ກອງປະຊຸມເປີດກວ້າງຄົບຄະນະບໍລິຫານງານພັກແຂວງ ຄັ້ງທີ 10 ສະໄໝທີ VI ໄດ້ໄຂຂຶ້ນໃນວັນທີ 13 ສິງຫາ 2018 ທີ່ຫ້ອງປະຊຸມຫ້ອງວ່າການປົກຄອງແຂວງ ແລະ ໄດ້ອັດລົງຢ່າງເປັນທາງການ ໃນວັນທີ 14 ສິງຫາທີ່ຜ່ານມາ ພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ ກໍາມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄໍາໄຊ ມີຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າພະແນກ, ກອງບັນຊາການ ປກຊ-ປກສ, ອົງການ, ຫ້ອງການ, ອົງການຈັດຕັ້ງມະຫາຊົນ, ພະນັກງານອາວຸໂສ-ບໍານານ ແລະ ແຂກຖືກເຊີນເຂົ້າຮ່ວມ.

       ກອງປະຊຸມຄັ້ງນີ້ບັນດາທ່ານທີ່ເຂົ້າຮ່ວມກອງປະຊຸມໄດ້ຮັບຟັງ ການລາຍງານການເຄື່ອນໄຫວວຽກງານຜ່ານມາ , ການຜ່ານຮ່າງນິຕິກຳ 2 ສະບັບ ແລະ ໄດ້ພ້ອມກັນສຸມໃສ່ປະກອບຄຳຄິດຄຳເຫັນ ດ້ວຍຄວາມຮັບຜິດຊອບສູງ, ພິຈາລະນາ ແລະ ຕົກລົງຮັບຮອງເອົາຜົນສຳເລັດການຊີ້ນຳ-ນຳພາ ຂອງຄະນະບໍລິຫານພັກແຂວງ ໃນການຈັດຕັ້ງປະຕິບັດຄາດໝາຍຕ່າງໆ ທີ່ມະຕິກອງປະຊຸມໃຫ່ຍ ສະໄໝທີ VI ຂອງອົງຄະນະພັກແຂວງ, ບົດສະຫຼຸບການຈັດຕັ້ງປະຕິບັດວຽກງານຮອບດ້ານ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2018, ທິດທາງ 6 ເືອນທ້າຍປີ 2018 ແລະ ກອງປະຊຸມຍັງໄດ້ພິຈາລະນາຮັບຮອງເອົາວຽກງານຈຸດສຸມທີ່ສຳຄັນຈຳນວນໜຶ່ງ ເປັນຕົ້ນແມ່ນວຽກງານກະກຽມໃຫ້ແກ່ກອງປະຊຸມ 3 ຂັ້ນ ຂອງເມືອງ, ການແກ້ໄຂບັນຫາ 4 ເຖື່ອນ, ຕິດຕາມກວດກາການປະຕິບັດແຜນການລົງທຶນຂອງລັດ ຈຳນວນ 157 ໂຄງການ, ມູນຄ່າ 21.902 ຕື້ກີບ ແລະ ສືບຕໍ່ປະເມີນໂຄງການລົງທຶນຂອງລັດຕາມແບບຟອມ ແລະ ກະກຽມຈັດສັນເຂົ້າແຜນປະຈຳປີ 2019, ສຸມໃສ່ປຸກລະດົມເດັກໃນເກນອາຍຸເຂົ້າໂຮງຮຽນໃນສົກ 2018-2019 ໃຫ້ຫຼາຍຂື້ນ, ປັບປຸງພື້ນຖານໂຄງລ່າງໃຫ້ແກ່ໂຮງຮຽນ ເປັນຕົ້ນແມ່ນຢູ່ເມືອງບໍລິຄັນ, ຄຳເກີດ ແລະ ວຽງທອງ, ເພີ່ມທະວີສຶກສາອົບຮົມການເມືອງ-ແນວຄິດ ໃນຖັນແຖວພະນັກງານ ແລະ ວຽກງານທີ່ສຳຄັນອື່ນໆອີກຈຳນວນໜຶ່ງ.

      ເພື່ອສືຕໍ່ເຮັດໃຫ້ອົງການບໍລິຫານລັດໄດ້ມີຄວາມເຂັ້ມແຂງ ທ່ານ ປອ ກອງແກ້ວ ໄຊສົງຄາມ ໄດ້ເນັ້ນຄະນະພັກທຸກຂັ້ນ ຈົ່ງເພີ່ມທະວີເຮັດໃຫ້ແຂວງບໍລິຄຳໄຊມີຄວາມສະຫງົບຢ່າງໜັກແໜ່ນ ພ້ອມທັງສະກັດກັ້ນ ແລະ ທັບມ້າງທຸກກົນອຸບາຍ ຂອງກຸ່ມຄົນບໍດີ, ປຸກລະດົມທົ່ວສັງຄົມເຂົ້າຮ່ວມໃນການແກ້ໄຂປະກົດການຫຍໍ້ທໍ້ ແລະ ບັນຫາທີ່ນອນຢູ່ໃນບັນຫາ 4 ເຖື່ອນ, ສຸມໃສ່ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ, ຄຸ້ມຄອງປົກປັກຮັກສາຊັບພະຍາກອນປ່າໄມ້, ບໍ່ແຮ່, ດິນ, ໃຫ້ເຂັ້ມງວດຕາມລະບຽບກົດໝາຍ, ປັບປຸງກົນໄກການຄຸ້ມຄອງ ແລະ ຍົກລະດັບການບໍລິການການທ່ອງທ່ຽວໃຫ້ດີຂື້ນ, ເອົາໃຈໃສ່ຕໍ່ການແກ້ໄຂບັນຫາຄູສອນ ຢູ່ເຂດຊົນນະບົດ ແລະ ຍົກລະດັບການຮຽນການສອນໃຫ້ທັນກັບສະພາບການໃໝ່ ພ້ອມດຽວກັນໃຫ້ເອົາໃຈໃສ່ປັບປຸງແບບແຜນການນຳພາ ແລະ ວິທີເຮັດວຽກ, ຫັນແຜນດຳເນີນງານລວມຂອງຄະນະພັກ ກາຍເປັນເນື້ອໃນນຳພາລະອຽດ, ຈະແຈ້ງ ແລະ ເປັນລະບົບ, ເອົາໃຈໃສ່ຝຶກຝົນຄຸນທາດການເມືອງ, ຄຸນສົມບັດສິນທຳປະຕິວັດ ໃຫ້ເປັນແບບຢ່າງນຳໜ້າ, ສືບຕໍ່ປະຕິບັດແນວທາງການຕ່າງປະເທດໃຫ້ຖືກຕ້ອງ ແລະ ເອົາໃຈໃສ່ນຳພາເຊື່ອມຊືມ, ກຳແໜນບັນດາເນື້ອໃນທີ່ໄດ້ປຶກສາຫາລື ແລະ ຮັບຮອງໃນກອງປະຊຸມຄັ້ງນີ້ ໄປຜັນຂະຫຍາຍໃຫ້ເປັນຂະບວນການ ເຂົ້າສູ່ຕົວຈິງຕາມທ່າແຮງ ແລະ ຈຸດພິເສດຂອງຕົນ ໃຫ້ໄດ້ຮັບຜົນສຳເລັດພ້ອມກັບຮັບປະກັນທ້າງດ້ານປະສິດທິຜົນ.