ຊຸດຝຶກອົບຮົມວຽກງານໂຄສະອົບຮົມ ໃຫ້ພະນັກງານໂຄສະນາອົບຮົມ 6 ແຂວງພາກກາງ ໄດ້ຈັດຂຶ້ນໃນວັນທີ 8 ຕຸລາ 2018 ຢູ່ທີ່ຫ້ອງວ່າການປົກຄອງແຂວງບໍລິຄຳໄຊ ໃຫ້ກ້ຽດເຂົ້າຮ່ວມໂດຍ ທ່ານ ປອ ຄຳໝັ້ນ ຈັນທະລັງສີ ຮອງຫົວໜ້າຄະນະໂຄສະນາອົບຮົມສູນກາງພັກ, ທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ ມີວິທະຍາກອນຈາກສູນກາງ, ແຂກທີ່ຖືກເຊີນຈາກພະແນກການອ້ອມຂ້າງແຂວງ ແລະ ສຳມະນາກອນ ທີ່ມາຈາກນະຄອນຫຼວງວຽງຈັນ, ແຂວງວຽງຈັນ, ບໍລິຄຳໄຊ, ໄຊສົມບູນ, ຊຽງຂວາງ ແລະ ຄຳມ່ວນເຂົ້າຮ່ວມ.

      ຈຸດປະສົງຂອງຊຸດຝຶກອົບຮົມກໍ່ເພື່ອຍົກລະດັບຄວາມຮູ້, ຄວາມສາມາດດ້ານທິດສະດີ-ແນວທາງນະໂຍບາຍຂອງພັກ ແລະ ວິຊາສະເພາະໂຄສະນາອົບຮົມ ໃຫ້ຖັນແຖວພະນັກງານທີ່ເຮັດວຽກງານໂຄສະນາອົບຮົມ ແນໃສ່ຍົກລະດັບດ້ານຄວາມຮັບຮູ້ ແລະ ເຂົ້າໃຈ ຕໍ່ວຽກງານດັ່ງກ່າວໃຫ້ຫຼາຍຂື້ນ ກາຍເປັນກະບອກສຽງທີ່ແຫຼມຄົມ ແລະ ເປັນພະນັກງານນຳພາທີ່ກ້າແກ່ນໃນຕໍ່ໜ້າ ສາມາດຄົ້ນຄ້ວາ, ກຳແໜ້ນ ແລະ ຜັນຂະຫຍາຍແນວທາງນະໂຍບາຍຂອງພັກ ເຂົ້າໃນໜ້າທີ່ວຽກງານໃຫ້ສອດຄ່ອງກັບສະພາບຄວາມເປັນຈິງຂອງທ້ອງຖິ່ນ ໃນວາລະຝຶກອົບນັກສຳມະນາກອນ ຈະໄດ້ຮຽນຮູ້ກ່ຽວກັບພື້ນຖານດ້ານທິດສະດີ-ແນວທາງ ແລະ ວຽກງານາໂຄສະນາອົບຮົມ ເຊິ່ງປະກອບມີ 6 ພາກຄື: ຄວາມຮູ້ກ່ຽວກັບທິດສະດີມາກ-ເລນິນ, ລະບົບການເມືອງ ແລະ ແນວທາງຂອງພັກ, ວຽກງານການເມືອງ-ແນວຄິດ ແລະ ວຽກງານໂຄສະນາອົບຮົມຂອງພັກ, ຄວາມຮູ້ພື້ນຖານດ້ານວິຊາການ ເພື່ອຮັບໃຊ້ວຽກງານໂຄສະນາ, ຄ້ວາມຮູ້ກ່ຽວກັບວຽກງານໂຄສະນາ ແລະ ວຽກງານຫາງສຽງສັງຄົມ. ນອກຈາກນັ້ນສຳມະນາກອນ ຍັງຈະໄດ້ສົນທະນາແລກປ່ຽນບົດຮຽນເຊິ່ງກັນແລະກັນ, ທົດລອງການຂຽນບົດ ແລະ ໄປທັດສະນະສຶກສາ ເຂດພື້ນທີ່ເຮັດການຜະລິດຂອງພໍ່ແມ່ປະຊາຊົນພາຍໃນແຂວງບໍລິຄຳໄຊ. ສຳລັບຊຸດຝຶກອົບຮົມຄັ້ງນີ້ ຈະໄດ້ດຳເນີນໄປຕັ້ງແຕ່ ວັນທີ 8-19 ຕຸລາ ຈຶ່ງສຳເລັດ.