ກອງປະຊຸມເປີດກວ້າງຄົບຄະນະພັກຮາກຖານພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງບໍລິຄຳໄຊຄັ້ງທີ 1 ສະໄໝທີ 2 ໄດ້ຈັດຂຶ້ນໃນຕອນເຊົ້າຂອງວັນທີ 12 ກໍລະກົດ 2018 ຢູ່ທີ່ຫ້ອງປະຊຸມຂອງພະແນກ ຖວທ ແຂວງ ພາຍໃຕ້ການເປັນປະທານຂອງສະຫາຍ ເຄນ ລໍມະນີ ກຳມະການພັກແຂວງ ຫົວໜ້າພະແນກ ຖວທ ແຂວງ, ມີບັນດາສະມາຊິກພັກສົມບຸນ - ສຳຮອງທົ່ວພະແນກ ເຂົ້າຮ່ວມ.

     ຜູ້ແທນກອງປະຊຸມ ໄດ້ຮັບຟັງການເຜີຍແຜ່ມະຕິຄົບຄະນະບໍລິຫານງານພັກແຂວງຄັ້ງທີ 9 ສະໄໝທີ 6 ແລະ ຄຳສັ່ງຂອງກົມການເມືອງສູນກາງພັກເລກທີ 01/ກມສພ, ລົງວັນທີ 3 ມັງກອນ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ນອກນັ້ນ ຍັງໄດ້ຜ່ານຮ່າງບົດສະຫຼຸບຕີລາຄາການເຄື່ອນໄຫວນຳພາວຽກງານປະຈຳ 3 ເດືອນ ( 4,5,6 ) ແລະ ທິດທາງແຜນການ 3 ເດືອນ ( 7,8,9  ປີ 2018 ) ຂອງຄະນະພັກຮາກຖານ ແລະ ວຽກງານທີ່ພົ້ນເດັ່ນຂອງບັນດາຂະແໜງການ, ພ້ອມນັ້ນ ຄະນະພັກຮາກຖານ, ຄະນະໜ່ວຍພັກ ໄດ້ພ້ອມກັນປະກອບຄຳເຫັນໃສ່ຮ່າງບົດສະຫຼຸບໃນໄລຍະ 3 ເດືອນຜ່ານ ແລະ ທິດທາງແຜນການ ຕື່ມອີກ.