ໃນວັນທີ 9 ກໍລະກົດ 2018 ນີ້ ຢູ່ທີ່ຫ້ອງປະຊຸມຫ້ອງວ່າການປົກຄອງເມືອງທ່າພະບາດ ໄດ້ເຜີຍແຜ່ເອກະສານມະຕິຂອງຄະນະບໍລິຫານງານສູນກາງພັກ ແລະ ປາຖະກະຖາ 2 ວັນປະຫວັດສາດ ເປັນກຽດເຜີຍແຜ່ໂດຍ ທ່ານ ບຸນສົງ ເພັດຈະເລີນ ເຈົ້າເມືອງທ່າພະບາດ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຄະນະຫ້ອງການ, ກອງບັນຊາການປກສ, ປກຊ ຕະຫຼອດຮອດ ພະນັກງານວິຊາການ ເຂົ້າຮ່ວມ.

    ໃນກອງປະຊຸມຄັ້ງນີ້ ໄດ້ຮັບຟັງການເຜີຍແຜ່ ເອກະສານມະຕິຂອງຄະນະບໍລິຫານສູນກາງພັກ ວ່າດ້ວຍ ການຍົກສູງປະສິດທິພາບຄຸ້ມຄອງລັດດ້ວຍກົດໝາຍ, ລະນຶກຫວນຄືນວັນຄ້າຍວັນເກີດ ທ່ານ ປະທານ ສຸພານຸວົງ ຄົບຮອບ 109 ປີ, ວັນເຊັນສົນທິສັນຍາມິດຕະພາບ ການຮ່ວມມືຮອບດ້ານ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມຄົບຮອບ 41 ປີ ໂດຍການໃຫ້ກຽດບັນຍາຍຂອງທ່ານ ບຸນສົງ ເພັດຈະເລີນ ເຈົ້າເມືອງທ່າພະບາດ. ເອກະສານສຳຄັນ ທີ່ນຳມາເຜີຍແຜ່ຄັ້ງນີ້ ໄດ້ຍົກໃຫ້ເຫັນ ບົດບາດ, ຄວາມໝາຍ, ຄວາມສຳຄັນ ຂອງການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ການຫັນທິດ ເພື່ອນຳພາປະເທດຊາດກ້າວຂື້ນສູ່ຈຸດໝາຍສັງຄົມນິຍົມນັ້ນ ປັດໃຈທີ່ສຳຄັນໜື່ງ ກໍ່ແມ່ນການສ້າງຄວາມຍຸຕິທຳ, ຄວາມສະເໝີພາບຮອບດ້ານຂອງຄົນໃນສັງຄົມທຸກເພດ ທຸກໄວຕໍ່ໜ້າກົດໝາຍ ໂດຍບໍ່ມີຂໍ້ຍົກເວັ້ນໃດໆ. ທ່ານ ເຈົ້າເມືອງ ຍັງໄດ້ຫວນຄືນມຸນເຊື້ອ ນ້ຳໃຈປະຕິວັດທີ່ຄວນໄດ້ຮ່ຳຮຽນເອົາເປັນແບບຢ່າງ ຂອງທ່ານປະທານ ສຸພານຸວົງ ຜູ້ນຳປະຕິວັດ ທີ່ໄດ້ເສຍສະຫລະຄວາມສຸກສ່ວນຕົວ ເຂົ້າຮ່ວມຂະບວນການຕໍ່ສູ້ກູ້ຊາດ ຈົນໄດ້ຮັບໄຊຊະນະ ນຳຄວາມສະຫງົບ, ຄວາມເປັນເອກະລາດ ແລະ ຄວາມຜາສຸກມາສູ່ປວງຊົນລາວທັງຊາດ. ຈາກນັ້ນ ທ່ານ ກໍ່ໄດ້ເວົ້າຄືນ ຄວາມໝາຍ ຄວາມສຳຄັນ ຂອງ 2 ວັນປະຫວັດສາດ ສາຍພົວພັນມິດຕະພາບ ແລະ ການຮ່ວມມືຮອບດ້ານ ລາວ - ຫວຽດນາມ ແລະ ຫວຽດນາມ - ລາວ ແລະ ວັນສ້າງຕັ້ງສາຍພົວພັນການທູດຂອງ 2 ຊາດອີກດ້ວຍ.

  ໃນຕອນທ້າຍ ທ່ານ ບຸນສົງ ເພັດຈະເລີນ ເຈົ້າເມືອງທ່າພະບາດ ທ່ານໄດ້ເນັ້ນໜັກຕື່ມອີກໃນຖັນແຖວພະນັກງານໃຫ້ເອົາໃຈໃສ່ເພີ່ມທະວີຄວາມເປັນແບບຢ່າງນຳໜ້າໃນທຸກຂົງເຂດວຽກງານ, ຫັນລົງກໍ່ສ້າງຮາກຖານການເມືອງຢ່າງໜັກແໜ້ນເຂັ້ມແຂງ ເພື່ອສ້າງບ້ານ ແລະ ກຸ່ມບ້ານພັດທະນາ, ພ້ອມກັນນັ້ນ ກໍ່ຕ້ອງສ້າງຕົນເອງໃຫ້ເປັນຄົນກ້າຫານ, ກ້າຄິດ, ກ້າສະແດງອອກ ເພື່ອປະກອບຄໍາຄິດຄໍາເຫັນທີ່ເປັນປະໂຫຍດໃນການຈັດຕັ້ງປະຕິບັດແນວທາງແຜນນະໂຍບາຍຂອງພັກ ແລະ ກົດໝາຍຂອງລັດ.