ໃນຕອນເຊົ້າຂອງວັນທີ 8 ຕຸລາ 2018 ຢູ່ເດີ່ນກິລາເປຕັງຂອງແຂວງ ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົົ້າແຂວງບໍລິຄຳໄຊ ພ້ອມດ້ວຍການນຳຂອງແຂວງ ໄດ້ຕ້ອນຮັບຂະບວນຄາລາວານສະຫະພັນແມ່ຍິງລາວ ທີ່ຈະເດີນທາງສູ່ເມືອງວຽງໄຊ ແຂວງຫົວພັນ ນຳພາໂດຍທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ພ້ອມດ້ວຍຄະນະ.

         

     ເພື່ອເປັນການສ້າງຂະບວນການຂ່ຳນັບຮັບຕ້ອນສະເຫຼີມສະຫຼອງວັນສ້າງຕັ້ງເມືອງວຽງໄຊ ແຂວງຫົວພັນ ເຂດທີ່ໝັ້ນການປະຕິວັດ ຄົບຮອບ 50 ປີ  ແລະ ວັນສ້າງຕັ້ງກອງທັບປະຊາຊົນລາວຄົບຮອບ 70 ປີ, ຂະບວນຄາລາວານຂຶ້ນສູ່ເມືອງວຽງໄຊ ແຂວງຫົວພັນໃນເທື່ອນີ້ ແມ່ນມີຄວາມໝາຍຄວາມສຳຄັນຫຼາຍ ເພາະເມືອງວຽງໄຊ ເປັນເຂດທີ່ໝັ້ນຂອງການປະຕິວັດລາວ, ເປັນຖິ່ນກຳເນີດຂອງກອງທັບປົດປ່ອຍປະຊາຊົນລາວ ເປັນບ່ອນສູບຫຼໍ່ຂອງນັກປະຕິວັດ ແລະ ບັນພະບູລຸດລາວ, ນອກນັ້ນ ຍັງເປັນເຫດການສຳຄັນຄັ້ງປະຫວັດສາດ ຂອງສະຫະພັນແມ່ຍິງລາວ ເຊິ່ງໄດ້ສ້າງໃຫ້ທົ່ວສັງຄົມ, ສະມາຊິກແມ່ຍິງ, ແມ່ຍິງບັນດາເຜົ່າ ໄດ້ຮັບຮູ້ເຖິງປະຫວັດສາດ, ພາລະກຳຂອງບັນດາທ່ານຜູ້ນຳການປະຕິວັດລາວ ທີ່ໄດ້ສຸມທຸກກຳລັງແຮງເສຍສະຫຼະເລືອດເນື້ອ ຕໍ່ສູ່ເພື່ອປົດປ່ອຍຊາດອອກຈາກແອກປົກຄອງຂອງພວກຈັກກະພັດຕ່າງດ້າວ, ເພື່ອສຶກສາອົບຮົມການເມືອງແນວຄິດ, ຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ ທີ່ໄດ້ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຄຽງບ່າ ຄຽງໄຫຼ່ກັບເພດຊາຍ ພາຍໃຕ້ການຊີ້ນຳ-ນຳພາໂດຍກົງຮອບດ້ານຂອງພັັກປະຊາຊົນປະຕິວັດລາວ.

 

     ພ້ອມນີ້ ຍັງໄດ້ສ້າງຄວາມສາມັກຄີຮັກແພງ, ສະໜິດສະໜົມລະຫວ່າງການຈັດຕັ້ງສະຫະພັນແມ່ຍິງແຕ່ສູນກາງລົງເຖິງທ້ອງຖິ່ນຢ່າງແໜ້ນແຟ້ນ ແລະ ເປັນຄວາມຊົງຈຳທີ່ບໍ່ວັນຫຼົງລືມໄດ້ ໂດຍສະເພາະແຂວງບໍລິຄຳໄຊ ທີ່ໄດ້ຮັບກຽດຕ້ອນຮັບ. ຂະບວນດັ່ງກ່າວ ແມ່ນເລີ່ມແຕ່ວັນທີ 8 – 13 ຕຸລາ 2018, ສະຫະພັນແມ່ຍິງລາວ ຍັງໄດ້ມອບເງິນຊຸກຍູ້ຈຳນວນ 20 ລ້ານກີບໃຫ້ແກ່ສະຫະພັນແມ່ຍິງແຂວງບໍລິຄຳໄຊ ເຊິ່ງຮັບໂດຍທ່ານນາງ ບຸນຊອນ ວໍລະສານ  ປະທານສະຫະພັນແມ່ຍິງແຂວງບໍລິຄຳໄຊ.