​ເພື່ອ​ເປັນ​ການ​ອະນຸ​ລັກ​ປົກ​ປັກ​ຮັກສາ ​ແລະ ພັດທະນາສັດ​ນ້ຳ​ໃຫ້​ອຸດົມສົມບູນ ​ໃນ​ຕອນ​ເຊົ້າ​ຂອງ​ວັນ​ທີ 11 ກໍລະກົດ 2018 ນີ້ ຢູ່​ອ່າງ​ຫ້ວຍ​ເຜີ້ງ ບ້ານ​ສິນ​ໄຊ ​ເມືອງ​ປາກ​ຊັນ ​ໄດ້​ຈັດ​ພິທີ​ປ່ອຍ​ປາ ​ແລະ ອະນຸ​ລັກ​ສັດ​ນ້ຳ-ສັດປ່າ​ແຫ່ງຊາດ​ປະຈຳ​ປີ 2018 ຂື້ນ ​​ເປັນກຽດ​ເຂົ້າ​ຮ່ວມ​ໂດຍ ທ່ານ ​ສົມຈິດ ພົມ​ສະຫວັດ ຮອງ​ເຈົ້າ​ເມືອງ​ປາກ​ຊັນ, ທ່ານ ພັດທະ​ຈອນ ​ແກ​້ວພຸດ​ທະ​ວົງ ຄະນະ​ພະ​ແນ​ກກະສິກຳ ​ແລະ ປ່າ​ໄມ້​ແຂວງ​ບໍລິ​ຄຳ​ໄຊ ມີ​ບັນດາການ​ນຳ​ຂອງ​ເມືອງ, ​ຫົວໜ້າ​ຫ້ອງການ, ຂະ​ແໜງ​ການ, ພະນັກງານ,  ອຳນາດ​ການ​ປົກ​ຂອງ​ບ້ານ​ ພ້ອມ​ດ້ວຍ​ພໍ່​ແມ່​ປະຊາຊົນ​ບ້ານ​ສິນ​ໄຊ ​ແລະ ບ້ານ​ໂພນ​ສະຫວ່າງ ​ເຂົ້າຮ່ວມ.

     ​ໂອກາດ​ນີ້ ທ່ານ ​ສົມຈິດ ພົມ​ສະຫວັດ ຮອງ​ເຈົ້າ​ເມືອງ​ປາກ​ຊັນ  ​ໃຫ້​ກຽດ​ຂຶ້ນ​ກ່າວ​ເປີດ​ພິທີ ພ້ອມ​ທັງ​ກ່າວ​ເຖີງຄວາມ​ໝາຍ​ຄວາມ​ສຳຄັນຂອງວັນ​ປ່ອຍ ​ແລະ ອະ​ນຸລັກ​ສັດ​ນ້ຳ-ສັດປ່າ​​ແຫ່ງຊາດ ​ໂດຍ​ກຳ​ນົດ​ເອົາ​ວັນ​ທີ 13 ກໍລະກົດ​ຂອງ​ທຸກໆ​ປີ ​ເປັນ​ວັນ​ປ່ອຍ​ປາ​ແຫ່ງ​ຊາດ ​ເພື່ອ​ອະນຸລັກ​ປົກ​ປັກ​ຮັກສາ ​ແລະ ພັດທະນາ​ແຫຼ່ງນ້ຳ​ໃຫ້​ມີ​ຄວາມ​ອຸດົມສົມບູນ​ ທັງ​ເປັນ​ການ​ປຸກ​ຈິດ​ສຳນຶກ​ໃຫ້​ປະຊາຊົນ​ບັນດາ​ເຜົ່າ ​ເວົ້າ​ລວມ, ​ເວົ້າ​ສະ​ເພາະ​ປະຊາຊົນ​ຊາວ​ເມືອງ​ປາກ​ຊັນ​ໃຫ້ຮັບ​ຮູ້​ການ​ອະນຸລັກ​ສັດ​ນ້ຳ-ສັດປ່າ​ໃຫ້​ຍືນ​ຍົງ​ຕະຫຼອດ​ໄປ,  ​ ຫຼັງ​ຈາກ​ນັ້ນ ບັນດາ​ທ່ານ, ​​ແຂກ​ຖືກ​ເຊີນ ພ້ອມ​ທັງ​ຜູ້​ເຂົ້າ​ຮ່ວມ ​ໄດ້​ພ້ອມກັນ​ປ່ອຍ​ປາ​ລົງ​ສູ່​ອ່າງ​ຫ້ວຍ​​ເຜີ້ງ, ​ສຳລັບ​ປາ​ທີ່​ນຳ​ເອົາ​ມາ​ປ່ອຍ​ໃນ​ຄັ້ງ​ນີ້​ ມີຈຳນວນທັງໝົດ 20 ພັນກວ່າ​ໂຕ, ​ ມີປາ 2 ຊະນິດ ​ຄື: ປາປາກ 15 ພັນ​ໂຕ ​ແລະ ປາ​ສະ​ລິບ 5 ພັນ ​ໂຕ ໂດຍໄດ້ຮັບການ​ສະໜັບສະໜຸນຈາກກຸ່ມ​ລ້ຽງ​ປາ​​ບ້ານ​ປາກປືງ ​ແລະ ສູນ​ຄົ້ນຄວ້າ​ການ​ປະມົງ. ການປ່ອຍປາຄັ້ງນີ້ ກໍ່​ເພື່ອ​ເປັນ​ການ​ອະນຸລັກ​ສັດ​ນ້ຳ-ສັດ​ປ່າ ​ແລະ ຟື້ນ​ຟູ​ຊີວິດຂອງ​ສັດ​ລົງ​ສູ່​ທຳ​ມະ​ຊາດ​​ໃຫ້ຂະຫຍາຍ​ພັນນັບ​ມື້​ນັບ​ຫຼາຍ​ຂຶ້ນ, ທ່ານ ຮອງເຈົ້າເມືອງ ຍັງ​​ໄດ້ຮຽກຮ້ອງ​ມາ​ຍັງ​ພໍ່​ປະຊາຊົນ ຫ້າມ​ບໍ່​ໃຫ້ຫາ​ປາ​ແບບ​ດັບສູນ ໃນ​ຊ່ວງ​ລະດູ​ວາງ​ໄຂ່​ຂອງ​ປາ, ຈົ່ງ​ຊ່ວຍກັນ​ອານຸລັກ​ ​ເພື່ອ​ຄວາມ​ຍືນ​ຍົງ​,ຍາວ​ນານຕະຫຼອດ​ໄປ.