ອຸປະຕິເຫດຕາມທ້ອງຖະໜົນໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນ ພ້ອມທັງສ້າງຄວາມລຳບາກແກ່ການພັດທະນາເສດຖະກິດ-ສັງຄົມ, ທ່ານ ພັອ ທອງໃບ ລໍວັນໄຊ ຫົວໜ້າກອງບັນຊາການ ປກສ ແຂວງ ໄດ້ຜ່ານບົດຕີລາຄາສະພາບການເກີດອຸປະຕິເຫດຕາມທ້ອງຖະໜົນ ຕໍ່ກອງປະຊຸມຄົ້ນຄ້ວາວິທະຍາສາດ ວຽກງານຫຼຸດຜ່ອນອຸປະຕິເຫດທ້ອງຖະໜົນ ທີ່ໄດ້ຈັດຂື້ນໃນວັນທີ 9 ຕຸລາ 2018 ຢູ່ຫ້ອງວ່າການປົກຄອງແຂວງ ພາຍໃຕ້ການເປັນປະທານຂອງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ແລະ ເຂົ້າຮ່ວມໂດຍ ທ່ານ ພົຈວ ປອ ທອງສະຫວັນ ວົງສະຫວັດ ຮອງຫົວໜ້າກົມໃຫ່ຍຕຳຫຼວດ ກະຊວງປ້ອງກັນຄວາມສະຫງົບ, ມີຄະນະ ປກສ ແຂວງ-ເມືອງ, ເຈົ້າເມືອງ-ຮອງເຈົ້າເມືອງ ແລະ ພະແນກການອ້ອມຂ້າງແຂວງເຂົ້າຮ່ວມ.

      ທ່ານ ພັອ ທອງໃບ ລໍວັນໄຊ ໄດ້ຍົກໃຫ້ເຫັນວ່າ ບໍລິຄຳໄຊ ເປັນແຂວງໜຶ່ງ ທີ່ມີອຸປະຕິເຫດເກີດຂື້ນສູງພໍສົມຄວນ ຈາກການເກັບກຳຂໍ້ມູນຂອງພະແນກຈະລາຈອນ ໃນປີ 2017 ມີອຸປະຕິເຫດເກີດຂື້ນທັງໝົດ 330 ເລື່ອງ, ພາຫະນາເປ່ເພ 598 ຄັນ, ມີຄົນໄດ້ຮັບເຄາະຮ້າຍທັງໝົດ 494 ຄົນ, ເສຍຊີວິດ 76 ຄົນ, ລວມມູນຄ່າຄວາມເສຍຫາຍ 20.016.000.000 ກີບ, ສະເພາະ 6 ເດືອນຕົ້ນປີ 2018 ມີອຸປະຕິເຫດເກີດຂື້ນ 128 ເລື່ອງ, ພາຫະນະເປ່ເພ 228 ຄັນ, ມີຜູ້ບາດເຈັບທັງໝົດ 212 ຄົນ, ໃນນັ້ນ ບາດເຈັບເລັກນ້ອຍ 98 ຄົນ, ບາດເຈັບສົມຄວນ 83 ແລະ ສາຫັດ 31 ຄົນ, ມີຜູ້ເສຍຊີວິດ 30 ຄົນ.  ປັດໃຈທີ່ພາໃຫ້ເກີດອຸປະຕິເຫດ ແມ່ນເກີດຈາກຫຼາຍສາເຫດ ເປັນຕົ້ນແມ່ນຜູ້ຂັບຂີ່ເມົາແລ້ວຂັບ, ໃຊ້ຄວາມໄວເກີນກຳນົດ, ແຊງບໍ່ຮັບປະກັນ, ບໍ່ປ່ອຍສິດ ແລະ ອື່ນໆ. ນອກນັ້ນ ກອງປະຊຸມໃນຄັ້ງນີ້ ຍັງໄດ້ຮັບຟັງການຜ່ານແຜນການດຳເນີນງານການຈັດຕັ້ງປະຕິບັດ ແລະ ໂຄງການຫຼຸດຜ່ອນອຸປະຕິເຫດ, ການລາຍງານຂອງ ປກສ ເມືອງ ແລະ ພາກສ່ວນທີ່ກ່ຽວຂ້ອງ, ພ້ອມນັ້ນບັນດາຜູ້ແທນກອງປະຊຸມ ຍັງໄດ້ປະກອບຄຳເຫັນໃນຫຼາຍຫົວຂໍ້ທີ່ສຳຄັນ ເຊັ່ນ: ເພີ່ມທະວີການມີສ່ວນຮ່ວມຂອງແຕ່ລະພາກສ່ວນ, ການປັບປຸງປ້າຍສັນຍານຈະລາຈອນ, ການເຜີຍແຜ່ລະບຽບຈະລາຈອນ ໃຫ້ແກ່ຜູ້ໃຊ້ລົດໃຊ້ຖະໜົນ ໂດຍສະເພາະນັກຮຽນ-ນັກສຶກສາ, ການໂຄສະນາຜ່ານສື່ຕ່າງໆ ແລະ ອື່ນໆ ທັ້ງນີ້ ກໍ່ເພື່ອເປັນການແລກປ່ຽນບົດຮຽນເຊິ່ງກັນ ແລະ ກັນ ເພື່ອຊອກຫາບາງຂໍ້ຄົງຄ້າງ ແລ້ວນຳໄປພິຈາລະນາ, ປັບປຸງ ແລະ ແກ້ໄຂ ເຮັດໃຫ້ອຸປະຕິເຫດຕາມທ້ອງຖະໜົນຫຼຸດໜ້ອຍຖອຍລົງໃນຕໍ່ໜ້າ.