ການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2018 ແຂວງບໍລິຄຳໄຊແມ່ນປະຕິບັດໄດ້ລື່ນແຜນຫຼາຍກວ່າ 12%, ທ່ານ ຄຳແຫວນ ປັນຍານຸວົງ ຫົວໜ້າພະແນກການເງີນແຂວງ ໄດ້ລາຍງານຕໍ່ກອງປະຊຸມການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ໃນວັນທີ 9 ສິງຫາ 2018 ຢູ່ທີ່ຫ້ອງປະຊຸມເບີ 2 ຫ້ອງວ່າການປົກຄອງແຂວງ ໂດຍການເປັນປະທານຂອງ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ຜູ້ຊີ້ນຳວຽກງານເສດຖະກິດ, ມີບັນດາພະແນກການອ້ອມຂ້າງ, ເມືອງ 7 ຕົວເມືອງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

      ທ່ານຫົວໜ້າພະແນກການເງີນໄດ້ລາຍງານວ່າ ໃນໄລຍະທີ່ຜ່ານມາ ພະແນກການເງີນແຂວງ ໄດ້ສົບທົບກັບພະແນກການທີ່ກ່ຽວຂ້ອງ ສຸມໃສ່ສຳຫຼວດເກັບກຳຂໍ້ມູນຖານລາຍຮັບຄືນໃໝ່ ແລະ ຂຸດຄົ້ນແຫຼ່ງລາຍຮັບ ຕາມທ່າແຮງບົ່ມຊ້ອນຂອງແຂວງ, ເຂັ້ມງວດປະຕິບັດວິໄນການເງິນ ແລະ ອັດຊ່ອງວ່າງຂອງການຮົ່ວໄຫຼງົບປະມານ ພ້ອມດຽວກັນ ຍັງໄດ້ເອົາໃຈໃສ່ໃນການບໍລິການ, ຄຸ້ມຄອງກວດກາສິນຄ້າເຂົ້າ-ອອກ ໂດຍການນຳໃຊ້ເຄືອງມືທີ່ທັນສະໄໝ. ຜ່ານການຈັດຕັ້ງຕົວຈິງ 6 ເດືອນຕົ້ນປີ ສາມາດປະຕິບັດຕົວເລກລາຍຮັບເຂົ້າແຜນງົບປະມານແຫ່ງລັດ ໄດ້ 462,45 ຕື້ກີບ, ເທົ່າກັບ 112,83%, ທຽບໃສ່ແຜນການປີ 55,90%, ທຽບໃສ່ໄລຍະດຽວກັນເພີ່ມຂື້ນ 22,31 %, ໃນນັ້ນ ລາຍຮັບພູດສູນກາງ ປະຕິບັດໄດ້ 358,79 ຕື້ກີບ ເທົ່າກັບ 113,63%, ທຽບໃສ່ແຜນການປີ 56,81% ທຽບໃສ່ໄລຍະດຽວກັນ ເພີ່ມຂື້ນ 26,50%. ລາຍຮັບພູດທ້ອງຖິ່ນ ປະຕິບັດໄດ້ 103,66 ຕື້ກີບ ເທົ່າກັບ 110,19%, ທຽບໃສ່ແຜນການປີ 52,98% ທຽບໃສ່ໄລຍະດຽວກັນເພີ່ມຂື້ນ 9,75%. ແຫລ່ງລາຍຮັບພື້ນຖານ ທີ່ເປັນປັດໄຈພາໃຫ້ລາຍຮັບໄດ້ຕາມຄາດໝາຍ ແລະ ລື່ນແຜນ ແມ່ນໄດຮັບຈາກພາສີການນໍາເຂົ້ານໍ້າມັນເຊື້ອໄຟ ກວມເອົາ 52,24%, ການນໍາເຂົ້າພາຫະນະ ກວມ 28,93%, ການນໍາເຂົ້າສິນຄ້າປະເພດອຸປະໂພກ-ບໍລິໂພກ ກວມເອົາ 6,41%, ການນໍາເຂົ້າສິນຄ້າ ປະເພດເຄື່ອງກໍ່ສ້າງ ກວມເອົາ 4,29% ແລະ ສິນຄ້າອື່ນໆອີກຈໍານວນໜື່ງ.

    ຫຼັງຈາກນັ້ນໃນກອງປະຊຸມ ກໍ່ຍັງໄດ້ມີການແລກປຽນຄຳຄິດຄຳເຫັນຮ່ວມກັນ ໃນຫຼາຍຫົວຂໍ້ທີ່ຍັງເປັນຂໍ້ຄົງຄ້າງ ເປັນຕົ້ນແມ່ນ ຂໍ້ສະດວກ ແລະ ຫຍຸ້ງຍາກຂອງການຈັດເກັບລາຍຮັບຂອງບັນດາເມືອງ, ການເກັບລາຍຮັບຈາກພາສີທີ່ດິນ, ການຂຸດຄົ້ນແຫຼ່ງລາຍຮັບໃໝ່, ການສ້າງຄວາມເຂັ້ມແຂງໃຫ້ແກ່ຜູ້ປະກອບການ ແລະ ບັນດາຫົວໜ່ວຍທຸລະກິດ ແລະ ບັນຫາສຳຄັນອື່ນໆອີກຈຳນວນໜຶ່ງ ທັງນີ້ກໍ່ເພື່ອນຳໄປຄົ້ນຄວ້າພິຈະລະນາ ແລະ ປັບປຸງແກ້ໄຂບັນດາວຽກງານທີ່ຄົງຄ້າງເຫລົ່ານັ້ນ ໃຫ້ດີຂື້ນໃນຕໍ່ໜ້າ.