ໃນວັນທີ 10 ສິງຫາ 2018 ຢູ່ທີ່ຫ້ອງຮັບຮອງຂອງແຂວງ ທ່ານ ພົນໂທ ວິໄລ ຫຼ້າຄຳຟອງ ເລຂາທິການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫ່ຍການເມືອງກອງທັບ ພ້ອມຄະນະ ໄດ້ນຳເງີນຈຳນວນ 50.000.000 ກີບ ມາມອບໃຫ້ແຂວງບໍລິຄຳໄຊ ເພື່ອຊ່ວຍເຫຼືອບັນເທົາທຸກຕໍ່ພໍ່ແມ່ປະຊາຊົນ ທີ່ຖືກຜົນກະທົບຈາກໄພນ້ຳຖ້ວມ ເປັນກຽດຮັບໂດຍ ທ່ານ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ.

     ໃນໂອກາດນີ້ທ່ານເຈົ້າແຂວງບໍລິຄຳໄຊ ໄດ້ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງ ຕໍ່ກະຊວງປ້ອງກັນປະເທດກໍ່ຄືການນຳທຸກຂັ້ນ ທີ່ຢາມໄດກໍ່ມີຄວາມເປັນຫ່ວງເປັນໄຍ ຕໍ່ຊີວິດການເປັນຢູ່ຂອງພໍ່ແມ່ປະຊາຊົນຊາວແຂວງບໍລິຄຳໄຊ ພ້ອມດຽວກັນນັ້ນທ່ານເຈົ້າແຂວງກໍ່ຍັງໄດ້ລາຍງານໂດຍຫຍໍ້ ກ່ຽວກັບສະພາບນ້ຳຖ້ວມຢູ່ແຂວງບໍລິຄຳໄຊ ເນື່ອງຈາກມີຝົນຕົກຕິດຕໍ່ກັນເປັນເວລາຫຼາຍວັນ ເຮັດໃຫ້ມີນ້ຳປ່າໄຫຼຫຼາກ, ລະດັບຂອງແມ່ນ້ຳຫຼາຍສາຍເພີ່ມຂື້ນ ໄຫຼເຂົ້າຖ້ວມບ້ານເຮືອນຂອງປະຊາຊົນທີ່ອາໄສຢູ່ຕາມແຄມແມ່ນ້ຳ. ປັດຈຸບັນມີ 6 ເມືອງ, 96 ບ້ານ, 4.800 ກວ່າຄອບຄອບ ໄດ້ຮັບຜົນກະທົບ ຖ້ວມເນື້ອທີ່ການຜະລິດ 5.000 ກວ່າເຮັກຕາ, ໜອງປາຈຳນວນໜຶ່ງ ປາເສຍຫາຍ 500.000 ກວ່າໂຕ ນອກນັ້ນສັດປີກ 1.000 ກວ່າໂຕ ແລະ ສັດໃຫຍ່ຈຳນວນໜຶ່ງເກີດລົ້ມຕາຍ. ເພື່ອສະແດງຄວາມຂອບໃຈ ແລະ ຮູ້ບຸນຄຸນ ແຂວງບໍລິຄຳໄຊຍັງໄດ້ມອບໃບກຽດຕິຄຸນ ໃຫ້ແກ່ກະຊວງປ້ອງກັນປະເທດທີ່ໃຫ້ການອຸປະຖຳຊ່ວຍເຫຼືອຜູ້ປະສົບໄພພິບັດ.