ໃນວັນທີ 9 ຕຸລາ 2018 ນີ້ ຢູ່ທີ່ສໍານັກງານປົກຄອງເມືອງທ່າພະບາດ ນໍາໂດຍທ່ານ ບຸນມາ ມະນີວົງ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ທ່ານ ສັກດາວັນ ສາຍນໍລາດ ຫົວໜ້າລັດວິສາຫະກິດໄຟຟ້າ ສາຂາ ບໍລິຄໍາໄຊ ພ້ອມດ້ວຍທີມງານໄດ້ນໍາເອົາເຄື່ອງອຸປະໂພກ-ບໍລິໂພກ ໄປມອບໃຫ້ເມືອງທ່າພະບາດ ເພື່ອນຳໄປຊ່ວຍເຫລືອບັນເທົາທຸກແກ່ບ້ານ ແລະ ຄອບຄົວ ທີ່ໄດ້ຮັບຜົນກະທົບຈາກໄພນ້ຳຖ້ວມ ໃນໄລຍະຜ່ານມາ.

      ໂດຍເຫັນໄດ້ນ້ຳໃຈຄວາມຮັກແພງ ສາມັກຄີ ຊ່ວຍເຫລືອເຊີ່ງກັນ ແລະ ກັນ ລັດວິສາຫະກິດໄຟຟ້າລາວ ໄດ້ນຳເອົາເຄື່ອງອຸປະໂພກ - ບໍລິໂພກ ທີ່ຈຳເປັນໃນຊີວິດປະຈຳວັນຈຳນວນໜື່ງ ເປັນຕົ້ນແມ່ນ ເຄື່ອງນຸ່ງຫົ່ມ, ໝີ່, ປ່ອງປາ ຈໍານວນ 53 ຖົງ ພ້ອມເງິນສົດ 20.000.000 ກີບ ມາມອບຊ່ວຍເຫຼືອໃຫ້ຄອບຄົວຜູ້ປະສົບໄພນໍ້າຖ້ວຍຢູ່ເມືອງທ່າພະບາດໃນໄລຍະຜ່ານມາ, ເປັນກຽດມອບໂດຍ ທ່ານ ບຸນມາ ມະນີວົງ ແລະ ຕ່າງໜ້າຮັບໂດຍ ທ່ານ ຄໍາປຸ່ນ ສີຫາລາດ ຮອງເລຂາພັກເມືອງ ຮອງເຈົ້າເມືອງທ່າພະບາດ.

     ໃນໂອກາດດັ່ງກ່າວ ທ່ານ ຄໍາປຸ່ນ ສີຫາລາດ ຕ່າງໜ້າໃຫ້ອໍານາດການປົກຄອງເມືອງ ໄດ້ສະແດງຄວາມຂອບອົກຂອບໃຈ ມາຍັງລັດວິສາຫະກິດໄຟຟ້າລາວ ທີ່ໄດ້ນໍາເອົາເຄື່ອງດັ່ງກ່າວນີ້ ມາຊ່ວຍເພື່ອບັນເທົາທຸກໃຫ້ແກ່ຄອບຄົວພໍ່ແມ່ປະຊາຊົນຜູ້ທີ່ຖືກຜົນກະທົບຈາກໄພນໍ້າຖ້ວມພາຍໃນເມືອງທ່າພະບາດ ທ່ານ ຍັງກ່າວອີກວ່າ ຈະນຳເອົາເຄື່ອງເຫລົ່ານີ້ ນຳໄປແຈກຢາຍໃຫ້ພໍ່ແມ່ປະຊາຊົນຢ່າງທົ່ວເຖີງ ແລະ ດ້ວຍຄວາມເໝາະສົມ.