​ໃນ​ຕອນ​ເຊົ້າ​ຂອງ​ວັນ​ທີ 10 ກໍລະກົດ 2018 ນີ້ ຢູ່​ສະ​ໂມ​ສອນ​ຫ້ອງ​ວ່າການປົກຄອງ ເມືອງປາກ​ຊັນ ​ໄດ້​ຈັດ​ພິທີ​ສະຫຼຸບ​ຜົນ​ການ​ເຂົ້າຮ່ວມງານ​ແຂ່ງຂັນ​ກິລາ​ທົ່ວ​ແຂວງ​ ຄັ້ງ​ທີ IV ທີ່​ເມືອງ​ປາກ​ຊັນ​ເປັນ​ເຈົ້າພາບ ​ເປັນ​ກຽດ​ເຂົ້າ​ຮ່ວມ​ໂດຍ​ທ່ານ ສົມ​ພອນ ​ຄຳ​ປານີສົງ ຮອງ​ເຈົ້າ​ເມືອງ​ປາກ​ຊັນ, ມີ​ບັນດາ​ຄະນະ​ປະຈຳ​ພັກ​ເມືອງ, ຫົວໜ້າ​ຫ້ອງການອ້ອມ​ຂ້າງ​ເມືອງ, ບໍລິສັດ, ນັກ​ທຸກ​ລະ​ກິດ, ອຳນວຍ​ການ, ຄູ​ຝຶກ ​ແລະ ພ້ອມ​ດ້ວຍ​ນັກ​ກິລາ ​ເຂົ້າ​ຮ່ວມ.

    ທ່ານ ບຸນ​ໂຮມ ​ແກ້ວມະນີ​ສັກ ກຳມະການ​ພັກ​ເມືອງ ຫົວໜ້າ​ຫ້ອງການ​ສຶກສາທິການ ​ແລະ ກິລາ​ເມືອງ​ປາກ​ຊັນ ​ໄດ້​ລາຍ​ງານ​ຜ່ານ​ບົດ​ສະຫຼຸບຜົນ​ການ​ເຂົ້າຮ່ວມງານ​ແຂ່ງຂັນ​ກິລາ​ທົ່ວ​ແຂວງ​ ຄັ້ງ​ທີ IV ທີ່​ເມືອງ​ປາກ​ຊັນ​ເປັນ​ເຈົ້າພາບ ​ເຊິ່ງ​ໄດ້​ຈັດ​ຂຶ້ນ​ໃນລະ​ຫວ່າງ​ວັນ​ທີ 26-30 ມີນາ 2018 ທີ່​ຜ່ານ​ມາ ​ ​ ສາມາດ​ສະ​ແດງ​ໃຫ້​ເຫັນເຖິງຜົນງານ, ດ້ານ​ດີ, ດ້ານ​ອ່ອນ, ຂໍ້ຄົງຄ້າງ ​ແລະ ບາງບົດບົດຮຽນ​ທີ່​ຖອດຖອນ​ໄດ້ ​ໃນ​ການ​ເຂົ້າ​ຮ່ວມ​ແຂ່ງຂັນ​ກິລາ​ໃນ​ຄັ້ງ​ນີ້. ​​ເມືອງ​ປາກ​ຊັນ ​ໄດ້​ສົ່ງ​ນັກ​ກິລາ​ເຂົ້າ​ຮ່ວມ​​ແຂ່ງຂັນທັງ​ໝົດ​ຈຳນວນ 151 ຄົນ, ຍິງ 34 ຄົນ ມີ 8 ປະ​ເພດ​ກິລາ​ ຄື: ບານ​ເຕະ, ບານ​ສົ່ງ, ກະຕໍ້, ​ເປ​ຕັງ, ດອກ​ປີກ​​ໄກ່, ໜ້າ​ເກັກ, ໝາກ​ຄ່າງ ​ແລະ ໝາກ​ເສິກ ​ເຊິ່ງຜົນງານ​ການ​ແຂ່ງຂັນ ​ທີ່​ນັກ​ກິລາ​ເມືອງ​ປາກ​ຊັນ​ຍາດ​ມາ​ໄດ້ ຄື​: 10 ຫຼຽນ​ຄຳ, 13 ຫຼຽນ​ເງິນ ​ແລະ 15 ຫຼຽນ​ທອງ ລວມທັງ​ໝົດ 38 ຫຼຽນ ​ໄດ້​ອັນດັບ​ທີ 3 ​ໃນ​ຈຳນວນ 28 ພາກສ່ວນ​ທີ່​ເຂົ້າ​ຮ່ວມ​ແຂ່ງຂັນ. ​ເພື່ອ​ສະ​ແດງ​ເຖີງຜົນງານການ​ປະກອບ​ສ່ວນ​ຊຸ​ກຍູ້​ອຸປະຖຳ​ໃນ​ງານ​ແຂ່ງຂັນ​ກິລາ​ດັ່ງກ່າວ ​ເວົ້າ​ລວມ, ​ເວົ້າ​ສະ​ເພາະ​ເມືອງ​ປາກ​ຊັນ ຍັງ​ໄດ້​ຈັດ​ພິທີ​ມອບ​ໃບ​ຍ້ອງຍໍ​ໃຫ້​ແກ່​ບັນດາ​ຫົວໜ່ວຍທຸລະ​ກິດ, ຜູ້​ປະກອບ​ການ, ນັກທຸລະກິດ ​ແລະ ຜູ້​ທີ່​ໃຫ້ການ​ຊຸກຍູ້​ອຸປະຖຳ​ນັກ​ກິລາ​ຂອງ​ເມືອງ​ປາກ​ຊັນ ພ້ອມ​ທັງ​ຈັດ​ພິທີ​ມອບ​ເງິນ​ຊຸກຍູ້​ໃຫ້​ນັກ​ກິລາ ​ທີ່​ສາ​ມາດຍາ​ດໄດ້​​ຫຼຽນ​ຂອງແຕ່ລະ​ປະ​ເພດກິລາ​ຢ່າງ​ສົມ​ກຽດ.

     ໃນ​ຕ້ອນ​ທ້າຍ​ຂອງ​ພິທີ ບັນດາ​ຜູ້​ເຂົ້າ​ຮ່ວມ ຍັງ​ໄດ້​ຮັບ​ຟັງ​ການ​ໂອ້​ລົມ, ມີ​ຄຳ​ເຫັນ ​​ເພື່ອ​ເປັນ​ແນວທາງ​ໃນ​ຕໍ່​ໜ້າ ​ຈາກ​ທ່ານ ສົມ​ພອນ ຄຳ​ປານີ​ສົງ ​​ເຊິ່ງ​ທ່ານ​ກໍ່ໄດ້​ຍ້ອງຍໍ ​ແລະ ຊົມ​ເຊີຍ​ເຖີງຜົນງານ​ຂອງ​ນັກ​ກິລາ​ແຕ່ລະ​ປະ​ເພດ ​ແລະ ສະ​ແດງ​ຄວາມ​ຮູ້​ບຸນຄຸນ​ມາ​ຍັງ​ພາກສ່ວນຜູ້​ທີ່​ໃຫ້ການ​ອຸປະຖຳ ​ທີ່ໄດ້​ພ້ອມ​ກັນ​ເອົາ​ໃຈ​ໃສ່ຢ່າງ​ຕັ້ງໜ້າ ​ແລະ ​ເປັນ​ບົດຮຽນ​ອັນ​ລ້ຳ​ຄ່າ​ ທີ່​ຈະ​ໄດ້​ພ້ອມກັນ​ປັບປຸງ, ​ແກ້​ໄຂ ​ໃນ​ດ້ານ​ຕ່າງໆ ຂອງວົງ​ການ​ກິລາ​ຂອງ​ເມືອງ ໃຫ້​ມີ​ບາດກ້າວຂະຫຍາຍຕົວ ​ແລະ ມີ​ການ​ພັດທະນາ​ດີ​ຂຶ້ນ ສາມາດ​ສ້າງ​ຊື່​ສຽງ​ໃຫ້​ເມືອງ, ​ໃຫ້​ແຂວງ ​ແລະ ປະ​ເທດ​ຊາດ ​ໃຫ້​ທຽບ​ກັບ​ສາກົນ​ໄປ​ເທື່ອ​ລະ​ກ້າວ.