ໃນວັນທີ 11 ກັນຍາ 2018 ຢູ່ທີຫ້ອງຊຸມຊັ້ນ II ຂອງຫ້ອງວ່າການປົກຄອງເມືອງ ວຽງທອງ, ແຂວງ ບໍລິຄໍາໄຊ ໄດ້ຈັດກອງປະຊຸມຊຸກຍູ້, ສັງລວມລາຍຮັບຄ່າທໍານຽມ ແລະ ຄ່າບໍລິການຂອງເມືອງ ໂດຍເປັນກຽດເຂົ້າຮ່ວມເປັນປະທານຂອງ ທ່ານ ອາລຸນສັກ ປະທໍາມະວົງ ຄະນະປະຈໍາພັກເມືອງ, ຮອງເຈົ້າເມືອງ ວຽງທອງ, ມີຄະນະຫ້ອງວ່າການ, ຫົວໜ້າຫ້ອງການ, ຮອງຫ້ອງການ ເຂົ້າຮ່ວມ.

          ເພື່ອເປັນການຈັດເກັບລາຍຮັບຈາກຄ່າທຳນຽມ ແລະ ຄ່າບໍລິການຕ່າງໆພາຍໃນເມືອງ ໃຫ້ໄດ້ຕາມຄາດໝາຍທີ່ກຳນົດໄວ້ ຫ້ອງການ-ການເງິນເມືອງ ໄດ້ຜ່ານຕາຕະລາງສັງລວມລາຍຮັບຄ່າທໍານຽມ ແລະ ຄ່າບໍລິການຂອງເມືອງປະຈໍາເດືອນ 8 ສົກປີ 2018 ເຊິ່ງມີບາງຂົງເຂດ, ບາງຫ້ອງການຈໍານວນໜຶ່ງສາມາດເກັບລາຍຮັບໄດ້ຕາມແຜນທີ່ຄາດໝາຍໄວ້ ແຕ່ສົມທຽບໃສ່ແຜນແລ້ວ ຍັງມີບາງຫ້ອງການ ທີ່ຍັງບໍ່ສາມາດເກັບລາຍຮັບໄດ້ຕາມແຜນ, ບາງຫົວໜ່ວຍລາຍຮັບ ຍັງບໍ່ທັນໄດ້ເຂົ້າເຖີງ, ບັນດາສະຫາຍທີ່ເຂົ້າຮ່ວມກອງປະຊຸມ ກໍ່ໄດ້ປະກອບຄໍາຄິດ-ຄໍາເຫັນໃສ່ແຜນການ ເພື່ອຫາວິທີທາງເກັບລາຍຮັບຢ່າງກົງໄປກົງມາເພື່ອຄວາມເປັນເອກະພາບ ແລະ ໃຫ້ບັນດາຂົງເຂດ, ຫ້ອງການທີປະຕິບັດບໍ່ທັນໄດ້ນັ້ນ ນໍາໄປສືບຕໍ່ຈັດຕັ້ງປະຕິບັດໃຫ້ໄດ້ຕາມແຜນ ຫຼື ລື່ນແຜນ.

           ຕອນທ້າຍ ທ່ານ ປະທານກອງປະຊຸມ ກໍ່ໄດ້ໃຫ້ຄໍາຄິດເຫັນຊີ້ນໍາໃນການເກັບລາຍຮັບ  ແລະ ໃຫ້ບັນດາຫ້ອງການຕ້ອງເພີ່ມທະວີຄວາມຮັບຜິດຊອບສູງ ສືບຕໍ່ເກັບລາຍຮັບໃຫ້ໄດ້ຄົບຕາມຫົວໜ່ວຍລາຍຮັບທີ່ມີ ພ້ອມທັງຄຸ້ມຄອງການຈັດເກັບລາຍຮັບບໍ່ໃຫ້ມີການຮົ່ວໄຫຼ.