ກອງປະຊຸມໃຫ່ຍ ຄັ້ງທີ II ໜ່ວຍພັກອົງການໄອຍະການປະຊາຊົນເຂດ I ໄດ້ຈັດຂື້ນໃນວັນທີ 13 ກັນຍາ 2018 ຢູ່ທີ່ຫ້ອງປະຊຸມ ອົງການໄອຍະການປະຊາຊົນແຂວງບໍລິິຄຳໄຊ ພາຍໃຕ້ການເປັນປະທານຂອງ ສະຫາຍ ອຳນວຍພອນ ມາລາວົງ ຜູ້ກວດກາໜ່ວຍພັກ ຫົວໜ້າອົງການໄອຍະການປະຊາຊົນເຂດ I, ໃຫ້ກຽດເຂົ້າຮ່ວມໂດຍ ສະຫາຍ ມະນີວົງ ຈັນທະວົງສາ ຄະນະປະຈຳພັກເມືອງ ປະທານກວດກາພັກ-ລັດເມືອງປາກຊັນ, ມີຄະນະໜ່ວຍພັກອ້ອມຂ້າງ ແລະ ສະມາຊິກພັກພາຍໃນໜ່ວຍ ເຂົ້າຮ່ວມ.

     ໃນພິທີໄດ້ຮັບຟັງການຜ່ານບົດລາຍງານການເມືອງທັງ 3 ພາກ ໂດຍໄດ້ຍົກເຫັນວ່າ ໃນໄລຍະທີ່ຜ່ານມາ ຄະນະພັກ ແລະ ສະມາຊິກທຸກສະຫາຍ ໄດ້ເອົາໃຈໃສ່ຊີ້ນຳ-ນຳພາ ແລະ ປະຕິບັດກົດລະບຽບຂອງພັກຢ່າງເຂັ້ມງວດ, ສຸມໃສ່ສຶກສາອົບຮົມວຽກງານການເມືອງ-ແນວຄິດ ເປັນກົກ ໂດຍສະເພາະການເຊື່ອມຊຶມນະໂຍບາຍ ແລະ ມະຕິຄຳສັ່ງຂອງພັກ, ປັບປຸງແບບແຜນການນຳພາ ແລະ ເຮັດວຽກຕາມຫຼັກການລວມສູນປະຊາທິປະໄຕ, ເອົາໃຈໃສ່ບຳລຸງສ້າງສະມາຊິກພັກ ໃຫ້ມີຄຸນນະພາບ, ປອດໃສ, ເຂັ້ມແຂງ ແລະ ໜັກແໜ້ນ ຈົນຍາດໄດ້ຜົນສຳເລັດໃນຫຼາຍດ້ານ ເຊິ່ງມັນໄດ້ສະແດງອອກ ຄື: ສາມາດຮັກສາໄດ້ໜ່ວຍພັກເຂັ້ມແຂງຮູ້ນຳພາຮອບດ້ານ 6 ປີ ຕິດຕໍ່ກັນ, ໃນສະໄໝຄະນະພັກຊຸດທີ I ໄດ້ຮັບຄະດີອາຍາ 563 ເລື່ອງ ແກ້ໄຂໄດ້ 560 ເລື່ອງ ໃນນັ້ນສັ່ງຟ້ອງຂື້ນສານ 459 ເລື່ອງ, ໂຈະ ຫຼື ຊັດມ້ຽນ 62 ເລື່ອງ, ສົ່ງໄປພາກສ່ວນອື່ນ 42 ເລື່ອງ, ແກ້ໄຂຄຳຮ້ອງຟ້ອງ ແລະ ຮ້ອງທຸກ 58 ເລື່ອງ, ກວດກາ ແລະ ອອກຄຳສັ່ງຈັບຕົວ 566 ສະບັບ, ກັກຂັງພາງ 902 ສະບັບ, ຄຳສັ່ງປ່ອຍຕົວ 259 ສະບັບ, ກວດກາການປະຕິບັດຄຳຕັດສິນຂອງສານ 67 ຄັ້ງ ແລະ ວຽກງານທີ່ສຳຄັນອື່ນໆ.

   ເພື່ອເປັນແນວທາງ ແລະ ແຜນການດຳເນີນງານໃຫ້ມີປະສິດທິພາບ ໃນສະເພາະໜ້າ ກອງປະຊຸມ ໄດ້ພ້ອມກັນຄົ້ນຄວ້າ, ປະກອບຄຳຄິດຄຳເຫັນໃສ່ບົດລາຍງານການເມືອງ ແລະ ບົດສຳຫຼວດການນຳພາຂອງຄະນະພັກ, ໃນນັ້ນ ໄດ້ຕີລາຄາດ້ານດີດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ຈາກການຊີ້ນຳ-ນຳພາ ໃນການຈັດຕັ້ງປະຕິບັດມະຕິກອງປະຊຸມໃຫ່ຍ ຄັ້ງທີ I ແລະ ໄດ້ເປັນເອກະພາບກັນຮັບຮອງເອົາທິດທາງແຜນການນຳພາ ໄລຍະ 5 ປີຕໍ່ໜ້າ ນັບແຕ່ປີ 2018-2023 ຂອງໜ່ວຍພັກອົງການໄອຍະການປະຊາຊົນເຂດ I.

    ໃນກອງປະຊຸມຄັ້ງນີ້ ຍັງໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກ ແລະ ເປັນເອກະສັນກັນ ເລືອກເອົາຄະນະພັກຊຸດໃໝ່ ໄດ້ 3 ສະຫາຍ ຄື: ສະຫາຍ ອຳນວຍພອນ ມາລາວົງ ເປັນເລຂາໜ່ວຍພັກ, ສະຫາຍ ກົງທອງ ແກ້ວວິໄລ ເປັນຮອງເລຂາ ແລະ ສະຫາຍ ອຸດົມພອນ ສີຫາລາດ ເປັນຜູ້ກວດກາ.

 

( ຈາກຊ້າຍຫາຂວາ: ສ.ຫ ກົງທອງ ແກ້ວວິໄລ, ສ.ຫ ອຳນວຍພອນ ມາລາວົງ, ສ.ຫ ອຸດົມພອນ ສີຫາລາດ )