ຄ້າຍຄຸມຂັງ-ດັດສ້າງ ໜອງສາມຂາ ປກສ ແຂວງ ບໍລິຄຳໄຊ ໄດ້ຈັດພິທີປ່ອຍຕົວນັກໂທດ ຈຳນວນ 26 ຄົນ, ຍິງ 06 ຄົນ, ເຂົ້າຮ່ວມເປັນປະທານໂດຍ ທ່ານ ພັນໂທ ຄໍາໃບ ສຸວັນນະໂຄດ ຄະນະພັກ ຮອງຫົວໜ້າກອງບັນຊາການ ປກສ ແຂວງ, ມີທ່ານພັນໂທ ສີລາ ພົມມະຈັນ ຫົວໜ້າຄ້າຍຄຸມຂັງ-ດັດສ້າງ ປກສ ແຂວງບໍລິຄຳໄຊ, ມີບັນດາຄະນະຄ້າຍຄຸມຂັງ-ດັດສ້າງ, ເຈົ້າໜ້າທີ່ກ່ຽວຂ້ອງ, ຍາດພີ່ນ້ອງ ແລະ ນັກໂທດ ເຂົ້າຮ່ວມ.

      ໂດຍປະຕິບັດຕາມຄຳຕັດສິນຂອງສານປະຊາຊົນຂັ້ນຕົ້ນ ແຂວງ ບໍລິຄຳໄຊ ເລກທີ 143/ຂຕອ, ລົງວັນທີ່ 05 ຕຸລາ 2018 ວ່າດ້ວຍການປ່ອຍຕົວນັກໂທດຜູ້ທີ່ມີຜົນງານ ຕາມມາດຖານເງື່ອນໄຂຄົບຖ້ວນຖືກຕ້ອງຕາມກົດໝາຍອາຍາແຫ່ງ ສປປ ລາວ ມາດຕາ 52 ສະບັບປັບປຸງປີ 2005 ວ່າດ້ວຍການປ່ອຍຕົວນັກໂທດກ່ອນກຳນົດໂດຍມີເງື່ອນໄຂ, ກອງບັນຊາການ ປກສ ແຂວງບໍລິຄຳໄຊ ໄດ້ອອກເອກະສານຢັ້ງຢືນປ່ອຍຕົວ ສະບັບເລກທີ 5859/ປກສຂ ລົງວັນທີ 09 ຕຸລາ 2018 ວ່າດ້ວຍການປ່ອຍຕົວນັກໂທດກ່ອນກຳນົດໂດຍມີເງື່ອນໄຂ ຈໍານວນ 26 ຄົນ, ຍິງ 06 ຄົນ, ໃນນີ້ ມີນັກໂທດທີ່ເຮັດຜິດໃນສະຖານ ຄ້າຂາຍຢາເສບຕິດ 22 ຄົນ, ຍິງ 02 ຄົນ, ລັກຊັບ 01 ຄົນ, ຄາດຕະກໍາ 01 ຄົນ, ອຸບັດເຫດ 01 ຄົນ, ທຳຮ້າຍຮ່າງກາຍ 01 ຄົນ, ເຊີ່ງພວກກ່ຽວໄດ້ຜ່ານການປະຕິບັດໂທດມາແລ້ວ 2/3 ເຫັນວ່າ ພວກກ່ຽວແມ່ນມີຄວາມກິນແໜງແຄງໃຈຕໍ່ການກະທຳຜິດຂອງພວກຕົນ ແລະ ມີຄວາມຫ້າວຫັນໃນການອອກແຮງງານ, ເອົາໃຈໃສ່ປະຕິບັດກົດລະບຽບຂອງຄ້າຍຄຸມຂັງໄດ້ຢ່າງເຂັ້ມງວດ ຈຶ່ງໄດ້ຮັບການປ່ອຍຕົວຕາມແນວທາງນະໂຍບາຍຂອງພັກ-ລະບຽບກົດໝາຍຂອງລັດ.

          ໃນໂອກາດດັ່ງກ່າວ ທ່ານ ພັນໂທ  ຄຳໃບ ສຸວັນະໂຄດ ຮອງຫົວໜ້າກອງບັນຊາການ ປກສ ແຂວງ ບໍລິຄຳໄຊ ໄດ້ເປັນກຽດໂອ້ລົມຕໍ່ບັນດານັກໂທດທີ່ໄດ້ຮັບການປ່ອຍຕົວໃນຄັ້ງນີ້ ວ່າ: ເມື່ອພົ້ນໂທດອອກໄປຢູ່ນຳຄອບຄົວ ແລະ ສັງຄົມແລ້ວ ຈົ່ງພ້ອມກັນຕັ້ງໜ້າເອົາໃຈໃສ່ເຄົາລົບ ແລະ ປະຕິບັດລະບຽບກົດໝາຍໃຫ້ເຂັ້ມງວດ, ປະກອບອາຊີບທຳມາຫາກິນໃຫ້ຖືກຕ້ອງສອດຄ່ອງກັບແນວທາງນະໂຍບາຍຂອງພັກ-ລະບຽບກົດໝາຍຂອງລັດ ເພື່ອສ້າງສາພັດທະນາຕົນເອງ ແລະ ຄອບຄົວໃຫ້ຮັ່ງມີຜາສຸກຂື້ນເລື້ອຍໆ, ຮຽກຮ້ອງໃຫ້ພໍ່ແມ່, ຍາດພີ່ນ້ອງ ແລະ ອຳນາດການປົກຄອງທຸກຂັ້ນ ຈົ່ງເອົາໃຈໃສ່ສຶກສາອົບຮົມເຂົາເຈົ້າ ໃຫ້ມີຊີວິດໃໝ່ທີ່ດີຂື້ນ ແລະ ບໍ່ໄປກະທຳຜິດຕື່ມອີກ, ຕໍ່ກັບນັກໂທດທີ່ບໍ່ໄດ້ຮັບການປ່ອຍຕົວ ກໍ່ຈົ່ງເອົາໃຈໃສ່ຫ້າວຫັນປະຕິບັດກົດລະບຽບຂອງຄ້າຍຄຸມຂັງໃຫ້ເຂັ້ມງວດເພື່ອຈະໄດ້ຮັບການປ່ອຍຕົວໃນຄັ້ງຕໍ່ໄປ.