ພິທີສະເຫຼີມສະຫຼອງວັນຄົນພິການແຫ່ງຊາດ 27 ກັນຍາ ແລະ ວັນຜູ້ສູງອາຍຸ 1 ຕຸລາ ໄດ້ຈັດຂື້ນໃນຕອນເຊົ້າຂອງວັນທີ 10 ຕຸລາ 2018 ທີ່ສະໂມສອນໃຫຍ່ຂອງແຂວງ ໂດຍການເປັນປະທານ ແລະ ປາຖະກະຖາຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີການນຳຂອງແຂວງ, ພະນັກງານປະຕິວັດອາວຸໂສບຳນານ, ຜູ້ສູງອາຍຸ, ຜູ້ພິການ ແລະ ພະນັກງານລັດຖະກອນຈາກພະແນກການອ້ອມຂ້າງແຂວງ ເຂົ້າຮ່ວມ.

 

     ໃນພິທີ ທ່ານປະທານ ໄດ້ຍົກໃຫ້ເຫັນເຖິງຄວາມເປັນມາ ແລະ ຄວາມໝາຍຄວາມສຳຄັນຂອງ 2 ວັນດັ່ງກ່າວ ວ່າ: ວຽກງານຊ່ວຍເຫຼືອ ແລະ ພັດທະນາຜູ້ດ້ອຍໂອກາດ ເປັນຕົ້ນແມ່ນຄົນພິການ ແລະ ຜູ້ສຸງອາຍຸ ເປັນວຽກງານໜຶ່ງທີ່ສຳຄັນ ທັງເປັນວຽກງານທີ່ມີລັກສະນະຍຸດທະສາດຍາວນານ ຍ້ອນວ່າ ປະເທດຊາດຂອງພວກເຮົາເຄີຍຜ່ານແປວໄຟສົງຄາມ ໃນການຕໍ່ສູ້ເພື່ອພາລະກິດປະຕິວັດຊາດປະຊາທິປະໄຕມາຫຼາຍກວ່າ 30 ປີ ຈຶ່ງເຮັດໃຫ້ບັນດາທ່ານນັກປະຕິວັດອາວຸໂສ ແລະ ພົນລະເມືອງລາວຈຳນວນຫຼວງຫຼາຍ ໄດ້ຮັບຜົນກະທົບທາງກົງ ແລະ ທາງອ້ອມຈາກສົງຄາມ ກາຍເປັນຄົນເສຍອົງຄະ ແລະ ພິການ ລວມທັງຜົນຮ້າຍຂອງລະເບີດທີ່ຍັງບໍ່ທັນແຕກ ຍັງສືບຕໍ່ສົ່ງຜົນກະທົບຕໍ່ການພັດທະນາປະເທດ ກໍ່ຄືການດຳລົງຊີວິດຂອງພໍ່ແມ່ປະຊາຊົນໃນປັດຈຸບັນ.

     ເພື່ອເປັນການຍົກສູງການຊ່ວຍເຫຼືອ, ຟື້ນຟູ, ບຳບັດ, ພັດທະນາຄົນພິການ ແລະ ຜູ້ສູງອາຍຸ ເຮັດໃຫ້ຊີວິດການເປັນຢູ່ໄດ້ຮັບການປັບປຸງປົວແປງນັບມື້ນັບດີຂື້ນ ລັດຖະບານໄດ້ອອກດຳລັດ ເລກທີ 232/ນຍ, ລົງວັນທີ 6 ກັນຍາ 2013 ວ່າດ້ວຍການຈັດຕັ້ງ ແລະ ເຄື່ອນໄຫວຂອງຄະນະກຳມະການແຫ່ງຊາດເພື່ອຄົນພິການ ແລະ ຜູ້ສູງອາຍຸ ໂດຍມີເປົ້າໝາຍໃນການຄົ້ນຄ້ວາ, ກຳນົດນະໂຍບາຍ, ລະບຽບກົດໝາຍແນໃສ່ປົກປ້ອງ , ສົ່ງເສີມສິດທິຂອງຄົນພິການ ແລະ ຜູ້ສູງອາຍຸ ແລະ ໄດ້ກຳນົດເອົາວັນທີ 27 ກັນຍາ ເປັນວັນຄົນພິການແຫ່ງຊາດ. ສຳລັບແຂວງບໍລິຄຳໄຊ ໃນ 1 ປີຜ່ານມາ ມີສະຖິຕິພະນັກງານເສຍອົງຄະທັງໝົດ 322 ທ່ານ ຍິງ 21 ທ່ານ ໃນນັ້ນ ອົງຄະຮາກຖານ 217 ທ່ານ ຍິງ 10 ທ່ານ, ເສຍອົງຄະບຳນານ 101 ທ່ານ ຍິງ 9 ທ່ານ, ເສຍອົງຄະປະຈຳການ 4 ທ່ານ ຍິງ 2 ທ່ານ, ຈຳນວນເງິນນະໂຍບາຍພະນັກງານເສຍອົງຄະທັງໝົດ ຕໍ່ປີ 4.363.359.984 ກີບ ແລະ ພະນັກງານບຳນານທົ່ວແຂວງມີທັງໝົດ 1165 ທ່ານ ຍິງ 266 ທ່ານ, ຈຳນວນເງິນນະໂຍບາຍບຳນານທັງໝົດ ຕໍ່ປີ 25.706.253.996 ກີບ, ນອກຈາກເງິນເດືອນແລ້ວ ແຕ່ລະທ່ານຍັງໄດ້ຮັບການປິ່ນປົວຕາມລະບອບປະກັນສັງຄົມພາກລັດທັງໝົດ ໂດຍບໍ່ໄດ້ເສຍຄ່າ 1339 ບັດ ແລະ ໄດ້ປະຕິບັດນະໂຍບາຍເງິນອຸດໝຸນໃຫ້ຜູ້ທີ່ມີຄຸນງາມຄວາມດີຕໍ່ປະເທດຊາດປະຈຳປີ 2017 ຕາມດຳລັດ 272/ລບ ປະຕິບັດໄດ້ 4 ເປົ້າໝາຍ ຄື: ເງິນອຸດໜຸນເທື່ອດຽວຜູ້ຍັງມີຊີວິດ 49 ທ່ານ ຍິງ 20 ທ່ານ ເປັນເງິນ 1.031.776.300 ກີບ, ເງິນອຸດໜຸນເສຍສະຫຼະຊີວິດ 51 ທ່ານ ຍິງ 2 ທ່ານ ເປັນເງິນ 1.220.833.800 ກີບ, ເງິນປ່ຽນແທນໂກຕ່າລັດ 2 ທ່ານ ຍິງ 1 ທ່ານ ເປັນເງິນ 150.508.800 ກີບ ແລະ ເງິນສົມທົບປຸກສ້າງ - ສ້ອມແປງເຮືອນ 6 ທ່ານ ເປັນເງິນ 180.000.000 ກີບ ລວມທັງໝົດ 108 ທ່ານ ຍິງ 23 ທ່ານ ເປັນຈຳນວນເງິນ 2.593.118.900 ກີບ.

    ໃນຕອນທ້າຍຂອງພິທີ ຍັງໄດ້ມອບຂອງຂວັນຈຳນວນໜຶ່ງ ໃຫ້ພະນັກງານປະຕິວັດອາວຸໂສບຳນານ, ຜູ້ພິການ ແລະ ຜູ້ສູງອາຍຸ ທີ່ເຂົ້າມາຮ່ວມພິທີໃນຄັ້ງນີ້ອີກດ້ວຍ.