ກອງປະຊຸມຜູ້ບໍລິຫານການສຶກສາ ແລະ ກິລາທົ່ວແຂວງບໍລິຄຳໄຊ ປະຈຳປີ 2018 ໄດ້ໄຂຂື້ນໃນຕອນເຊົ້າວັນທີ 8 ສິງຫາ 2018 ຢູ່ທີ່ຫ້ອງປະຊຸມຊັ້ນ II ກຸ່ມເສດຖະກິດເມືອງປາກກະດິງ, ເປັນກຽດເຂົ້າຮ່ວມກອງປະຊຸມມີ: ທ່ານ ຄຳສີ ຍົມມະລາດ ຫົວໜ້າພະແນກສຶກສາທິການ ແລະກິລາແຂວງ, ທ່ານ ສົມພອນ ຈັນທະນາສຸກ ເລຂາພັກເມືອງ ເຈົ້າເມືອງປາກກະດິງ, ທ່ານ ນາງມາລິສາ ອາໄພລາດ ກຳມະການຄະນະປະຈຳສະພາປະຊາຊົນແຂວງ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ມີແຂກຖືກເຊີນຈາກພະແນກການອ້ອມຂ້າງແຂວງ, ຫົວໜ້າຫ້ອງການອ້ອມຂ້າງເມືອງປາກກະດິງ ແລະ ຜູ້ບໍລິຫານການສຶກສາທົ່ວແຂວງເຂົ້າຮ່ວມ.

 

     ກອງປະຊຸມຄັ້ງນີ້ ຈະໄດ້ຮັບຟັງບົດສະຫລຸບຂອງການຈັດຕັ້ງປະຕິບັດວຽກງານການສຶກສາໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ຈຸດປະສົງຕົ້ນຕໍຂອງກອງປະຊຸມ ແມ່ນເພື່ອປະຕິບັດຕາມແຜນພັດທະນາການສຶກສາ ແລະ ກິລາ 5 ປີແຫ່ງຊາດຄັງທີ່ VIII ( 2016 – 2020 ) ກໍ່ຄືແຜນພັດທະນາເສດຖະກິດ - ສັງຄົມຂອງແຂວງ 5 ປີຄັ້ງທີ VI, ວິໃສທັດການພັດທະນາການສຶກສາ ແລະ ກິລາຮອດປີ 2030, ຍຸດທະສາດຮອດປີ 2025, ແຜນພັດທະນາການສຶກສາ ແລະ ກິລາ ປະຈຳສົກຮຽນ 2018-2019 ຂອງພະແນກສຶກສາທິການ ແລະ ກິລາແຂວງ ເຊີ່ງຕ້ອງໄດ້ເອົາໃຈໃສ່ຕໍ່ໜ້າທີ່ຄວາມຮັບຜິດຊອບຂອງຕົນເພື່ອບັນລຸບັນດາຄາດໝາຍທີ່ວາງໄວ້.

    ກອງປະຊຸມ ຍັງຈະໄດ້ມີຄຳຖາມເຈາະຈີ້ມບາງດ້ານ ເພື່ອຊອກໃຫ້ເຫັນບັນຫາ-ສາເຫດຂອງຂໍ້ຄົງຄ້າງທີ່ເປັນຈຸດອ່ອນຕໍ່ກັບການພັດທະນາວຽກງານການສຶກສາ ແລະ ມາດຕະການວິທີແກ້ໄຂຢ່າງສົມເຫດສົມຜົນ ເພື່ອເປັນການພັດທະນາວຽກງານການສຶກສາ ແລະ ກິລາຢູ່ແຂວງບໍລິຄຳໄຊໃຫ້ໄດ້ທັງປະລິມານ ແລະ ຄຸນນະພາບທີ່ດີຂື້ນ, ກອງປະຊຸມຄັ້ງນີ້ຈະໄດ້ດຳເນີນເປັນເວລາ 3 ວັນ ຈື່ງຈະສຳເລັດລົງ.