ໃນວັນທີ 07ຕຸລາ 2018 ທ່ານ ປອ ສຸວັນນີ ໄຊຊະນະ ຮອງເລຂາຄະນະບໍລິຫານພັກງານພັກແຂວງ ປະທານສະພາປະຊາຊົນ ແຂວງບໍລິຄຳໄຊ ພ້ອມດ້ວຍຄະນະ ໄດ້ຕາງໜ້າໃຫ້ຄະນະບໍລິຫານງານພັກແຂວງ, ກຳລັງປະກອບອາວຸດ ກໍ່ຄືປະຊາຊົນບັນດາເຜົ່າຊາວແຂວງບໍລິຄຳໄຊ ໄດ້ເດີນທາງເຂົ້າວາງພວງມາລາ ແລະ ຂຽນປື້ມໄຫ້ວອາໄລ ຕໍ່ການເສຍຊີວິດຂອງສະຫາຍ ໂດເມືອຍ ອາດີດເລຂາທິການໃຫຍ່ ສາທາລະນະລັດສັງຄົມນິຍົມຫວຽດນາມ ເຊິ່ງລວມອາຍຸໄດ້ 101 ປີ ຢູ່ທີ່ກົງສູນໃຫຍ່ ສສ ຫວຽດນາມປະຈຳພາກກາງ ນະຄອນ ໄກສອນ ແຂວງ ສະຫວັນນະເຂດ ໂດຍມີສະຫາຍ ເຈິ່ນກົງຖິງ ຫົວໜ້າກົງສູນໃຫຍ່ ຕ້ອນຮັບດ້ວຍຄວາມອົບອຸ່ນສະໜິດສະໝົມ.

 

      ເນື້ອໃນບາງຕອນ ທີ່ທ່ານຮອງເລຂາພັກແຂວງ ໄດ້ຂຽນວ່າ: ຕາງໜ້າໃຫ້ຄະນະພັກ, ອົງການປົກຄອງ ແລະ  ສະພາປະຊາຊົນແຂວງ ພ້ອມດ້ວຍປະຊາຊົນບັນດາເຜົ່າຊາວແຂວງບໍລິຄຳໄຊ ພວກຂ້າພະເຈົ້າຂໍສະແດງຄວາມອາໄລຮັກ ຕໍ່ການຈາກໄປຂອງສະຫາຍອາດີດເລຂາທິການໃຫຍ່ ໂດເມື່ອຍ ຜູ້ທີ່ເປັນນັກຮັກຊາດ, ນັກປະຕິວັດຂອງປະເທດຊາດ ແລະ ປະຊາຊົນຫວຽດນາມ ອ້າຍນ້ອງພວກເຮົາຈະສືບຕໍ່ພາລະກິດປະຕິວັດຂອງສະຫາຍ ຂໍໃຫ້ດວງວິນຍານຂອງສະຫາຍ ໂດເມື່ອຍ ຈົ່ງໄປສູ່ສຸຂະຕິເທີ້ນ. ການເຂົ້າຮ່ວມໄຫວ້ອາໄລໃນຄັ້ງນີ້ ແມ່ນສະແດງເຖິງໄມຕີຈິດມິດຕະພາບອັນດູດດື່ມ ສະໜິດສະໜົມ, ຄວາມສາມັກຄີແບບພິເສດຮອບດ້ານ ລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ກໍ່ຄືແຂວງ ບໍລິຄຳໄຊ ກັບກົງສູນໃຫຍ່ ສສ ຫວຽດນາມປະຈຳພາກກາງ ຍັງເປັນການເພີ່ມພູນຄູນສ້າງສາຍພົວພັນແບບພິເສດສອງຊາດລາວ-ຫວຽດນາມ, ຫວຽດນາມ-ລາວ ອັນທີ່ເປັນມູນເຊື້ອມາແຕ່ບູຮານນາການໃຫ້ຍິ່ງໃຫຍ່ຂຶ້ນກວ່າເກົ່າ, ບັນຍາກາດການເຂົ້າໄຫວ້ອາໄລຢູ່ກົງສູນໃຫຍ່ ສສ ຫວຽດນາມ ປະຈຳພາກາງນະຄອນ ໄກສອນ ແຂວງສະຫວັນນະເຂດ ເຫັນວ່າເຕັມໄປດ້ວຍຄວາມໂສກເສົ້າອາໄລອາວອນຢ່າງສຸດຊື້ງ ໂດຍມີການນຳຈາກພາກລັດ-ວິສາຫະກິດໄດ້ມາວາງພວງມາລາ ໄຫວ້ອາໄລເປັນຈຳນວນຫຼວງຫຼາຍ.