ໃນວັນທີ່ 8 ສິງຫາ 2018 ຢູ່ຫ້ອງປະຊຸມຂອງກອງບັນຊາການ ປກສ ເມືອງ ວຽງທອງ ແຂວງ ບໍລິຄໍາໄຊ ໄດ້ຈັດພິທີປະກາດການຈັດຕັ້ງ ແລະ ເລື່ອນຊັ້ນໃຫ້ນາຍ ແລະ ພົນຕໍາຫຼວດ ພາຍໃນກອງບັນຊາການ  ໂດຍເປັນກຽດເຂົ້າຮ່ວມເປັນປະທານຂອງ ທ່ານ ພັທ ຄໍາໃບ ສຸວັນນະໂຄດ ຄະນະພັກ ຮອງຫົວໜ້າກອງບັນຊາການ ປກສ ແຂວງ ບໍລິຄໍາໄຊ, ມີບັນດາຄະນະພັກ, ສະມາຊິກພັກ, ນາຍ ແລະ  ພົນຕໍາຫຼວດ ພ້ອມດ້ວຍແຂກຖືກເຊີນເຂົ້າຮ່ວມ.

   

   ໂດຍປະຕິບັດຕາມຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການຍົກຍ້າຍນາຍ ແລະ ພົນຕໍາຫຼວດທີ່ຂຶ້ນກັບກອງບັນຊາການ ປກສ ແຂວງ ບໍລິຄໍາໄຊ ເຫັນດີຍົກຍ້າຍ ທ່ານ ພັທ ສຸລິໄຊ ພົມມີໄຊ ຈາກກອງບັນຊາການ ປກສ ເມືອງ ວຽງທອງ ໄປຮັບໜ້າທີ່ໃໝ່ຢູ່ຫ້ອງ 504  ແລະ ຍົກຍ້າຍ ທ່ານ ພອນຄໍາ ພີມມະຈັນ ກໍາມະການພັກເມືອງ ຫົວໜ້າ ປກສ ກຸ່ມຂຶ້ນມາເປັນຮອງກອງບັນຊາການ ປກສ ເມືອງ ວຽງທອງ. ໃນພິທີ ຍັງໄດ້ຜ່ານຂໍ້ຕົກລົງວ່າດ້ວຍການເລື່ອນຊັ້ນ ແລະ ປະດັບຊັ້ນໃຫ້ນາຍ ແລະ ພົນຕໍາຫຼວດ ຂອງກອງບັນຊາການ ປກສ ເມືອງ ວຽງທອງ ຈໍໍານວນ 4 ທ່ານ, ຍິງ 1 ທ່ານ ຄື: ເລື່ອນຊັ້ນ ຮ້ອຍຕີ ຂຶ້ນ ຮ້ອຍໂທ 1 ສະຫາຍ, ຊັ້ນ ສິບເອກ ຂຶ້ນ  ວາທີ 2 ສະຫາຍ ແລະ ຊັ້ນ ສິບໂທ ຂຶ້ນ ສິບເອກ 1 ສະຫາຍ.

      ຕອນທ້າຍ ກໍ່ໄດ້ຮັບຟັງການໂອ້ລົມຂອງ ທ່ານ ພັທ  ຄໍາໃບ ສຸວັນນະໂຄດ ກ່ອນອື່ນທ່ານໄດ້້ຍ້ອງຍໍຊົມເຊີຍຕໍ່ຜົນງານທີ່ອ້າຍນ້ອງນາຍ ແລະ ພົນຕໍາຫຼວດຍາດມາໄດ້, ຈາກນັ້ນ ທ່ານໄດ້ຍົກໃຫ້ເຫັນຕໍ່ການແຕ່ງຕັ້ງ ຍົກຍ້າຍໃນຄັ້ງນີ້ ກໍ່ເພື່ອເປັນການປັບປຸງກົງຈັກການຈັດຕັ້ງຂອງວຽກງານປ້ອງກັນຄວາມສະຫງົບຢູ່ແຕ່ລະຂັ້ນ ໃຫ້ມີຄວາມໜັກແໜ້ນທາງດ້ານການເມືອງ - ແນວຄິດ, ເຂັ້ມແຂງທາງດ້ານການຈັດຕັ້ງ ເພື່ອສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ຢ່າງທັນການ ແລະ ຮອບດ້ານ.