ເພື່ອເຮັດໃຫ້ການຈັດຕັ້ງປະຕິບັດວຽກງານຂອງຄະນະພັກ - ຄະນະນຳ ພາຍໃນແຂວງບໍລິຄຳໄຊ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ປະສິດທິພາບສູງ, ໃນວັນທີ 13 ກັນຍານີ້ ຢູ່ຫ້ອງປະຊຸມເບີ 2 ຫ້ອງວ່າການປົກຄອງແຂວງ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ໄດ້ລົງມາຢ້ຽມຢາມ ແລະ ຊີ້ນຳວຽກງານຢູ່ແຂວງບໍລິຄຳໄຊ, ຕ້ອນຮັບໂດຍທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ມີບັນດາຄະນະປະຈຳພັກແຂວງ, ກຳມະການພັກແຂວງ, ພະນັກງານຫຼັກແຫຼ່ງ, ສະມາຊິກສະພາປະຊາຊົນແຂວງ, ພະນັກງານນຳພາ-ຄຸ້ມຄອງຢູ່ບັນດາພະແນກການ, ຫ້ອງການ ພາຍໃນແຂວງເຂົ້າຮ່ວມ.

   ທ່ານ ປອ ກອງແກ້ວ ໄຊສົງຄາມ ໄດ້ລາຍງານຫຍໍ້ ກ່ຽວກັບຜົນສຳເລັດການຊີ້ນຳ-ນຳພາແຜນພັດທະນາເສດຖະກິດ-ສັງຄົມຂອງແຂວງ ​ໃນ​ໄລຍະ​ຜ່ານ​ມາ ​ເຊິ່ງໂດຍລວມແລ້ວ ແຂວງບໍລິ​ຄຳ​ໄຊ ຍັງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດມີການຂະຫຍາຍໂຕຢ່າງຕໍ່ເນື່ອງ, ຂົງເຂດວັດທະນະທຳສັງຄົມ ແລະ ຂົງເຂດຕ່າງໆ ກໍໄດ້ຮັບການບູລະນະ, ຊີວິດການເປັນຢູ່ຂອງສະມາຊິກພັກ, ພະນັກງານ, ກຳລັງປະກອບອາວຸດ ແລະ ປະຊາຊົນບັນດາເຜົ່າ ທາງດ້ານວັດຖຸ ແລະ ຈິດໃຈນັບມື້ນັບດີຂຶ້ນ, ຄວາມທຸກຍາກນັບມື້ນັບຕີຖອຍເປັນກ້າວໆ ເຮັດໃຫ້ຕົວເມືອງ ແລະ ຊົນນະບົດຍັບເຂົ້າຫາກັນ. ແຂວງຖືສຳຄັນ ແລະ ເອົາໃຈໃສ່ແກ້ໄຂບັນຫາທີ່ເປັນຈຸດສຸມຮີບດ່ວນ ເປັນຕົ້ນແມ່ນການແກ້ໄຂ 4 ເຖື່ອນ ເຊັ່ນ: ຄົນເຖື່ອນ, ລົດເຖື່ອນ, ອາວຸດເຖື່ອນ ແລະ ສິນຄ້າເຖື່ອນ. ແຂວງ ໄດ້ກຳນົດເອົາ 9 ຫົວຂໍ້ ເປັນວຽກງານຈຸດສຸມທີ່ຕ້ອງໄດ້ສຸມໃສ່ປັບປຸງ ຄື: ວຽກງານ ປກຊ-ປກສ, ວຽກງານປັບປຸງອຳນາດການປົກຄອງບ້ານໃຫ້ມີຄວາມເຂັ້ມແຂງ, ວຽກງານແກ້ໄຂຄວາມທຸກຍາກ, ບັນຫາທີ່ດິນ, ບັນຫາຢາເສບຕິດ, ບັນຫາສາສະໜາ, ບັນຫາອຸປະຕິເຫດຕາມທ້ອງຖະໜົນ, ບັນຫາການຕັ້ງສະນຳ ແລະ ບັນຫາການຂັດຂວາງການປະຕິບັດວຽກງານຂອງເຈົ້າໜ້າທີ່. ສຳລັບການຈັດຕັ້ງປະຕິບັດແຜນງົບມານແຫ່ງລັດສົກປີ 2018 ໃນໄລຍະ 8 ເດືອນຕົ້ນປີ ສາມາດປະຕິບັດການເກັບລາຍຮັບໄດ້ທັງໝົດ 601,66 ຕື້ກີບທຽບໃສ່ແຜນການປີເທົ່າກັບ 72,73 ສ່ວນຮ້ອຍ, ລາຍຮັບພູດສູນກາງປະຕິບັດໄດ້ 471,71 ຕື້ກີບ, ລາຍຮັບພູດທ້ອງຖິ່ນ 129 ຕື້ກວ່າກີບ, ລາຍຮັບດູນດຽ່ງຈາກສູນກາງປະຕິບັດໄດ້ 186 ຕື້ກວ່າກີບ, ປະຕິບັດລາຍຈ່າຍຕາມແຜນການທີ່ວາງໄວ້ ໃນນັ້ນ ສາມາດຈ່າຍເງິນເດືອນ, ເງິນນະໂຍບາຍຂອງພະນັກງານປະຈຳການ ແລະ ພະນັກງານບຳນານໄດ້ທັນເວລາໃນແຕ່ລະເດືອນ. ໄລຍະລະດູຝົນປີນີ້ ມີເນື້ອທີ່ທຳການຜະລິດຂອງຊາວກະສິກອນໃນ 6 ຕົວເມືອງ, 190 ບ້ານ, 8.062 ຄອບຄົວ ຖືກຜົນກະທົບຈາກໄພນໍ້າຖ້ວມ, ໃນນັ້ນ ເນື້ອທີ່ນາຖືກນ້ຳຖ້ວມ 11.643 ເຮັກຕາ ເສຍຫາຍ 10.150 ເຮັກຕາ, ເນື້ອທີ່ສວນ 2.507 ເຮັກຕາ ເສຍຫາຍ 1.478 ເຮັກຕາ, ງົວຕາຍ 99 ໂຕ, ຄວາຍ 31 ໂຕ, ແບ້ 108 ໂຕ, ໝູ 61 ໂຕ, ສັດປີກ 6 ພັນກວ່າໂຕ ແລະ ປາ 1 ລ້ານກວ່າໂຕ, ພື້ນຖານໂຄ່ງລ່າງ ໄດ້ຮັບຜົນເສຍຫາຍເປັນຈຳນວນຫຼາຍ. 

   

      ເພື່ອສືບຕໍ່ປະຕິບັດແກ້ໄຂຂໍ້ຄົງຄ້າງ ແລະ ສິ່ງທ້າທາຍທີ່ຍັງບໍ່ທັນບັນລຸໄດ້ນັ້ນ ທ່ານ ຈັນສີ ໂພສີຄຳ ຫົວໜ້າຄະນະຈັດຕັ້ງສູນກາງພັກ ໄດ້ເນັ້ນໃຫ້ຄະນະບໍລິຫານພັກແຂວງ ຕ້ອງ​ໄດ້ຕັດສິນໃຈ ແກ້ໄຂໃຫ້ຂາດຕົວຕໍ່ກັບບັນຫາທີ່ເກີດຂຶ້ນດ້ວຍເຫດ ແລະ ຜົນ, ຜັນຂະຫຍາຍເນື້ອໃນຈິດໃຈຂອງກອງປະຊຸມສຳມະນາຂອງແຂວງເຂົ້າສູ່ຊີວິດຕົວຈິງ, ລົງເກັບກຳຂໍ້ມູນແຕ່ລະດ້ານຢ່າງລະອຽດຂອງຜົນເສຍຫາຍຈາກໄພນໍ້າຖ້ວມ ກະກຽມແຜນຟື້ນຟູ ລະດົມປະຊາຊົນເຂົ້າໃນການຜະລິດ, ຊຸກຍູ້ການຜະລິດລະດູແລ້ງຢ່າງແຂງແຮງ ​ແລະ ຖືເອົາການແກ້ໄຂຜົນຮ້າຍຈາກໄພທຳມະຊາດເປັນຄວາມຮັບຜິດຊອບຂອງຄະນະນຳແຕ່ລະຂັ້ນ, ພະນັກງານຫຼັກແຫຼ່ງ, ພະນັກງານນຳພາຕ້ອງມີຄວາມຮັບຮູ້, ມີຄວາມເຂົ້າໃຈ, ມີຄວາມເປັນເອກະພາບສູງຕໍ່ຍຸດທະສາດວຽກງານກໍ່ສ້າງພັກ-ພະນັກງານ ເຮັດໃຫ້ມີຄວາມເຕີບໃຫຍ່, ເຂັ້ມແຂງ, ບັນລຸໃຫ້ໄດ້​ໃນ​ການສ້າງພັກປອດໃສ, ເຂັ້ມແຂງ, ໜັກແໜ້ນ, ຜັນຂະຫຍາຍ, ເຊື່ອມຊຶມ ມະຕິ, ຄຳສັ່ງຂອງຂັ້ນເທິງໃຫ້ກວ້າງຂວງ ​ແລະ ມີຄວາມເຂົ້າໃຈຢ່າງເລິກເຊິ່ງ.