ກອງປະຊຸມ ວິທະຍາສາດວຽກງານສາສະໜາ ທົ່ວແຂວງບໍລິຄຳໄຊ ໄດ້ຈັດຂຶ້ນໃນຕອນເຊົ້າຂອງວັນທີ 10 ສິງຫາ 2018 ຢູ່ທີ່ຫ້ອງປະຊຸມຂອງຫ້ອງວ່າການປົກຄອງແຂວງບໍລິຄຳໄຊ ພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີບັນດາຄະນະປະຈຳພັກແຂວງ, ເຈົ້າເມືອງ, ຫົວໜ້າຫ້ອງການແນວລາວສ້າງຊາດຈາກ 7 ຕົວເມືອງ ແລະ ພະແນກການກ່ຽວຂ້ອງເຂົ້າຮ່ວມ.

       ແຂວງບໍລິຄຳໄຊ ປະກອບດ້ວຍ 7 ຕົວເມືອງ, ມີ 291 ບ້ານ, ມີພົນລະເມືອງ 288.815 ຄົນ ຍິງ 142.303, ມີ 24 ເຜົ່າ, ແບ່ງເປັນ 4 ໝວດພາສາເວົ້າ: ໝວດພາສາລາວ-ໄຕ 8 ເຜົ່າ, ມອນ-ຂະແມ 13 ຊົນເຜົ່າ, ມົ້ງ-ອີວມ່ຽນ 1 ເຜົ່າ ແລະ ໝວດພາສາຈີນ-ຕິເບດ 2 ເຜົ່າ, ນອກຈາກ 24 ຊົນເຜົ່າຍັງມີຊົນເຜົ່າເຊື້ອສາຍຕ່າງປະເທດເຊັ່ນ: ຈີນ, ຫວຽດນາມ ແລະ ໄທ, ແຕ່ລະຊົນເຜົ່າມີຮີດຄອງປະເພນີ ແລະ ການດຳລົງຊີວິດຄ້າຍຄືກັນ, ເຊື່ອຖື 3 ສາສະໜາ: ສາສະໜາພຸດ ມີຜູ້ເຊື່ອຖື 70% ໃນນັ້ນ ທົ່ວແຂວງມີຄະນະ ອພສ ແຂວງ 37 ອົງ, ມີ 223 ວັດ, ວັດບໍ່ມີພະສົງ 20 ວັດ, ມີສິມ 76 ໜ່ວຍ, ມີສາມະເນນ 979 ອົງ, ມີໂຮງຮຽນມັດທະຍົມສົງ 1 ແຫ່ງ ແລະ ເປີດຮຽນເປັນປົກກະຕິຄືກັນກັບໂຮງຮຽນສາມັນທົ່ວໄປ, ຜ່ານມາມີພຣະສົງເຄື່ອນໄຫວຜິດພຣະທຳວິໄນສົງ 3 ເລື່ອງ ແລະ ໄດ້ແກ້ໄຂທ່ວງທັນເວລາສຳເລັດໄປດ້ວຍດີ, ສາສະໜາເຢຊູຄຣິສ ມີຜູ້ເຊື່ອຖື 5,81% ປະກອບມີ 2 ນິກາຍ ມີ 14 ບ້ານ ມີ 6,110 ຄົນ ຍິງ 2,518, ໃນນັ້ນ ນິກາຍໂລມັນຄາໂຕລິກ ມີຜູ້ເຊື່ອຖືຢູ່ 3 ເມືອງຄື: ເມືອງປາກຊັນ, ເມືອງບໍລິຄັນ ແລະ ເມືອງປາກກະດິງ  ແຕ່ລະປີຈະມີ 3 ບຸນໃຫຍ່ຄື ບຸນໂນແອນ ຫຼື ບຸນຄຣິສມາດ, ບຸນປາສະກາ ແລະ ບຸນບ້ານ, ນອກນັ້ນ ຍັງມີບຸນອຸທິດຫາດວງວິນຍານ ມີພຣະຄຳພີທີ່ໃຊ້ສັ່ງສອນຄຣິສຕະຊົນເປັນຕົ້ນແມ່ນພຣະຄຳພີເດີມ ແລະ ພຣະຄຳພີໃໝ່, ໃນເວລາພັກປະຈຳປີຈະໄດ້ເອີ້ນເອົາເດັກນ້ອຍມາຮຽນພຣະຄຳສອນ ແລະ ພາສາອັງກິດຕອນເຊົ້າແຕ່ວັນຈັນ-ຫາວັນສຸກ ແຕ່ຍັງມີຊາວຄຣິສຈຳນວນໜຶ່ງຖືເບົາບໍ່ໄປວັດ ແລະ ບໍ່ປະຕິບັດຕາມຄຳສອນ ຫຼື ບົດບັນຍັດຂອງພະເຈົ້າ ເປັນຕົ້ນແມ່ນມົວນຳສິ່ງເສບຕິດ, ຫຼິ້ນການພະນັນ ແລະ ອື່ນໆ, ອົງການສາສະໜາໂປຣແຕັສຕັງ ມີ 2 ຄະນະ ຄຣີສຕຽນຄະນະຂາວປະເສີດ ແລະ ຄຣິສຕຽນຄະນະວັນເສົາ, ສາສະໜາບາຮາຍ ມີຄົນເຊື່ອຖື 0,005%, ອົງການສາສະໜານີ້ກໍ່ມີກົງຈັກການຈັດຕັ້ງບໍ່ທັນແໜ້ນໜາ ແລະ ມີຜູ້ເຊື່ອຖືຈໍານວນໜ້ອຍ  ໃນນັ້ນ ມີເມືອງປາກຊັນ ແລະ ບໍລິຄັນ ອົງການນີ້ກໍ່ໄດ້ຕັ້ງໜ້າປະຕິບັດຕາມຫຼັກທຳຄຳສັ່ງສອນຂອງ ພຣະເຈົ້າບາຮາອູລລາທ໌ ໂດຍມີຫຼັກທຳ 12 ຂໍ້ ທາງດ້ານສັງຄົມເປັນຫຼັກ ທີ່ບໍ່ຂັດກັບລະບຽບກົດໝາຍ ສຶກສາອົບຮົມໃຫ້ຜູ້ເຊື່ອຖືປະພຶດຄວາມດີ ລະເວັ້ນຄວາມຊົ່ວ ການເຄື່ອນໄຫວຕ່າງໆ ບໍ່ສະເໜີອະນຸຍາດຈາກພາກສ່ວນກ່ຽວຂ້ອງເປັນລາຍລັກອັກສອນມີລັກສະນະເຄື່ອນໄຫວຕາມໃຈຂອງຜູ້ເຊື່ອຖື ນອກນັ້ນ ຍັງມີຜູ້ເຊື່ອຖືບັນພະບູລຸດ 24,9%.

ສຳລັບທິດທາງແຜນການໃນຕໍ່ໜ້າ ຊຸກຍູ້ໃຫ້ອົງການສາສະໜາຕ່າງໆ ແລະ ຜູ້ເຊື່ອຖືໄດ້ເຄື່ອນໄຫວຕາມຫຼັກທຳຄຳສັ່ງສອນຂອງສາສະໜາ ທີ່ບໍ່ຂັດກັບລັດຖະທຳມະນູນ ແລະ ກົດໝາຍ, ຜູ້ເຊື່ອຖືຕ້ອງເຄື່ອນໄຫວພາຍໃຕ້ລະບຽບກົດໝາຍຢ່າງເຂັ້ມງວດ ພ້ອມທັງມີສ່ວນຮ່ວມໃນການພັດທະນາເສດຖະກິດ-ສັງຄົມໄລຍະໃໝ່, ຂະແໜງພາຍໃນຕ້ອງເປັນໃຈກາງໃນການຈັດຕັ້ງປະຕິບັດຕາມດຳລັດ 315/ລບ, ລົງວັນທີ 16 ສິງຫາ 2016 ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວຢູ່ ສປປ ລາວ, ອົງການສາສະໜາຕ່າງໆ ແລະ ຂະແໜງພາຍໃນຕ້ອງມີການສະຫຼຸບ, ວາງແຜນປະຈຳ 3 ເດືອນ 6 ເດືອນ, 1 ປີ ລະບອບການລາຍງານເປັນປົກກະຕິ ແລະ ພ້ອມກັນເສີມຂະຫຍາຍຈຸດດີແກ້ໄຂຈຸດອ່ອນຂໍ້ຄົງຄ້າງ ເປັນຕົ້ນແມ່ນສະຖິຕິຜູ້ເຊື່ອຖື, ນັກບວດ, ນັກສອນສາສະໜາ ແລະ ຊັບສົມບັດຂອງອົງການສາສະໜາຕົນ.