ໃນວັນທີ 08 ສິງຫາ 2018 ຢູ່ທີສະໂມສອນໃຫ່ຍຂອງແຂວງ ໄດ້ຈັດພິທີປາຖະກະຖາ ວັນສ້າງຕັ້ງແນວລາວສ້າງຊາດ ຄົບຮອບ 68 ປີ (13 ສິງຫາ 1950-13 ສິງຫາ 2018) ໃຫ້ກຽດປາຖະກະຖາໂດຍທ່ານ ລຳສະໄໝ ວໍລະສານ ປະທານແນວລາວສ້າງຊາດແຂວງ, ມີບັນດາການນຳຂອງແຂວງ, ພະນັກງານອາວຸໂສບຳນານ, ນາຍ ແລະ ພົນທະຫານ-ນາຍ ແລະ ພົນຕຳຫຼວດ ແລະ ພະນັກງານລັດຖະກອນອ້ອມຂ້າງແຂວງເຂົ້າຮ່ວມ.

       

     ທ່ານ ລຳສະໄໝ ວໍລະສານ ໄດ້ຍົກໃຫ້ເຫັນວ່າ: ຄົນລາວ, ເຊື້ອຊາດລາວ ມີມຸນເຊື້ອພິລະອາດຫານ, ມີນໍ້າໃຈຮັກຊາດອັນໜັກແໜ້ນ ເຖີງວ່າປະເທດຊາດຈະຕົກເປັນຫົວເມືອງຂື້ນຂອງຈັກກະພັດຕ່າງດ້າວມາແລ້ວຫຼາຍຍຸກຫຼາຍສະໄໝ ກໍ່ບໍ່ເຄີຍຍອມຈຳນົນໃຫ້ແກ່ຊາດໃດໆ ເຊັ່ນ: ໃນປີ 1893 ຈັກກະພັດລ່າເມືອງຂື້ນຝຣັ່ງໄດ້ມາຢຶດຄອງເອົາດິນແດນລາວເປັນຫົວເມືອງຂື້ນ, ປະຊາຊົນລາວບັນດາເຜົ່າ ໄດ້ຈົມຢູ່ໃນຄວາມເປັນຂ້ອຍຂ້າຂອງພວກເຂົາ ແລະ ຖືກກົດຂີ່ຂູດຮີດຢ່າງແສນສາຫັດ ດ້ວຍຄວາມຄຽດແຄ້ນຈຶ່ງໄດ້ມີຫຼາຍຂະບວນການຕໍ່ສູ້ ລຸກຮື້ຂື້ນຕ້ານກັບພວກລ່າເມືອງຂື້ນຝຣັ່ງຢ່າງແຂງແຮງໃນທົ່ວປະເທດ ຄື: ຂະບວນຕໍ່ສູ້ພາຍໃຕ້ການນຳພາຂອງພໍ່ກະດວດ, ເຈົ້າຟ້າເມືອງສິງ, ເຈົ້າຟ້າປັດໃຈ, ນາຍຄູຄໍາ ແລະ ຂະບວນການຕໍ່ສູ້ອື່ນໆ ແຕ່ກໍ່ບໍ່ໄດ້ຮັບໄຊຊະນະຍ້ອນຂາດການນຳພາທີ່ຖືກຕ້ອງ ແລະ ກະແຈກກະຈາຍ. ປີ 1930 ພັກກອມມູນນິດອິນດູຈີນໄດ້ກຳເນີດເກີດຂື້ນ, ພາຍໃຕ້ການນໍາພາຂອງພັກ ປະເທດລາວຈຶ່ງກ້າວເຂົ້າສູ່ໄລຍະໃໝ່ ແລະ ໄດ້ລຸກຂື້ນຢຶດອຳນາດການປົກຄອງໃນທົ່ວປະເທດ ໃນວັນທີ 23 ສິງຫາ 1945, ໄດ້ສ້າງອຳນາດການປົກຄອງປະຕິວັດ ແລະ ບັນດາກອງກຳລັງປະກອບອາວຸດປ້ອງກັນຕົວ ຢູ່ໃນຕົວເມືອງໃຫ່ຍຕ່າງໆ, ຈາກນັ້ນ ລັດຖະບານລາວອິດສະຫຼະກໍ່ໄດ້ຮັບການສ້າງຕັ້ງຂື້ນ ແລະ ປະກາດເປັນເອກະລາດຂອງຊາດ ຕໍ່ໜ້າມວນຊົນ ແລະ ສາກົນ ໃນວັນທີ 12 ຕຸລາ 1945. ນັບແຕ່ປີ 1946-1950 ຂະບວນການຕໍ່ຕ້ານປະຊາຊົນລາວບັນດາເຜົ່າ ໃຕ້ການນຳພາຂອງພັກ ໄດ້ເຕີບໃຫຍ່ຂະຫຍາຍຕົວຢ່າງແຂງແຮງ, ເຫດການທີ່ສຳຄັນແມ່ນວັນທີ 20 ມັງກອນ 1949 ທ່ານ ໄກສອນ ພົມວິຫານ ໄດ້ປະກາດສ້າງຕັ້ງກອງທັບລາວອິດສະຫຼະ ພ້ອມກັນນັ້ນ ຂະບວນການຕໍ່ຕ້ານພວກລ່າເມືອງຂຶ້ນຝຣັ່ງຢູ່ທົ່ວສະໜາມຮົບອິນດູຈີນ ກໍ່ມີບາດກ້າວກະໂດດຂື້ນຢ່າງໄວວາ, ກອງປະຊຸມໃຫຍ່ແນວລາວອິດສະຫຼະສະໄໝທີ 1 ໄດ້ໄຂຂຶ້ນໃນວັນທີ 13 ສິງຫາ 1950 ຢູ່ຕວຽນກວາງ ສສ ຫວຽດນາມ ມີຜູ້ແທນເຂົ້າຮ່ວມທັງໝົດ 150 ທ່ານ, ມາຈາກກຳລັງປະກອບອາວຸດ, ຕົວແທນຂອງບັນດາເຜົ່າ, ຊັ້ນຄົນ, ບັນດາອົງການຈັດຕັ້ງສັງຄົມ, ສາສະໜາ ຈາກເຂດຕໍ່ຕ້ານ ແລະ ເຂດກວດກາຂອງສັດຕູທົ່ວປະເທດ ກອງປະຊຸມໄດ້ປະກາດສ້າງຕັ້ງແນວໂຮມແຫ່ງຊາດ ໂດຍໃຫ້ຊື່ວ່າ ແນວລາວອິດສະຫຼະ ທີ່ມີຄະນະກຳມະການສູນກາງ 15 ທ່ານ ໂດຍແມ່ນສະເດັດ ເຈົ້າສຸພານຸວົງ ເປັນປະທານສູນກາງແນວລາວອິດສະຫຼະ, ມາສະໄໝທີ 2 ໄດ້ຈັດຂຶ້ນໃນວັນທີ 6-9 ມັງກອນ 1956 ທີ່ບ້ານເລີຍ ຕາແສງພູມ ເມືອງໂສຍ ແຂວງຫົວພັນ ກອງປະຊຸມໄດ້ຕົກລົງປ່ຽນຊື່ແນວລາວອິດສະຫຼະມາເປັນ ແນວລາວຮັກຊາດ, ຮອດສະໄໝທີ 4 ໄດ້ໄຂຂຶ້ນໃນວັນທີ 16-20 ກຸມພາ 1979 ທີ່ສະໂມສອນໜອງບອນ ນະຄອນຫຼວງວຽງຈັນ ກອງປະຊຸມໄດ້ມີມະຕິປ່ຽນຊື່ມາເປັນ ແນວລາວສ້າງຊາດ ຈົນເຖິງປັນຈຸບັນ.