ໃນຕອນບ່າຍ ວັນທີ 11 ກັນຍາ 2018 ນີ້ ທ່ານ ນາງ ບຸນຊອນ ວໍລະສານ ກຳມະການພັກແຂວງ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານຄະນະບໍລິຫານງານສະຫະພັນແມ່ຍິງແຂວງ ບໍລິຄໍາໄຊ ໄດ້ລົງສຶກສາອົບຮົມນັກໂທດ, ຕ້ອງຫາ ແລະ ຜູ້ຖືກດັດສ້າງ ຢູ່ທີ່ຄ້າຍຄຸມຂັງ-ດັດສ້າງ ໜອງສາມຂາ ແຂວງ ບໍລິຄໍາໄຊ ໂດຍເປັນກຽດເຂົ້າຮ່ວມຂອງ ທ່ານ ພັນໂທ ສີລາ ພົມມະຈັນ ຫົວໜ້າຄ້າຍຄຸມຂັງ-ດັດສ້າງ ປກສ ແຂວງ.

        ທ່ານ ນາງ ບຸນຊອນ ວໍລະສານ ໄດ້ຍົກໃຫ້ເຫັນຫຼາຍບັນຫາທີ່ຈໍາເປັນຂອງການສຶກສາອົບຮົມ ເປັນຕົ້ນດ້ານການເມືອງ-ແນວຄິດ ແລະ ການປະພຶດຂອງຄົນເຮົາກ່ຽວກັບຄວາມດີ ແລະ ຮ້າຍ ທີ່ສົ່ງຜົນກະທົບໂດຍກົງຕໍ່ຕົນເອງ, ຜູ້ອື່ນ ແລະ ສັງຄົມ, ທ່ານໄດ້ອະທິບາຍໃຫ້ຮູ້ແຈ້ງ ກ່ຽວກັບແນວທາງນະໂຍບາຍຂອງພັກ-ລະບຽບກົດໝາຍຂອງລັດ ທີ່ຍຶດໝັ້ນຢ່າງໜຽວແໜ້ນຕາມເສັ້ນທາງສັງຄົມນິຍົມ ເພື່ອກ້າວສູ້ຄວາມວັດທະນະຖາວອນຂອງປະເທດຊາດ ແລະ ພ້ອມກັນເຮັດໜ້າທີ່ 2 ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຮຸ່ງເຮືອງ, ສິວິໄລກ້າວຂື້ນຢ່າງບໍ່ຢຸດຢັ້ງ ດ້ວຍກໍາລັງແຮງຈາກທຸກພາກສ່ວນພາຍໃນຊາດ, ຄວາມສະເໝີພາບລະຫວ່າງຍິງ-ຊາຍ ທີ່ບໍ່ຈໍາແນກເພດ, ຖານະທາງດ້ານສັງຄົມ, ລະດັບການສຶກສາ, ຄວາມເຊື່ອຖື, ຊົນເຜົ່າ ລ້ວນແລ້ວແຕ່ສະເໝີພາບກັນຕໍ່ໜ້າກົດໝາຍ ແລະ ພົນລະເມືອງລາວ ຍິງ-ຊາຍມີສິດເທົ່າທຽມກັນທາງດ້ານການເມືອງ, ເສດຖະກິດ-ສັງຄົມ ແລະ ຄອບຄົວ, ເຄົາລົບສິດເປັນເຈົ້າຂອງຕົນເອງ ແລະ ຄົນອື່ນ ບົນພື້ນຖານຄວາມຖືກຕ້ອງ,  ທ່ານໄດ້ເນັ້ນອີກວ່າ: ຈົ່ງເອົາໃຈໃສ່ປະຕິບັດຄວາມດີເຊິ່ງເກີດຂື້ນຈາກ 5 ບໍ່ ແລະ ປະກົດການຫຍໍ້ທໍ້ເກີດຈາກ 3 ຄວາມ ຄື: 1 ບໍ່ຮ້າຍ, ບໍ່ດ່າ, ບໍ່ຂ້າ, ບໍ່ຕີ, ບໍ່ໃຊ້ຄວາມຮຸນແຮງເຊິ່ງກັນ ແລະ ກັນ, 2 ບໍ່ລັກ, ບໍ່ໂລບ, ບໍ່ສໍ້ໂກງ, ບໍ່ຮັບສິນບົນ, 3 ບໍ່ຫຼິ້ນກີນຟຸມເຟືອຍ, 4 ບໍ່ຕົວະ, 5 ບໍ່ເມົາ; ປະກົດການຫຍໍ້ທໍ້ເກີດຂື້ນຈາກ 03 ຄວາມ ຄື:  ຄວາມໂກດແຄ້ນ, ຄວາມໂລບມາກໂລພາ, ຄວາມຫຼົງ.  ທ່ານຍັງໄດ້ຢ້ຳຕື່ມອີກວ່າ: ການປະຕິບັດໂທດ ແມ່ນການນໍາມາຝຶກຝົນແນວຄິດຈິດໃຈໃຫ້ຮູ້ອົດ, ຮູ້ທົນ ແລະ ມີຄວາມຮູ້ສຶກກິນແໜງແຄງໃຈຕໍ່ການກະທໍາຜິດຂອງຕົນ, ເອົາໃຈໃສ່ປະຕິບັດລະບຽບຂອງຄ້າຍຄຸມຂັງຢ່າງເຂັ້ມງວດ ເພື່ອຈະໄດ້ຮັບການອະໄພຍະໂທດ, ຜ່ອນໂທດຈາກຂັ້ນເທິງຕໍ່ໄປ ແລະ ເມື່ອໄດ້ຮັບການປະຕິບັດໂທດ, ຝຶກຝົນຫຼໍ່ຫຼອມຈົນສໍາເລັດແລ້ວ ກໍ່ຈົ່ງກັບໄປເປັນພົນລະເມືອງທີ່ດີຂອງສັງຄົມ ແລະ ຄອບຄົວ ເພື່ອປະກອບສ່ວນສ້າງສາພັດທະນາປະເທດຊາດ ກໍ່ຄືຄອບຄົວຂອງຕົນໃຫ້ມີຄວາມກ້າວໜ້າ ແລະ ມີຊີວິດໃຫມ່ທີ່ສົດໃສ່ຢູ່ໃນສັງຄົມ.