ໃນລະຫວ່າງວັນທີ 3-6 ກັນຍາ 2018 ສະມາຊິກສະພາປະຊາຊົນແຂວງປະຈຳເຂດເລືອກຕັ້ງ ເມືອງປາກຊັນ, ເມືອງທ່າພະບາດ ແລະ ເມືອງບໍລິຄັນ ໄດ້ພ້ອມກັນລົງເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນແຂວງບໍລິຄຳໄຊ ຊຸດທີ I.

    ການລົງເຜີຍແຜ່ຄັ້ງນີ້ ປະກອບມີ 4 ຈຸດ, 23 ບ້ານ ໃນ 3 ເມືອງ ແລະ ມີຜູ້ເຂົ້າຮ່ວມຮັບຟັງທັງໝົດ 1.937 ຄົນ, ຍິງ 961 ຄົນ,  ຈຸດປະສົງກໍ່ເພື່ອຈັດຕັ້ງຜັນຂະຫຍາຍ ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ແລະ ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງບໍລິຄຳໄຊ ຊຸດທີ I ແນໃສ່ເຮັດໃຫ້ອົງການຈັດຕັ້ງພັດ - ລັດ, ແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ, ພະນັກງານ-ລັດຖະກອນ, ທະຫານ-ຕຳຫຼວດ ຕະຫຼອດຮອດພໍ່ແມ່ປະຊາຊົນລາວບັນດາເຜົ່າ ຮັບຮູ້ເຂົ້າໃຈກ່ຽວກັບບັນດາເນື້ອໃນວຽກງານທີ່ສຳຄັນ ເຊິ່ງໄດ້ພິຈາລະນາ ແລະ ຮັບຮອງເອົາໃນກອງປະຊຸມດັ່ງກ່າວ ພ້ອມດຽວກັນ ກໍ່ເປັນການລົງເຮັດວຽກງານຕົວຈິງ ຮ່ວມກັບພໍ່ແມ່ປະຊາຊົນ, ຕິດຕາມສະພາບການພັດທະນາເສດຖະກິດຂອງເມືອງ, ຂອງບ້ານ, ຮັບຟັງຄຳສະເໜີ, ການປະກອບຄຳຄິດ - ຄຳເຫັນ ແລະ ສົນທະນາປຶກສາຫາລືຮ່ວມກັນ ເພື່ອເກັບກຳຂໍ້ມູນເອົາຄຳສະເໜີຕ່າງໆ ນຳໄປສະເໜີຕໍ່ພາກສ່ວນທີ່ກ່ຽວຂ້ອງຢູ່ຂັ້ນເມືອງ, ຂັ້ນແຂວງ ນຳໄປພິຈາລະນາ ແລະ ປັບປຸງແກ້ໄຂໃນຕໍ່ໜ້າ. ຕິດພັນກັບການລົງເຄື່ອນໄຫວຄັ້ງນີ້ ສສຂ ຍັງໄດ້ນໍາເອົາເຄື່ອງຊ່ວຍເຫຼືອຈຳນວນໜຶ່ງ ໄປມອບໃຫ້ພໍ່ແມ່ປະຊາຊົນຢູ່ບັນດາບ້ານ ທີ່ປະສົບກັບໄພນໍ້າຖ້ວມ ຈຳນວນ 17 ບ້ານ ລວມມູນຄ່າ  17.190.000 ກີບ.