ຕອນເຊົ້າວັນທີ 12 ກັນຍາ 2018 ນີ້ ໜ່ວຍພັກ ພະແນກ ສະກັດກັ້ນ ແລະ ຕ້ານຢາເສບຕິດ+ສືບຂ່າວອາຍາ+ກວດກາ ແລະ ຄວບຄຸມຢາເສບຕິດ ທີ່ຂື້ນກັບຮາກຖານພັກຫ້ອງຕຳຫຼວດ ກອງບັນຊາການ ປກສ ແຂວງ ບໍລິຄຳໄຊ ໄດ້ໄຂກອງປະຊຸມໃຫຍ່ຂອງຕົນຂື້ນ ພາຍໃຕ້ການເປັນປະທານຂອງ ສະຫາຍ ພັນຕີ ພັດທະນາ ວົງຄຳສີ ເລຂາໜ່ວຍພັກ, ໂດຍການເປັນກຽດເຂົ້າຮ່ວມຂອງສະຫາຍ ພັນໂທ ຄຳແພງ ນຳພາວັນ ຄະນະພັກກອງບັນຊາການ, ເລຂາພັກຮາກຖານ ຫົວໜ້າຫ້ອງຕຳຫຼວດ, ມີເລຂາ ຄະນະໜ່ວຍພັກ, ແຂກຖືກເຊີນ ແລະ ບັນດາສະມະຊິກພັກ ເຂົ້າຮ່ວມ.

          3 ປີຜ່ານມາ ຄະນະພັກ, ສະມາຊິກພັກ ພາຍໃນໜ່ວຍ ໄດ້ເອົາໃຈໃສ່ຊີ້ນຳ ນຳພາບັນດາໜ້າວຽກທີ່ຮັບຜິດຊອບ ດ້ວຍຄວາມເປັນເຈົ້າການ ຈົນສາມາດເຮັດສຳເລັດໜ້າທີ່ໃນຫລາຍໆດ້ານ ເປັນຕົ້ນ: ໄດ້ສຸ່ມໃສ່ວຽກງານສຶກສາອົບຮົມນຳພາແນວຄິດໃຫ້ແກ່ພະນັກງານສຳມະຊິກພັກ-ພະນັກງານນັກຮົບ ໃຫ້ມີຄຸນສົມບັດສິນທຳປະຕິວັດ ເຊື່ອໝັ້ນຕໍ່ການນໍາພາຂອງພັກ, ມີສະຕິຕໍ່ການຈັດຕັ້ງ, ດ້ານວຽກງານວິຊາສະເພາະ ກໍໄດ້ເອົາໃຈໃສ່ຊີ້ນຳນຳພາເຄື່ອນໄຫວເຮັດວຽກງານຕາມພາລະບົດບາດເຊິ່ງສາມາດຍາດໄດ້ຜົນສຳເລັດຫຼາຍດ້ານ ເຊັ່ນ: ວຽກງານສະກັດກັ້ນຕ້ານຢາເສບຕິດ: ມີຄະດີເກີດຂື້ນ 615 ເລື່ອງ, ຜູ້ຖືກຫາ 833 ຄົນ, ຍິງ 142 ຄົນ, ຄົນຕ່າງປະເທດ 39 ຄົນ, ຍິງ 01 ຄົນ, ຂອງກາງທີ່ຢຶດໄດ້ມີ ກັນຊາ 13.213 ກິໂລກຼາມ, ຢາບ້າ 722.432 ເມັດ, ຢາຝິ່ນ 7,5 ກິໂລກຼາມ, ເຮໂລອິນ 229 ແທ່ງ, ຝຸ່ນສີຂາວມີທາດຢາເສບຕິດປະເພດເຮໂລອິນ 14 ກິໂລກຼາມ, ຢາໄອ 04 ກິໂລກຼາມ, ນ້ຳຢາງກັນຊາ 33 ກິໂລກຼາມ, ນ້ຳຢາສານເຄມີຂັ້ນຕົ້ນ 2.880 ລິດ, ແກ່ນກັນຊາ 27.7 ກິໂລກຼາມ, ອຸປະກອນຕົ້ມກັນຊາ 01 ຊຸດ, ໝາກແຕກ 06 ໜ່ວຍ, ດິນລະເບີດ 01 ກິໂລກຼາມ,  ປືນ 64 ກະບອກ, ລົດໃຫຍ່ 49 ຄັນ, ລົດຈັກ 99 ຄັນ; ວຽກງານສືບຂ່າວອາຍາ: ເຂົ້າຮ່ວມມ້າງຄະດີສະເພາະ 13 ຄັ້ງ, ເກັບກຳຂໍ້ມູນເປົ້າໝາຍນຳຊອກ-ນຳຈັບໄດ້ 38 ຄັ້ງ; ວຽກງານກວດກາ ແລະ ຄວບຄຸມຢາເສບຕິດ: ຮັບຜູ້ເຄາະຮ້າຍເສບຢາເສບຕິດເຂົ້າປິ່ນປົວບໍາບັດ 320 ຄົນ, ຍິງ 09 ຄົນ, ສຶກສາອົບຮົມຜູ້ທີ່ມາປິ່ນປົ່ວບຳບັດ 120 ຄັ້ງ.

      ໃນໄລຍະຜ່ານມາ ກອງທຶນໜື່ງດວງໃຈບໍລິຄໍາໄຊຊ່ວຍເຫຼືອສັງຄົມ ໄດ້ຊຸກຍູ້ອຸປະກອນສິ້ວແກະສະຫຼັກ ຈຳນວນ 02 ຊຸດ, ຕຽງພ້ອມເຄື່ອງນອນ ຈຳນວນ 03 ຊຸດ ລວມມູນຄ່າ 22.000.000 ກີບ, ແຂວງອະນຸມັດເງິນຊື້ເຄື່ອງອັດດິນບ໋ອກ, ເຈາະນ້ຳບາດານ ແລະ ເຄື່ອງໂທລະໂຄ້ງ ລວມມູນຄ່າ 128.000.000 ກີບ, ໄດ້ຮັບໂຄງການຂອງລັດໃນການກໍ່ສ້າງ ແລະ ບູລະນະສູນປິ່ນປົວບຳບັດໜອງດົງ ມູນຄ່າ 4.100.000.000 ກີບ. ວຽກງານປັບປຸງກໍ່ສ້າງພາຍໃນພັກ ແລະພະນັກງານ ໃນໄລຍະຜ່ານມາໄດ້ເອົາໃຈໃສ່ສ້າງມະຫາຊົນກ້າວໜ້າຂະຫຍາຍເຂົ້າພັກໄດ້ 15 ສະຫາຍ. ຈາກນັ້ນ ກໍ່ໄດ້ຜ່ານມະຕິຕົກລົງຂອງຄະນະປະຈຳພັກກອງບັນຊາການ ປກສ ແຂວງ ສະບັບ ເລກທີ່ 316/ຄພ.ປກສ.ຂບຊ ລົງວັນທີ່ 02 ກໍລະກົດ 2018 ວ່າດ້ວຍການສ້າງຕັ້ງໜ່ວຍພັກທີ່ຂື້ນກັບຮາກຖານພັກຫ້ອງຕຳຫຼວດ ຄື: 1.ໜ່ວຍພັກພະແນກ ສະກັດກັ້ນ ແລະ ຕ້ານຢາເສບຕິດ, 2. ໜ່ວຍພັກສືບຂ່າວອາຍາ, 3. ໜ່ວຍພັກກວດກາ ແລະ ຄວບຄຸມຢາເສບຕິດ. ໂອກາດດຽວກັນ ພາຍຫລັງຄະນະໜ່ວຍພັກຊຸດເກົ່າໄດ້ກ່າວອຳລາໜ້າທີ່, ກອງປະຊຸມ ກໍໄດ້ມີການປ່ອນບັດຄັດເລືອກເອົາຄະນະໜ່ວຍພັກຊຸດໃໝ່, ຜ່ານການປ່ອນບັດ ແລະ ກອງປະຊຸມຄັ້ງປະຖົມມະລຶກ ໜ່ວຍພັກພະແນກ ສະກັດກັ້ນ ແລະ ຕ້ານຢາເສບຕິດເລືອກໄດ້ ສະຫາຍ ພັນຕີ ພັດທະນາ ວົງຄຳສີ ເປັນເລຂາ, ສະຫາຍ ພັນຕີ ສາຍສຸນີ ພຸດທະພັນ ເປັນຮອງເລຂາ, ສະຫາຍ ຮ້ອຍເອກ ວຽງພອນ ສຸລິນທອນ ເປັນກຳມະການກວດກາ; ໜ່ວຍພັກສືບຂ່າວອາຍາ ເລືອກໄດ້ສະຫາຍ ພັນຕີ ໄຊມະນີ ເພັງສະໄໝ ເປັນເລຂາ, ສະຫາຍ ຮ້ອຍເອກ ທອງວັນໄຊ ພົມມະວົງ ເປັນຮອງເລຂາ, ສະຫາຍ ພັນຕີ ນາງ ຜາວຽງ ເພັງຈັນໂທ ເປັນກຳມະການກວດກາ  ແລະ ໜ່ວຍພັກກວດກາ ແລະ ຄວບຄຸມຢາເສບຕິດ ເລືອກໄດ້ ສະຫາຍ ພັນຕີ ວິລະພົງ ວິຊຸນດາລາ ເປັນເລຂາ, ພັນຕີ ຄຳຫຼ້າ ດວງສົງຄາມ ເປັນຮອງເລຂາ, ພັນຕີ ນາງ ພວງເພັດ ວໍລະວົງ ເປັນກຳມະການກວດກາ.

          ຕອນທ້າຍ ຍັງໄດ້ຮັບຟັງຄຳເຫັນໂອ້ລົມຈາກ ສະຫາຍ ພັນໂທ ຄຳແພງ ນຳພາວັນ ເຊິ່ງໄດ້ສະແດງຄຳຍ້ອງຍໍຊົມເຊີຍຕໍ່ຜົນສຳເລັດການນຳພາຂອງຄະນະໜ່ວຍພັກ ແລະ ສະມະຊິກພັກທີ່ຍາດມາໄດ້ພ້ອມທັງເນັ້ນໃຫ້ຄະນະໜ່ວຍພັກຊຸດໃໝ່ ຈົ່ງເພີ່ມທະວີເອົາໃຈໃສ່ເຮັດວຽກງານນຳພາແນວຄິດໃຫ້ເປັນປົກກະຕິຕໍ່ເນື່ອງ, ເພີ່ມທະວີຄວາມສາມັກຄີໃຫ້ເປັນປຶກແຜ່ນ ແລະ ເອົາໃຈໃສ່ວຽກງານປັບປຸງຂະຫຍາຍພັກຄຽງຄູ່ກັບການເຮັດວຽກງານວິຊາສະເພາະໃຫ້ໄດ້ຮັບຜົນສູງ.