ໃນຕອນເຊົ້າຂອງ ວັນທີ 11 ກໍລະກົດ 2018 ນີ້ ຢູ່ທີ່ສະໂມສອນອົງການໄອຍາການປະຊາຊົນ ແຂວງ ບໍລິຄໍາໄຊ ໄດ້ຈັດພິທີ ເຊື່ອມຊຶມ ມະຕິຂອງຄະນະບໍລິຫານງານສູນກາງພັກ ປະຊາຊົນປະຕິວັດລາວ ວ່າດ້ວຍການຍົກສູງປະສິດທິພາບຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍຂື້ນ ໂດຍການເປັນກຽດເຜີຍແຜ່ຂອງທ່ານ ທອງໃບ ພຽນວົງ ຫົວໜ້າອົງການໄອຍະການປະຊາຊົນແຂວງ, ມີສານປະຊາຊົນເຂດ, ຂະແໜງການ, ພະນັກງານຫຼັກແຫຼ່ງພາຍໃນເຂົ້າຮ່ວມ.

          ທ່ານ ທອງໃບ ພຽນວົງ ຫົວໜ້າອົງການໄອຍະການປະຊາຊົນ ແຂວງ ບໍລິຄໍາໄຊ ໄດ້ກ່າວວ່າ: ການຍົກສູງປະສິດທິພາບການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແມ່ນເນື້ອໃນຕົ້ນຕໍຂອງການຍົກສູງບົດບາດນໍາພາຂອງພັກ, ເພື່ອເພີ່ມປະສິດທິຜົນໃນການບໍລິຫານຂອງລັດ, ຮັບປະກັນເສີມຂະຫຍາຍ ແລະ ປະຕິບັດສິດເປັນເຈົ້າ ຂອງປະຊາຊົນບັນດາເຜົ່າ, ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ເປັນພື້ນຖານຂອງການສ້າງລັດທີ່ປົກຄອງດ້ວຍກົດໝາຍ ເຊິ່ງແມ່ນຂະບວນການວິວັດໜຶ່ງຂອງການບູລະນະລະບອບປະຊາທິປະໄຕປະຊາຊົນ ທີ່ຕ້ອງດໍາເນີນເປັນແຕ່ລະບາດກ້າວຢ່າງຮອບຄອບ ແລະ ໜັກແໜ້ນ ກ້າວສູ່ຈຸດໝາຍສັງຄົມນິຍົມ, ນັບແຕ່ໄດ້ດໍາເນີນແນວທາງປ່ຽນແປງໃຫມ່ຢ່າງຮອບດ້ານ ແລະ ມີຫຼັກການ, ພັກໄດ້ນໍາພາສ້າງ, ນໍາໃຊ້ ແລະ ປັບປຸງລັດຖະທໍາມະນູນ, ກົດໝາຍ, ນິຕິກໍາພາຍໃຕ້ກົດໝາຍ ໃຫ້ເປັນເຄື່ອງມືຄຸ້ມຄອງລັດ-ຄຸ້ມຄອງສັງຄົມ, ປົກປ້ອງສິດຜົນປະໂຫຍດອັນຊອບທໍາຂອງປະຊາຊົນບັນດາເຜົ່າ, ຂອງລັດ ແລະ ລວມຫມູ່, ຮັບປະກັນການປົກປັກຮັກສາລະບອບປະຊາທິປະໄຕປະຊາຊົນໄດ້ຢ່າງໝັ້ນຄົງ, ທັດສະນະແນວທາງ ທີ່ຈະຕ້ອງສຸມໃສ່ນໍາພາ ຕ້ອງຮັບປະກັນພັກນໍາພາ ແລະ ກໍາອໍານາດດ້ວຍກົດໝາຍຢ່າງພາວະວິໄສ, ຮັບປະກັນຄວາມໝັ້ນຄົງໃຫ້ແກ່ລັດປະຊາທິປະໄຕປະຊາຊົນທີ່ປົກຄອງດ້ວຍກົດໝາຍ, ເພີ່ມນິຕິທໍາໃນການປົກຄອງ ແລະ ຮັບປະກັນຄວາມຍຸຕິທໍາຢູ່ໃນສັງຄົມ ພ້ອມທັງສິດເປັນເຈົ້າ ຂອງປະຊາຊົນຕາມກົດໝາຍ, ການຄຸ້ມຄອງລວມສູນເປັນເອກະພາບຂອງບັນດາອົງການອໍານາດລັດ, ເອົາໃຈໃສ່ສ້າງ ແລະ ປັບປຸງກົດໝາຍຕ້ອງໃຫ້ສອດຄ້ອງກັບແນວທາງປ່ຽນແປງໃຫມ່ຮອບດ້ານທີ່ມີຫຼັກການຂອງພັກ, ຍົກສູງປະສິດທິພາບການປະຕິບັດກົດໝາຍຂອງບັນດາອົງການອໍານາດລັດ, ປະສິດທິພາບການຕ້ານ, ສະກັດກັ້ນພະຍາດອາດຍາສິດ, ການສໍ້ລາດບັງຫຼວງ, ເສີມຂະຫຍາຍສິດເປັນເຈົ້າ ຂອງປະຊາຊົນໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແລະ ຫັນການຄຸ້ມຄອງໃຫ້ມີລັກສະນະວິທະຍາສາດ ແລະ ທັນສະໄຫມເທື່ອລະກ້າວ, ເພີມທະວີການພົວພັນຮ່ວມມືສາກົນກັບບັນດາປະເທດຕ່າງໆໃນພາກພື້ນ ແລະ ໃນໂລກ ໂດຍສະເພາະເພື່ອນມິດຍຸດທະສາດ ເພື່ອຊອກຮູ້ປະສົບການບົດຮຽນໃນການຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ຕັ້ງໜ້າເຂົ້າຮ່ວມປະຕິບັດສິດ ແລະ ພັນທະຂອງຕົນຕາມສົນທິສັນຍາສາກົນ ທີ ສປປ ລາວ ເປັນພາຄີ, ນອກນັ້ນ ຍັງໄດ້ຮັບຟັງການເຜີຍແຜ່ມະຕິຂອງຄະນະບໍລິຫານງານສູນກາງພັກ ວ່າດ້ວຍການແກ້ໄຂພະຍາດອາດຍາສິດ, ສະກັດກັ້ນ ແລະ ຕ້ານການສໍ້ລາດບັງຫຼວງຕື່ມອີກ.

       ການຈັດຕັ້ງ ເຊື່ອມຊືມບັນດາເອກະສານສຳຄັນໃນຄັ້ງນີ້ ກໍ່ເພື່ອເປັນການກະຕຸ້ນ, ເຊື່ອມຊືມ ແລະ ປູກຈິດສຳນຶກໃຫ້ພະນັກງານຄຸ້ມຄອງນຳພາ, ພະນັກງານວິຊາການ ໄດ້ຮັບຮູ້ ແລະ ເຂົ້າໃຈຢ່າງຈະແຈ້ງເຖີງສິດ, ໜ້າທີ່ ແລະ ພາລະບົດບາດຂອງຕົນ ໃນຖານະເປັນພະນັກງານຂອງລັດ ທີ່ຕ້ອງໄດ້ສຸມທຸກສະຕິປັນຍາ ເພື່ອປະກອບສ່ວນເຂົ້າໃນການບໍລິຫານລັດ ບໍລິການສັງຄົມ ບົນພື້ນຖານການເຄົາລົບລະບຽບກົດໝາຍພື້ນຖານ ໃຫ້ມີຄວາມຍຸຕິທຳ ແລະ ຄວາມສະເໝີພາບກັນ ໂດຍບໍ່ມີການຈຳແນກຖານະ ຕຳແໜ່ງໃດໆໃນສັງຄົມ.