ຕອນບ່າຍວັນທີ 11 ກັນຍາ 2018 ນີ້ ໜ່ວຍພັກພະແນກຈາລະຈອນ ແລະ ໜ່ວຍພັກພະແນກສະກັດກັ້ນ ແລະ ຕ້ານອັກຄີໄພ ທີ່ຂື້ນກັບຮາກຖານພັກ ຫ້ອງຕຳຫຼວດ ໄດ້ເປີດກອງປະຊຸມໃຫຍ່ຂອງຕົນຂື້ນຢ່າງເປັນທາງການ ທີ່ຫ້ອງປະຊຸມໃຫຍ່ ກອງບັນຊາການ ປກສ ແຂວງ ບໍລິຄຳໄຊ ໂດຍການໃຫ້ກຽດເຂົ້າຮ່ວມເປັນປະທານຂອງສະຫາຍ ພັນໂທ ຄຳແພງ ນຳພາວັນ ຄະນະພັກກອງບັນຊາການ ເລຂາພັກຮາກຖານ ຫົວໜ້າ ຫ້ອງຕຳຫຼວດ, ມີສະຫາຍ ພັນຕີ ສຸກໄລວັນ ແກ້ວດວງສີ ເລຂາໜ່ວຍພັກພະແນກຈາລະຈອນ-ພະແນກສະກັດກັ້ນ ແລະ ຕ້ານອັກຄີໄພ, ແຂກຖືກເຊີນ, ບັນດາສະມາຊິກພັກ ສົມບູນ - ສໍາຮອງ ເຂົ້າຮ່ວມ.

    ສະຫາຍ ເລຂາ ໜ່ວຍພັກພະແນກຈາລະຈອນ-ພະແນກສະກັດກັ້ນແລະຕ້ານອັກຄີໄພ,  ໄດ້ຕາງໜ້າໃຫ້ຄະນະໜ່ວຍພັກ ຂື້ນຜ່ານບົດລາຍງານການເມືອງທັງ 03 ພາກຕໍ່ທີ່ປະຊຸມ ເຊີ່ງໄດ້ຍົກໃຫ້ເຫັນຜົນງານໃນການຊີ້ນຳ-ນຳພາຈັດຕັ້ງປະຕິບັດໜ້າທີ່ວຽກງານຫຼາຍດ້ານ,  ດ້ານການເມືອງ - ແນວຄິດ ໄດ້ຖືເອົາການດຳເນີນຊີວິດການເມືອງໃຫ້ຖັນແຖວພະນັກງານສະມາຊິກ, ພະນັກງານ-ນັກຮົບ ຕິດພັນກັບວຽກງານນະໂຍບາຍເປັນບັນຫາສຳຄັນຕົ້ນຕໍ, ມີລະບຽບວິໄນຕາມ 03 ທາດແທ້ 07 ມູນເຊື້ອຂອງກຳລັງປ້ອງກັນຄວາມສະຫງົບວາງອອກຢ່າງເຂັ້ມງວດ, ມີຄຸນສົມບັດສິນທຳປະຕິວັດ ເຊື່ອໝັ້ນຕໍ່ການນໍາພາຂອງພັກ, ດ້ານວຽກງານວິຊາສະເພາະ ໃນຕະຫຼອດ 3 ປີຜ່ານມາ ໄດ້ຮັບຜົນສໍາເລັດຫຼາຍດ້ານ ເຊັ່ນ: ໜ່ວຍພັກພະແນກຈາລະຈອນ: ມີຄະດີອຸບັດຕິເຫດທີ່ເກີດຂື້ນທັງໝົດ 867  ເລື່ອງ ແກ້ໄຂແລ້ວ 841 ເລື່ອງ ເທົ່າກັບ 97%, ລົງໂຄສະນາເຜີຍແຜ່ລະບຽບ, ກົດໝາຍ, ນິຕິກໍາຕ່າງໆ ທີ່ພົວພັນເຖິງຄວາມປອດໄພທາງຖະໜົນໄດ້ 52 ຄັ້ງ, ມີຜູ້ເຂົ້າຮ່ວມ 20.353 ຄົນ. ວຽກງານຈາລະຈອນ-ທາງຫຼວງ: ລົງປະຈຳປ້ອມລະບາຍການສັນຈອນ ຈັດສັນຄວາມເປັນລະບຽບຮຽບຮ້ອຍ 676 ຄັ້ງ, ກວດກາພາຫະນະ 13.709 ຄັນ ພົບຜູ້ລ່ວງລະເມີດ 5.152 ຄົນ, ກັກລົດຈັກແລະ ລົດໃຫຍ່ໄດ້ 236 ຄັນ ແລະ ກັກລົດທີ່ຄົນຮ້າຍລັກມາໄດ້ 05 ຄັນ, ກັກເອກະສານລົດ ແລະ ໃບຂັບຂີ່ຜູ້ທີ່ລະເມີດລະບຽບການສັນຈອນ 160 ສະບັບ ແກ້ໄຂໃນຮູບການສຶກສາອົບຮົມ-ປັບໄໝ 248 ລາຍການ ເທົ່າກັບ 62,62%, ກວດຍຶດຂອງກາງຢາບ້າ 300 ເມັດ, ຄັນຊາ 900 ກິໂລກຼາມ ແລະ ໄມ້ຫວງຫ້າມຈໍານວນໜື່ງ. ໜ່ວຍພັກພະແນກສະກັດກັ້ນ ແລະ ຕ້ານອັກຄີໄພ: ອອກສະກັດກັ້ນ ຕ້ານອັກຄີໄພ 53 ຄັ້ງ, ລົງໂຄສະນາເຜີຍແຜ່ຕ້ານ ແລະ ສະກັດກັ້ນອັກຄີໄພຕາມສໍານັກງານ ຫ້ອງການ, ໂຮງຮຽນ ແລະ ບໍລິສັດຫ້າງຮ້ານໄດ້ 39 ຄັ້ງ ມີຜູ້ເຂົ້າຮ່ວມ 814 ຄົນ.

    ກອງປະຊຸມ ໄດ້ຜ່ານມະຕິຕົກລົງ ຂອງຄະນະປະຈຳພັກກອງບັນຊາການ ປກສ ແຂວງ ສະບັບ ເລກທີ່317/ຄພ.ປກສ.ຂບຊ ລົງວັນທີ່ 02 ກໍລະກົດ 2018 ວ່າດ້ວຍການສ້າງຕັ້ງໜ່ວຍພັກພະແນກຈາລະຈອນ ແລະ ໜ່ວຍພັກພະແນກສະກັດກັ້ນ ແລະ ຕ້ານອັກຄີໄພ ທີ່ຂື້ນກັບຮາກຖານພັກຫ້ອງຕຳຫຼວດ. ພ້ອມດຳເນີນການປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່, ຜ່ານການປ່ອນບັດ ແລະ ກອງປະຊຸມຄັ້ງປະຖົມມະລືກ ໜ່ວຍພັກພະແນກຈາລະຈອນ ເລືອກໄດ້ ສະຫາຍ ພັນຕີ ເດດ ມີໄຊ ເປັນເລຂາ, ສະຫາຍ ພັນຕີ ບຸນມີ ລໍວັນໄຊ ເປັນຮອງເລຂາ ແລະ ສະຫາຍ ພັນຕີ ສຸລິຈັນ ສີລາດວງໃຈ ເປັນກຳມະການກວດກາ; ໜ່ວຍພັກພະແນກສະກັດກັ້ນ ແລະ ຕ້ານອັກຄີໄພ ເລືອກໄດ້ ສະຫາຍ ພັນຕີ ຄຳສາວ ວົງແກ່ນຈັນ ເປັນເລຂາ, ສະຫາຍ ພັນຕີ ຄອນສະຫວັນ ຈະເລີນສຸກ ເປັນຮອງເລຂາ ແລະ ສະຫາຍ ຮ້ອຍໂທ ສີພອນ ເຮືອງປະເສີດ ເປັນກຳມະການກວດກາ .