ໃນວັນທີ 13 ກັນຍາ 2018 ຢູ່ທີ່ຫ້ອງຮັບຮອງຂອງແຂວງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ໄດ້ເປັນກຽດຕ້ອນຮັບ ພຣະອາຈານໃຫຍ່ ເຫວດ ມະເສໄນ ຮອງປະທານອົງການພຸດທະສາສະໜາສຳພັນລາວ ພ້ອມຄະນະ ເນື່ອງໃນໂອກາດໄດ້ມາເຄື່ອນໄຫວຊຸກຍູ້ຕິດຕາມວຽກງານ ອົງການພຸດທະສາສະໜາສຳພັນລາວ ຢູ່ຂັ້ນແຂວງ ກໍ່ຄື ການລົງເຜີຍແຜ່ສິນລະທຳ ແລະ ການປະຕິບັດກຳມະຖານ ໂດຍການນຳພາທາງຂອງທ່ານ ລຳສະໄໝ ວໍລະສານ ຄະນະປະຈຳພັກແຂວງ ກຳມະການສູນກາງແນວລາວສ້າງຊາດ ປະທານແນວລາວສ້າງຊາດແຂວງບໍລິຄຳໄຊ.

    ໂອກາດນີ້ ທ່ານເຈົ້າແຂວງບໍລິຄຳໄຊ ໄດ້ລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຂວງໂດຍຫຍໍ້ ໃຫ້ຄະນະກຳມາທິການເຜີຍແຜ່ສິນລະທຳໄດ້ຮັບຊາບ ວ່າ ຜ່ານການຊີ້ນຳ-ນຳພາຂອງຄະນະບໍລິຫານງານພັກແຂວງແຕ່ລະຂັ້ນ ເຫັນວ່າທົ່ວແຂວງຍັງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍດີໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ  ຢູ່ໃນລະດັບ 8,3 ສ່ວນຮ້ອຍ, ລາຍຮັບສະເລ່ຍ 2.500 ໂດລ່າຕໍ່ຄົນຕໍ່ປີ, ສຳລັບການພັດທະນາແມ່ນພົບຄວາມຫຍູ້ງຍາກຫຼາຍພໍສົມຄວນ ໂດຍສະເພາະການພັດທະນາທ້ອງຖິ່ນມີຫຼາຍດ້ານ ແຕ່ການສະໜອງແຫຼ່ງທຶນພັດທະນາມີໜ້ອຍ, ສຳລັບການຈັດເກັບລາຍຮັບໄດ້ຕາມຄາດໝາຍ ແລະ ລື່ນຄາດໝາຍໃນບາງຂະແໜງການ, ດ້ານລາຍຈ່າຍເຫັນວ່າປະຕິບັດໄດ້ຕາມແຜນການທີ່ວາງໄວ້ ເປັນຕົ້ນແມ່ນຈ່າຍເງິນເດືອນໃຫ້ພະນັກງານ-ລັດຖະກອນທັນກັບເວລາ, ປະຈຸບັນ ແຂວງໄດ້ສູມໃສ່ແກ້ໄຂວຽກງານຈຸດສູມ 4 ເຖື່ອນ ຄື: ຄົນເຖື່ອນ, ລົດເຖື່ອນ, ອາວຸດເຖື່ອນ ແລະ ສິນຄ້າເຖື່ອນ. ໃນໄລຍະລະດູຝົນຜ່ານມາເຮັດໃຫ້ 6 ເມືອງ, 190 ບ້ານຖືກຜົນກະທົບຢ່າງໜັກໜ່ວງ, ມີເນື້ອທີ່ທຳການຜະລິດນາປີ ເສຍຫາຍ 10 ພັນກວ່າເຮັກຕ່າ, ພື້ນຖານໂຄ່ງລ່າງກໍ່ໄດ້ຮັບຜົນເສຍຫາຍຫຼາຍສົມຄວນ ປະເມີນຄວາມເສຍຫາຍໃນເບື້ອງຕົ້ນ 117 ຕື້ກວ່າກີບ. ເພື່ອແກ້ໄຂບັນຫາດັ່ງກ່າວນັ້ນ ແຂວງຈະໄດ້ສູມໃສ່ປູກພືດທົດແທນໃນລະດູແລ້ງ. ຫຼັງຈາກນັ້ນ ພຣະອາຈານໃຫຍ່ ເຫວດ ມະເສໄນ ກໍ່ໄດ້ຍ້ອງຍໍຊົມເຊີຍຜົນສຳເລັດ ໃນການຊີ້ນຳ-ນຳພາຂອງຄະນະບໍລິຫານງານພັກແຂວງໃນໄລຍະຜ່ານມາ ພ້ອມສະເໜີຈຸດປະສົງການລົງເຄື່ອນໄຫວຊຸກຍູ້ຕິດຕາມວຽກງານ ອົງການພຸດທະສາສະໜາສຳພັນລາວ ຢູ່ແຂວງບໍລິຄຳໄຊໃນຄັ້ງນີ້ ໃຫ້ທ່ານເຈົ້າແຂວງໄດ້ຮັບຊາບ ອີກດ້ວຍ.